Naviny sportu

Pieršy hoł Hleba

Paŭabaronca zbornaj Biełarusi Alaksandar Hleb zabiŭ pieršy hoł za londanski «Arsenał». Adbyłosia heta ŭ minułyja vychodnyja ŭ kantrolnym matčy z klubam treciaha dyvizijonu «Barnet». «Kananiry» vyjhrali ź likam 4:1. Hleb adkryŭ lik u matčy. Vyznačylisia ŭ pieramožcaŭ taksama «dziady» klubu Tjery Anry i Denis Berhkamp.

7 žniŭnia ŭ Kardyfie (Uelz) «Arsenał» zhulaje za superkubak Anhlii z «Čełsi». Čempijanat anhielskaj premjer-lihi startuje 13 žniŭnia. U pieršym tury londancy 14 žniŭnia doma na stadyjonie «Hajbery» zhulajuć z «Ńjukasłam», a 20 žniŭnia na stadyjonie «Stemfard Brydž» — znoŭ z «Čełsi». Nia vyklučana, što ŭsie pajadynki buduć tranślavać u žyvym etery ŭ mienskich barach i klubach.

Pałova čempijanatu

U aŭtorak skončyŭsia pieršy kruh futbolnaha čempijanatu Biełarusi ŭ vyšejšaj lizie. «Letnim» čempijonam staŭ salihorski «Šachtar»: u hadavancaŭ Jurja Viarhiejčyka 31 bał. Druhoje miesca ŭ mahiloŭskaha «Dniapra-Transmašu» (24 bały). U zapisnych aŭtsajderach chodziać dvuchrazovy čempijon Biełarusi mazyrskaja «Słavija» (9 bałaŭ) i mienskaja «Zorka-VA-BDU» (2 bały). Druhi kruh startuje 30 lipienia i zavieršyć bieh 5 listapada.

Ci pajedzie Chackievič u Škocyju

Eks-paŭabaronca zbornaj Biełarusi i kijeŭskaha «Dynama» Alaksandar Chackievič zhulaŭ za šatlandzki «Charts» u kantrolnym matčy i, mahčyma, padpiša kantrakt. Praŭda, kab bieśpieraškodna atrymać pracoŭnuju vizu na brytanskich vyspach, treba mieć 75 adsotkaŭ matčaŭ, praviedzienych za nacyjanalnuju zbornuju ciaham apošnich dvuch hadoŭ. A tut u Chackieviča prablemy. Tamu pytańnie budzie razhladacca asobna.

Ź lutaha Alaksandar vystupaŭ za łatvijski «Ventśpiłz», ale praź finansavyja ciažkaści pakinuŭ klub. Nahadajem, što «Charts» razam ź mienskim MTZ-RIPA i «Kaŭnasam» utvarajuć chołdynh litoŭskaha biznesoŭca Ŭładzimiera Ramanava.

Biełarusy — dziasiatyja

Paśla matčaŭ 1/4 finału tenisnaha Kubku Devisa, što prajšli ŭ minułyja vychodnyja, vydrukavany novy rejtynh-list zbornych. Biełarusy, jakija nie pravodzili hulniaŭ, pasunulisia z vośmaha na dziasiataje miesca. Pieršaje miesca ŭ zbornaj Hišpanii.

23—25 vieraśnia zbornaja Biełarusi zhulaje sa zbornaj Kanady matč płej-of za prava vychadu ŭ Asnoŭnuju hrupu Kubku Devisa, tak zvanuju 1/8 finału. Matčy projduć u samym biełaruskim horadzie Krainy klanovaha lista — Taronta.

Alaksandraŭ — pieramožca

18 lipienia ŭ Miensku zavieršyŭsia mižnarodny šachmatny turnir «Inaŭtamarkiet-oŭpen» — Adkryty čempijanat Miensku. Pieramožcam staŭ biełaruski hrosmajstar Alaksiej Alaksandraŭ, što nabraŭ 7,5 bała ŭ dzieviaci turach. Usiaho ŭ turniry brali ŭdzieł 156 šachmatystaŭ z vaśmi krain.

AR, belapan.com, football.by

• 0
• 0
• 0
• 0
• 0
• 0
• 0
• 0