Шыкоўны гатэль у Мінску прапаноўвае імерсіўную вячэру са старажытнымі беларускімі стравамі — як гэта выглядае?
Стол, за якім сядзяць госці, ператвараецца ў экран — і ў чаканні вячэры можна назіраць, як беларускі кухар разам з буслам ды зубрам гатуюць ежу. «Не паказвайце турыстам, трэба спачатку беларусам схадзіць», — жартуюць наведвальнікі.
Блогер Какабай схадзіў на першую ў Беларусі імерсіўную вячэру са стравамі старажытнай беларускай кухні. Такая незвычайная прапанова з’явілася ў рэстаране The Refectory — ён знаходзіцца ў гатэлі The Basilian Minsk (той адносіцца да сеткі Hilton).
Фішка ў тым, што ў цёмнай залі кожны столік ператвараецца ў экран — мульцяшныя персанажы быццам бы збіраюць неабходныя для вячэры інгрэдыенты, гатуюць стравы і дастаўляюць ежу. Заліпаюць на такі мульцік нават дарослыя.
У меню пяць страў нацыянальнай кухні — ёсць дранікі (куды ж без іх?) са смятанай і ялавічынай пад ягадным соусам, каша на бярозавым соку з грыбамі, бутэрброд з грудзінкай і слаба салёным гурком…
А каб атрымаўся дэсерт, трэба спачатку размаляваць інтэрактыўную выяву спецыяльнымі харчовымі фламастарамі — і атрымаюцца дзьмухаўцы, да якіх падаюць варэнне з дзьмухаўцоў. Адзінае пытанне, як у склад быццам бы беларускага прысмака трапіў какос.
Столік браніраваць трэба загадзя. А каштуе такая вячэра 220 рублёў.
Чытайце таксама:
Гэтыя мінскія каты маюць уласны гардэроб і наведваюць рэстараны — як жывецца Азуру і Прушы ФОТЫ