Chejtarskija akaŭnty aŭtobusaŭ — novy trend biełaruskich zumieraŭ
Biełarusy praciahvajuć masava skardzicca na pracu hramadskaha transpartu ŭ roznych haradach krainy. Niahledziačy na elektronnyja tabło, raskłady i abiacańni pieravozčykaŭ, štodzionnyja pajezdki dla mnohich zastajucca krynicaj stresu i razdražnieńnia. Moładź padychodzić da prablemy kreatyŭna — jana stvaraje chejtarskija akaŭnty, dzie pakazvaje spaźnieńni i pavolnuju pracu aŭtobusaŭ, zaŭvažyła BGmedia.
Pasažyry adznačajuć adrazu niekalki chraničnych prablem: aŭtobusy i tralejbusy rehularna spaźniajucca abo, naadvarot, pryjazdžajuć raniej za paznačany čas, transpart pierapoŭnieny nastolki, što ŭ sałon fizična niemahčyma zajści, a stan samich mašyn vymušaje žadać lepšaha.
Da hetych skarhaŭ usio čaściej dałučajecca moładź — pradstaŭniki pakaleńnia Z. Zamiest zvykłych zvarotaŭ u kiraŭnictva aŭtobusnych parkaŭ abo kamientaroŭ u čatach jany vybrali bolš aryhinalny sposab vyrašeńnia prablemy — stvareńnie tak zvanych chejtarskich akaŭntaŭ u tyktoku.
U karotkich rolikach zumiery adkryta, ź ironijaj i niecenzurnaj leksikaj dzielacca svaim abureńniem, zdymajučy kankretnyja aŭtobusy, jakija ich nie zadavalniajuć. Takija videa chutka nabirajuć tysiačy prahladaŭ i sotni kamientaroŭ.
U biełaruskim siehmiencie tyktoka ŭžo źjavilisia chejtarskija akaŭnty, pryśviečanyja aŭtobusam Hrodna i Mazyra. Pad škvał krytyki taksama trapiŭ hramadski transpart Homiela i Viciebska.
U Hrodnie najbolš niehatyŭnych vodhukaŭ atrymali aŭtobusy № 1, 13, 16, i 20. Haradžanie narakajuć, što transpart ruchajecca zanadta marudna, nie vykonvaje hrafik i moža źjavicca na prypynku kali zaŭhodna. Asabliva šmat abureńnia vyklikaje 13‑ty maršrut, jaki, pavodle pasažyraŭ, pastajanna parušaje raskład i «ciahniecca» biez bačnaj pryčyny.
Pra 16‑ty aŭtobus ludzi pišuć z sarkazmam, nazyvajučy jaho nadta «fiłasofskim» i «miedytatyŭnym» — nastolki pavolna jon ruchajecca. Aŭtobus № 1 vyklikaŭ krytyku nie tolki z-za chutkaści, ale i praz pavodziny kiroŭcy: śćviardžajecca, što jon pakinuŭ pasažyraŭ na prypynku dziela asabistych spraŭ.
Nie zastalisia biez uvahi i tralejbusy. Maršrut № 6 abvinavačvajuć u tym, što jon prosta nie pryjazdžaje ŭ pryznačany čas, pakidajučy ludziej čakać na choładzie. A voś tralejbus № 9 niečakana atrymaŭ «pachvału» — ale chutčej iraničnuju, bo jaho svoječasovy pryjezd uspryniali jak niešta vyklučnaje.
U Mazyry hałoŭnymi abjektami krytyki stali aŭtobusy № 19 i № 23. Pra 19‑ty maršrut kažuć koratka: jon amal zaŭsiody spaźniajecca. A 23‑ci vyklikaje značna bolš pretenzij — ad chaatyčnaha ruchu da drennaha techničnaha stanu. Pasažyry skardziacca na znošanyja sałony, nadpisy na ścienach, prablemy ź dźviaryma i navat vypadki, kali aŭtobus jedzie ź imi napaŭadčynienymi.
U Homieli ŭvahu pasažyraŭ pryciahnuŭ aŭtobus № 18. Jon viadomy pastajannymi spaźnieńniami, tamu navat nievialikaje adchileńnie ad hrafika ŭsprymajecca jak niečakany pośpiech.
U Viciebsku ž žarty vyklikała situacyja z aŭtobusami № 14 i № 23. Pavodle pasažyraŭ, 14‑ty maršrut rehularna pryjazdžaje raniej i «zabiraje» ludziej u 23-ha, što stała padstavaj dla iraničnych videa pra «baraćbu za pasažyraŭ».
Dziela spraviadlivaści varta adznačyć: u Biełarusi isnujuć i fan-akaŭnty hramadskaha transpartu. Naprykład, u Hrodnie pasažyry chvalili tralejbus № 23 i inšyja maršruty, jakija, pa ich słovach, «nikoli nie spaźniajucca». Adnak takija videa źbirajuć značna mienš prahladaŭ i reakcyj.
U Minsku kiroŭca aŭtobusa nie puściŭ u sałon žančynu z sabakam. Ci maje jon racyju?
«Nikoli nie byŭ suprać svabodnaha vybaru čałavieka». Łukašenka źmiakčyŭ pazicyju adnosna maršrutak
«Heta łaminat ci linoleum?» Što ludzi pišuć pra biełaruski mikraaŭtobus biznes-kłasa
Kiraŭnik bresckaha aŭtobusnaha parka raskazaŭ pra zarobki da 6000 rubloŭ. A kiroŭca kaža, što ŭsie pajechali ŭ Polšču z-za nizkich zarobkaŭ
Kamientary
I jakim čynam stvareńnie takich akaŭntaŭ vyrašajuć prablemy?