Amerykancy planujuć dastavić u Irak eksperymentalnuju biaskroŭnuju zbroju dla ŭtajmavańnia biesparadkaŭ. Mataryzavanyja mikrachvalamioty robiać na ludziej takoje ž uździejańnie, jak kuchonnaja ZVČ-pieč na kurania, što zapiakajecca ŭ joj. Namier abudziŭ sprečki.
Mikrachvalevaja zbroja — heta adna ź niekalkich raznavidnaściaŭ zbroi novaha pakaleńnia, na mecie jakoj neŭtralizavać praciŭnika, nie nanosiačy jamu tryvałaj škody. Takija vajennyja technalohii mahli b prymianiacca, siarod inšaha, u sutyknieńniach z ahresiŭnym natoŭpam, kali vadamioty ci humovyja kuli akazvajucca niedastatkova efektyŭnymi, a ŭžyvańnie paŭnacennaj zbroi niepažadanaje z humanistyčnaha punktu hledžańnia.
Raboty nad raspracoŭkaj mikrachvalamiotaŭ (tak zvanaj «systemy aktyŭnaha adporu» — «Active Denial System», ADS) viaducca ŭ ZŠA šmat hadoŭ i jakraz padychodziać da zakančeńnia. Pavodle źviestak internet-servisu «Globalsecurity.org», na hetyja raboty było patračana pad 40 młn dalaraŭ. Užo apublikavany vyniki dvuchhadovych eksperymentaŭ, što pravodzilisia na bazie pavietranych sił u štacie Ńju-Meksyka. Zbroja vypramieńvaje pučki ZVČ-chvalaŭ častatoj 95 hihaherc. Navat na adlehłaści ŭ niekalki sotniaŭ metraŭ takoje vypramieńvańnie ŭzbudžaje vahańni malekuł vady pad skuraj čałavieka, što pryvodzić da ŭtvareńnia ciapła. Apošnija dośledy na ludziach pakazali, što asoby, na jakich trapiŭ pučok, užo praź dźvie sekundy adčuvajuć piakučy bol. Mienš čym praź piać sekundaŭ bol stanovicca niemahčyma tryvać, i atakavany zrobić usio, kab uciačy z pola paražeńnia. Paśla hetaha bol prachodzić biaź śledu i jakich-niebudź paškodžańniaŭ.
Raspačać vytvorčaść mikrachvalamiotaŭ, zmantavanych na vajskovym ciahaču «Chamvej», užo hatovy amerykanski VPK. Jak napisaŭ niekalki tydniaŭ tamu brytanski navukovy štotydniovik «Ńju saentyst», plany Ministerstva abarony ZŠA praduhledžvajuć, što ŭ nastupnym hodzie bajavyja mašyny ź mikrachvalamiotami (pad nazvaj «Šeryf») trapiać u Irak. Vajskoŭcy ličać, što dziakujučy novaj zbroi amerykanskaja armija i irackija siły biaśpieki zdolejuć bolš paśpiachova, čym siońnia, — i biaskroŭna — zamirać biesparadki. Praciahvajucca taksama raboty nad raznavidnaściu zbroi, pryznačanaj dla ŭžyvańnia z pavietra.
Niekatoryja vučonyja vykazvajuć, adnak, sumnieńni. Jany ličać, što zbroja pakul niedastatkova pravieranaja, kab užyvać jaje suprać ludziej. Jany źviartajuć uvahu, siarod inšaha, na toje, što na palihonie dobraachvotnikam, jakija vykonvali rolu demanstrantaŭ, zabaraniałasia nasić akulary, kantaktnyja linzy i navat mieć metaličnyja huziki dy zaściežki «małanka». Usio heta dla taho, kab praduchilić pahrozu traŭmaŭ.
Cytavany ŭ «Ńju saentyst» Nejł Devidsan, specyjalist pa biaskroŭnaj zbroi z Bredfardzkaha ŭniversytetu (Brytanija), ličyć, što ŭ realnych sytuacyjach vielmi ciažka budzie kantralavać, jakuju dozu ZVČ-chvalaŭ atrymaje kožny čałaviek. A pieravyšeńnie miažy biaśpieki moža chutka prynieści fatalnyja vyniki. Padčas eksperymentaŭ adzin z dobraachvotnikaŭ atrymaŭ apiok, kali prystasavańnie vypadkova vydała zanadta vialikuju mahutnaść. «Što budzie z čałaviekam, jaki ź niejkich pryčyn nia zdoleje chutka ŭciačy i nadoŭha zastaniecca ŭ zonie dziejańnia mikrachvalaŭ?» — pytaje Devidsan.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary