З Беларусі стане лётаць больш самалётаў у Кітай
Беларусь і Кітай дамовіліся павялічыць колькасць авіярэйсаў паміж дзвюма краінамі. Паводле новага пагаднення, кожны бок зможа выбіраць не менш за тры авіякампаніі для пасажырскіх перавозак і аднаго авіяперавозчыка для грузавых, паведамляе прэс-служба ўрада Беларусі.
Здымак ілюстрацыйны. Фота: vecteezy.com
Авіякампаніі таксама атрымаюць права выконваць рэйсы ў Мінск і Пекін, а таксама яшчэ ў тры гарады Беларусі і Кітая на свой выбар. Прамежкавым пунктам на маршрутах паміж дзвюма краінамі стане Алматы ў Казахстане.
Гэтыя змены ўнясуць у дзейнае пагадненне аб паветраных зносінах, падпісанае 17 студзеня 1995 года.
Цяпер беларуская авіякампанія «Белавія» раз на тыдзень лётае па трох кітайскіх напрамках: ва Урумчы, Санью на востраве Хайнань і Сіань. Кітайская Air China выконвае рэйсы паміж Мінскам і Пекінам двойчы на тыдзень.
Раней у «Белавіі» паведамлялі, што працуюць над пашырэннем сваёй прысутнасці ў Кітаі. Гаворка ідзе не толькі пра павелічэнне колькасці рэйсаў па ўжо наяўных маршрутах, але і пра адкрыццё новых. У прыватнасці, авіякампанія разглядае магчымасць палётаў у правінцыю Гуандун, дзе знаходзяцца гарады Гуанджоў і Шэньджэнь.
Чытайце таксама:
«Белавія» зможа купляць самалёты і запчасткі Boeing
У «Белавія» расказалі, чаму ў авіякампаніі так шмат начных рэйсаў
Чыноўнікі расказалі, калі ў Беларусі адновяць унутраныя авіярэйсы
«Белавія» расказала, у чым складанасць з прамымі рэйсамі на Мальдывы