Pryniasicie žmut papiery

Pakul u prybiralni Nacyjanalnaj biblijateki niama tualetnaj papiery, našy dziady mohuć spać spakojna.

Feljeton Alesia Biełaha.

Raptam zaŭvažyŭ, što ŭvosień spoŭnicca 20 hadoŭ, jak ja karystajusia Nacyjanalnaj biblijatekaj. Na paru miesiacaŭ mienš, čym našamu z žonkaj «ramanu». Na 3-m kursie pajšli składanyja kursavyja, i daviałosia šukać knižki, jakich u instytucie nie znajšoŭ. Ale ŭ vieraśni, kali jubilej moh by adznačacca šyrokaj hramadzkaściu, hetaha zrabić nia ŭdasca — biblijateka budzie začyniena na pierajezd. Na hetaj dumcy ja złaviŭ siabie, siedziačy… nie, nie ŭ čytalnaj zali ci katalohu. Maja hłybokaja zadumlivaść była vyklikanaja tym, što — jak by heta dalikatniej — u kabincy nie było tualetnaj papiery. Nie tamu što skončyłasia, a tamu, što nikoli i nie było. Bo «nie pałožana». Ci nie paviešana. Nie było jaje tam i 20 hadoŭ tamu, kali biblijateka była jašče nie Nacyjanalnaj, a Leninskaj. Lenin pajšoŭ, a sprava jaho žyvie. Chočacie pierakanacca? Zajdzicie ŭ prybiralniu luboj hramadzkaj biblijateki abo luboj prestyžnaj dziaržaŭnaj VNU — tualetnaj papiery vy tam nia znojdziecie.

Za 20 hadoŭ biblijateka zaznała šmat pieramien: paŭsiudy ciapier tannyja i dastupnyja kseraksy, navat na samaabsłuhoŭvańni, skaner, laminatar. Zamiž brudnaha, amal pryvakzalnaha bufetu — dosyć prystojnaja piceryja ŭ styli haj-tek. Źjaviŭsia i šapik z kanctavarami — usio jak u narmalnych eŭrapiejskich biblijatekach, jakija tak urazili kaliści svaim kamfortam. Sama biblijateka chutka pierajedzie va ultramaderniscki budynak, jaki kaštavaŭ krainie šalonyja hrošy (złyja jazyki kažuć — dziela taho, kab vyzvalić stary pad słužbu achovy). A papiery jak nie było, tak i niama. Navat ćvika tabie ź nizkaj parezanych na kavałki hazet. I ŭ kijosku z kanctavarami nie pradajuć.

Jak ža sanstancyja? Moža, heta zmova trackistaŭ-škodnikaŭ? Abo tajemny źviaz asabliva kanservatyŭnych etnakulturolahaŭ parupiŭsia: kab nia tracić kančatkova suviazi-poviazi z karaniami-vytokami, kožnaje čarhovaje maładoje pakaleńnie nie pavinna bačyć u prybiralniach tualetnaj papiery. Inicyjacyja! Znak, jaki musić hłyboka ŭjeścisia ŭ padśviadomaść. Bo z takich drobiaziaŭ i pačynajuć ža pradavać Radzimu! Pakul papiery niama i pakul nikomu ŭ hałavu navat nie prychodzić spytacca «Čamu?», našy dziady mohuć spać spakojna. Eŭrapiejskija pany-šavinisty nia projduć, i cyvilizacyjny vektar nia źmienicca. (Cikava, a jak u prybiralni na «Linii Stalina»?).

Treba zabiehčy dniami znoŭ u biblijateku, pakul jana kančatkova nie pačała pierajezd. Paprašu knihu skarhaŭ. Kuplu ŭ šapiku klej-ałovak i ŭkleju tudy vyrazku z hetym artykułam. Hazety ž nia tolki na toje, kab visieć na ćviku.

• 0
• 0
• 0
• 0
• 0
• 0
• 0
• 0