Самалёты з жыхарамі Алешак прызямліліся ў аэрапорце Гомеля

Дарога была працяглай: жыхары акупаваных Алешак дабіраліся да расійскай Анапы на аўтобусах, пасля чаго правялі некалькі гадзін у паветры, ляцеўшы ў Гомель, піша БелТА.

Для іх сустрэчы задзейнічалі ўвесь комплекс аэрапорта, разгарнуўшы паўнавартасны намётавы гарадок.

Спецыялісты МНС, медыкі і валанцёры Чырвонага Крыжа неадкладна пачалі аказваць дапамогу эвакуяваным жыхарам, якія прыбылі фактычна з зоны баявых дзеянняў. Іх сустрэла вялікая каманда супрацоўнікаў ратавальнага ведамства, валанцёраў і дактароў.

Самым маленькім пасажырам прапануюць правесці час у гульнявых зонах — напрыклад, паглядзець мультфільмы.

У аэрапорце Гомеля жыхары Алешак будуць чакаць выезду ў «Новую Гуту» — менавіта праз гэты пункт пропуску ім трэба будзе праехаць на тэрыторыю Украіны, куды яны пажадалі перабрацца з акупаванага расіянамі мястэчка пад Херсонам.

Алешкі, якія знаходзяцца пад расійскім кантролем, на працягу апошніх месяцаў апынуліся ў сітуацыі, блізкай да гуманітарнай катастрофы. Горад пастаянна абстрэльваюць, а магчымасці выехаць адтуль амаль няма, бо большасць дарог замінаваная.

У канцы кастрычніка пры пасярэдніцтве Меланіі Трамп Расія і Украіна дамовіліся пра лакальнае спыненне агню, каб даць жыхарам магчымасць пакінуць горад. Рэжым цішыні пачаў дзейнічаць 27 кастрычніка і, паводле дамоўленасці, павінен працягвацца да 1 лістапада. Абсалютная большасць жыхароў пажадала вярнуцца ва Украіну.

Каментары да артыкула