Украінцы ўпершыню ў гісторыі знішчылі капітальны мост дронамі. Авіяўдары і «хаймарсы» раней былі бяссільныя

Узброеныя сілы Украіны правялі аперацыю, падчас якой упершыню знішчылі мост з выкарыстаннем дронаў.

Скрыншот з відэа

Як паведамляецца, аперацыя працягвалася каля двух месяцаў і была скіраваная на Конкаўскі мост цераз Дняпро каля горада Алешкі, які выкарыстоўваўся для забеспячэння расійскіх пазіцый і абстрэлаў Херсона.

Спачатку спробы разбурыць мост з дапамогай звычайных сродкаў — авіяўдараў і сістэм тыпу HIMARS — не далі выніку, бо канструкцыя аказалася трывалай.

Паваротным момантам стала выяўленне слабых месцаў апораў моста: адзін з расійскіх вайскоўцаў апублікаваў фота, па якім украінскія аналітыкі змаглі вызначыць уразлівыя зоны, паведамляе выданне The Telegraph.

Пасля гэтага да аперацыі далучыўся 426‑ты полк беспілотных сістэм марской пяхоты. Яны распрацавалі спецыяльны кумулятыўны зарад і пачалі наносіць удары па апорах знізу, а не па верхняй частцы моста.

Для дастаўкі выбухоўкі выкарыстоўвалі цяжкія дроны, якія маглі падымаць значныя грузы. Яны набліжаліся да моста і акуратна апускалі зарады на тросах у патрэбныя пункты. Такія дзеянні паўтараліся шмат разоў на працягу некалькіх тыдняў, што паступова аслабіла канструкцыю. Такім чынам было дастаўлена да паўтары тоны выбухоўкі.

У выніку, калі мост ужо быў істотна пашкоджаны, па ім нанеслі фінальны ракетны ўдар, пасля чаго ён абваліўся.

Асаблівасць гэтай аперацыі ў тым, што выкарыстоўваліся цывільныя грузавыя дроны, якія першапачаткова не прызначаліся для вайсковых задач, але былі адаптаваныя для баявых умоў.

Каментары да артыкула