Наста Кудасава. Мы не верылі ў трыццаць сёмы — і да нас пагрукаў дваццаты
Паэтка Наста Кудасава да Дня расстраляных паэтаў, які беларусы адзначаюць 29 кастрычніка, апублікавала прынагодны верш.
Курапаты. Фота з сацсетак
Мы любілі замкнуцца дома,
каб не чуць выццё Курапатаў.
Мы не верылі ў трыццаць сёмы —
і да нас пагрукаў дваццаты.
Гэта вусціш сапрэлым лісцем
набіваецца ў торбы целаў.
Я хацела б прачнуцца, выйсці,
выплыць, вылецець я б хацела…
Мы не верылі ў трыццаць сёмы,
не глядзелі ў твар Курапатам,
мы, стаіўшыся, спалі дома —
і да нас пагрукаў дваццаты.