Naviny haspadarki ad 8 lipienia

«Intehrał» viadzie pieramovy

NPA «Intehrał» raspačaŭ pieramovy pra pastaŭki technalahičnaha abstalavańnia ź niamieckaj firmaj «Sander». Jano patrebna dla realizacyi prajektu «Submikron» pa vytvorčaści intehralnych mikraschiem. Kaštavać prajekt budzie $21 młn, ź jakich $10,5 młn investuje «Intehrał». Mikraschiemy pojduć na patreby biełaruskich i zamiežnych vytvorcaŭ televizaraŭ dy inšaj elektronnaj aparatury.

U pieršaj tysiačy

Brytanski časopis «The Banker» zhadaŭ dva biełaruskich banki ŭ śpisie tysiačy najbolš upłyvovych bankaŭ śvietu. «Biełahraprambank» zaniaŭ u rejtynhu «The Banker» 678 miesca, a «Biełarusbank» — 938-je. U paraŭnańni ź minułym hodam «Biełahraprambank» uźlacieŭ na 107 punktaŭ, a «Biełarusbank» apuściŭsia na 22.

«Biełaja Ruś» bankrutuje

Haspadarčy sud Miensku raspačaŭ spravu pra bankructva dziaržaŭnaj firmy «Biełaja Ruś». Paśla aryštu Haliny Žuraŭkovaj pradpryjemstva ŭziali ŭ abłohu kredytory. Sud pryznačyŭ «achoŭny peryjad» terminam na adzin miesiac, na praciahu jakoha «Biełaja Ruś» moža nie vypłačvać pazyk. Kančatkovaje rašeńnie pra los firmy budzie pryniataje ŭ kancy lipienia.

U Homieli źmienšać staŭku

Homielski abłvykankam prapanavaŭ źmienšyć staŭku adzinaha padatku dla miascovych pradprymalnikaŭ u siarednim na 30%. Arendnaja płata na rynkach Homielščyny ŭžo źmienšana na 16,5%. Praŭda, niezdavalnieńnie pradprymalnikaŭ z pryčyny zaplanavanaha na žnivień pačatku spahnańnia PDV z pryviezienych z Rasiei tavaraŭ nie źnikaje. Prapanovy miascovych uładaŭ naładzić centralizavanyja pastaŭki tavaraŭ z Rasiei padtrymki siarod biznesoŭcaŭ nie znajšli.

Ni na budoŭlu, ni na podyjum

Prava zajmacca pracaŭładkavańniem biełarusaŭ za miažoj atrymała tolki adna firma. Astatnija 29 tak i nia zdoleli atrymać adpaviednych licenzij ad Ministerstva ŭnutranych spraŭ, bo nie zmahli zaklučyć kantrakty niepasredna z zamiežnymi pracadaŭcami. Padobnyja prablemy majuć i madelnyja ahienctvy. Pakul što nivodnaje ź ich nia zdoleła atrymać licenziju na dziejnaść ad Minadukacyi.

Piŭnoje zamireńnie

Brovary «Krynica» i «Bałtyka» padpisali miravoje pahadnieńnie. «Krynica» zhadziłasia vypłacić «Bałtycy» $2,7 młn da kanca hodu. Raniej «Bałtyka» patrabavała 3,5 młn, ale vyrašyła, što lepš atrymać mieniej, čym praciahvać sudovy razbor.

Litva — za eŭra

Litoŭski sojm prahałasavaŭ suprać praviadzieńnia referendumu adnosna ŭviadzieńnia ŭ krainie eŭra. Pytańnie pra referendum uźniała Liberalna-demakratyčnaja partyja, jakaja patrabuje zachavać lit u jakaści nacyjanalnaj valuty. Takim čynam, eŭra zamienić-taki lit 1 studzienia 2007 h., kali rašeńnie budzie ŭchvalena Radaj EZ.

AK, AFN

• 0
• 0
• 0
• 0
• 0
• 0
• 0
• 0