Chronika

Zvarot da časovaha pavieranaha ŭ spravach Niamieččyny ŭ Biełarusi Jana Kantorčyka z prapanovaj, kab biełaruskaja prahrama «Niamieckaj chvali» vychodziła nie pa-rasiejsku, a pa-biełarusku, padpisali:

V.Ramancevič, Uładzisłaŭ Žyhałka, Ludmiła Lićvinava, Vasil Pietranievič, Faja Pietranievič, Z.Kryvašejeŭ, T.Siemianienka, V.Aleksandrovič, A.Dundukoŭ, Ju.Dołbik, Marat Haravy, Siarhiej Haravy, Tamara Haravaja, Śviatłana Repič, Jury Vieltnier, Navum Cypis, Halina Lemiešava, Valeryja Ivanova, Jaŭhienija Vołkava, Kaciaryna Biarezina, Volha Łocmanava.

Zvarot adkryty da padpisańnia. Śpisy padpisantaŭ buduć nadrukavanyja.

Śpis biełarusaŭ ZŠA, jakija vykazali svoj pratest suprać rašeńnia radyjostancyi «Niamieckaja chvala» ab viaščańni na Biełaruś nie pa-biełarusku:

Anton Šukiełojć, Vitaŭt Kipiel, Barys Daniluk, Maryja Daniluk, Viačka Stankievič, Vital Zajka, Alesia Siomucha, Lina Siomucha, Mark Hrynbierh, Robert Pahoŭski, Valancina Jakimovič, Rusłan Małachoŭski, Śviatłana Hładun, Doraci Charlej, Ryma Palikarpava, Vasil Kuźmienka, Aleś Vinahradaŭ, Uładzimier Vołach, Natalla Taŭkačova.

Śpis dasłaŭ Vital Zajka

▶

Šanoŭnyja kalehi,

dazvolcie ŭsioj majoj žurnalicckaj siamji rašuča i rezka dałučyć svoj hołas da Zvarotu z nahody «moŭnaj prablemy» na «Niamieckaj chvali». Zrazumieła, što movaj pieradačy z Bonu ci Berlina dla biełaruskaj aŭdytoryi moža być tolki i vyklučna MOVA BIEŁARUSKAJA. Kali, zrazumieła, u hetaj radyjostancyi — praź źviazku Šroder—Pucin — niama nakont hetaha jakoj inšaj damovy, schavanaj ad hramadzkaści. Našaje hramadztva, na žal, i demakratyčnaje ŭ tym liku, zanadta šmat — biazdumna i biezadkazna — sastupiła ŭ moŭnym pytańni nia tolki voraham i nienaviśnikam Biełarusi, ale i, jak heta padavałasia, «prahmatykam»… Žyćciovy vynik takoj «prahmatyki» my bačym navokał. Tamu vierniemsia ŭ svaim nastroi da 90-ch. Pačniom nanova Adradžeńnie i pačniom jaho z taho, z čaho tolki i musić jano pačynacca — z movy, jakoj tak niedaravalna zdradzili. Moža, jana nam jašče daruje heta, jašče raz… nia bolej.

Takim čynam, mova biełaruskaj pieradačy na «Niamieckaj chvali» — heta zusim nie drabiaza. Heta nia ichniaje pytańnie, a — našaje!

Z pavahaj,

žurnalist, siabar Rady BAŽ, były redaktar «Tydniovika Mahiloŭskaha» Hienadź Sudnik, volny žurnalist Viktar Sudnik (moj syn), techničnaja supracoŭnica redakcyi «Tydniovika Mahiloŭskaha», šmathadovaja čytalnica «Našaj nivy» Nina Sudnik (maja žonka).

∎

Kłaskoŭskaja vyjechała

Žurnalistka «Narodnaj voli», studentka-zavočnica žurfaku BDU Volha Kłaskoŭskaja ŭ siaredzinie žniŭnia paprasiła palityčnaha prytułku ŭ Polščy. Joj pahražali vyklučeńniem z BDU.

Śledztva ŭ spravie Čarkasavaj

Prakuratura padoŭžyła termin śledztva ŭ spravie pra zabojstva žurnalistki Vieraniki Čarkasavaj. Papiaredni termin skončyŭsia 21 žniŭnia. Termin praciahu nieviadomy. Vynikaŭ śledztva pakul nijakich.

Borys dapytali

Kiraŭnicu Sajuzu palakaŭ Anžaliku Borys 22 žniŭnia dapytali ŭ śledčym adździele RAUS Leninskaha rajonu Horadni. Śledčaha Ihara Čarniaka cikaviła, dzie była Borys unačy z 6 na 7 studzienia, kali spalili mašynu byłoha kiraŭnika SPB T.Kručkoŭskaha.

«Dieńpriess» likvidavali

Mienharvykankam 4 lipienia likvidavaŭ TDA «Dieńpriess», jakoje vydavała niedziaržaŭnuju hazetu «Dień». Padstava — nieažyćciaŭleńnie pradprymalnickaj dziejnaści na praciahu šaści miesiacaŭ zapar i nienakiravańnie kamercyjnaj arhanizacyjaj padatkovamu orhanu paviedamleńnia ab pryčynach nieažyćciaŭleńnia takoj dziejnaści». Pra likvidacyju dyrektar TDA Mikoła Markievič daviedaŭsia 19 žniŭnia ad supracoŭnikaŭ padatkovaj inspekcyi. Markievič asprečvaje: zatrymany numar hazety byŭ vypuščany 26 traŭnia.

Zablakavali sajt «MF»

Internet-staronku niezarehistravanaj arhanizacyi «Małady front» (http://www.mfront.net/) 15 žniŭnia zablakavali nieviadomyja.

Sprava Pahaniajły

Prakuratura Miensku 17 žniŭnia paviedamiła advakatu Hary Pahaniajłu, što raśśledavańnie jahonaj kryminalnaj spravy padoŭžana jašče na adzin miesiac. Parvaabaroncu vinavaciać u paklopie na prezydenta.

Prakuratura j KDB suprać multfilmaŭ

17 žniŭnia siabroŭ hramadzianskaj inicyjatyvy «Treci šlach» vyklikali na dopyt u KDB: pakul što jany prachodziać jak śviedki pa kryminalnaj spravie ŭ abrazie prezydenta.

Pačobut asprečvaje zabaronu na vyjezd

Hałoŭny redaktar časopisu «Magazyn Polski» Andrej Pačobut 18 žniŭnia padaŭ skarhu ŭ Haradzienski abłsud. Jon pratestuje suprać rašeńnia sudu Leninskaha rajonu Horadni ad 27 lipienia, jakoje zabaraniaje jamu vyjezd za miažu. Zabarona nakładziena, bo Pačobut nie zapłaciŭ štraf za ŭdzieł u akcyi ŭ abaronu hazety «Gios znad Niemna», eksprapryjavanaj haradzienskimi ŭładami.

Amnistyja dla Maryniča

Palitviaźniu Michaiłu Maryniču 18 žniŭnia skaracili termin źniavoleńnia na adzin hod u adpaviednaści z amnistyjaj da 60-hodździa pieramohi ŭ Druhoj suśvietnaj vajnie. Paśla amnistyi Maryniču daviadziecca siadzieć za kratami jašče hod.

Prychilniki Kručkoŭskaha non-hrata

Polskija ŭłady zabaranili ŭjezd na svaju terytoryju 13 siabram Rady V sklikańnia Sajuzu palakaŭ, jakija pryniali rašeńnie pra padrychtoŭku paŭtornaha źjezdu arhanizacyi. Takuju infarmacyju maje Andrej Pačobut. Inšyja krynicy jaje pakul nie paćvierdzili.

Udziełu ŭ pieraźjeździe SPB, sklikanym łukašystami, vyrašyli nia brać arhanizacyi SPB u Navahradku, Vaŭkavysku, Sapockinie, Zabałaci j niekatorych inšych pasieliščach. Hetuju infarmacyju taksama pašyryŭ Andrej Pačobut.

Pamiežny režym u Łojevie

U Łojevie milicyjanty 18 žniŭnia zatrymali za «parušeńnie pamiežnaha režymu» kiraŭnikoŭ homielskich abłasnych filijałaŭ AHP Uładzimiera Kacoru i PKB Uładzimiera Siakierku. Zatrymańniem kiravaŭ načalnik rajadździełu major Chmielanok. Partyjnych aktyvistaŭ zatrymali, nie zvažajučy na najaŭnaść u ich kamandzirovačnych paśviedčańniaŭ.

Kalvinistaŭ likvidavali

19 žniŭnia Mienski haradzki sud likvidavaŭ Chryścijanskuju relihijnuju kanhrehacyju «Biełaruski evanhieličny refarmacki zbor» praz adsutnaść jurydyčnaha adrasu. Pastar Leanid Lipień kaža, što admysłova nie źviartaŭsia pa juradras: pa-pieršaje, u kalvinistaŭ niama hrošaj na arendu pamiaškańnia, pa-druhoje, jany ličać niedemakratyčnym Zakon «Ab svabodzie sumleńnia i relihijnych arhanizacyjach». Kalvinisty vymahajuć viartańnia im cerkvaŭ, jakija histaryčna imi budavalisia.

Žurnalistam nie dajuć infarmacyi

Supracoŭnikam baranavickaj niedziaržaŭnaj hazety «Intex-press» miascovyja čynoŭniki admaŭlajuć u infarmacyi. Namieśnica načalnika KUREP «ŽREU» pa idealahičnaj rabocie Volha Kudłasievič 26 lipienia admoviłasia adkazvać niaštatnaj aŭtarcy Ludmile Hurman na pytańni nakont zboru śmiećcia j padrychtoŭki da aciaplalnaha sezonu: infarmacyju, maŭlaŭ, možna davać tolki z dazvołu adździełu idealohii Baranavickaha harvykankamu. 2 žniŭnia zahadčyca hetaha adździełu Taciana Žydko zajaviła, što KUREP «ŽREU» nie vałodaje takoj infarmacyjaj.

Karespandentcy Aksanie Lańko, jakaja miełasia pisać pra rabotnikaŭ handlu, uznaharodžanych hramatami j padziakami, 1 žniŭnia admoviłasia davać infarmacyju načalnica ŭpraŭleńnia handlu Valancina Machovik.

Skrabiec u špitali

Palitviaźnia Siarhieja Skrabca 19 žniŭnia pieravieźli ŭ turemny špital. Pieraviezienaha ŭ Miensk paśla 40-dzionnaj haładoŭki eks-deputata dahetul trymali ŭ śledčym izalatary na vuł.Vaładarskaha.

Sarvany schod u Jelsku

Pryznačany na 21 žniŭnia schod pa vybrańni delehataŭ na Kanhres demsiłaŭ u Jelsku (Homielščyna) nie adbyŭsia. Milicyjanty blakavali dom, dzie mieŭsia adbycca schod, adklučyli telefonnuju suviaź i spyniali ŭsich, chto išoŭ da domu. Na try hadziny zatrymali kiroŭcu pryvatnaha mikraaŭtobusa Ŭładzimiera Šycikava, jaki pryvioz na schod rehijanalnych kaardynataraŭ U.Kacoru i Andreja Tołčyna. Samich kaardynataraŭ paśla pravierki pašpartoŭ adpuścili.

Štraf na miljon

Siabroŭka sacyjał-demakratyčnaj «Hramady», deputatka Biełaazierskaha harsavietu Natalla Akaronka aštrafavanaja na 40 bazavych vieličyń (1 młn 20 tys. rub.) za parušeńnie «vyznačanaha paradku arhanizacyi schodaŭ». Sud Bieraściejskaha rajonu vynies takoje rašeńnie 10 žniŭnia ŭ adsutnaść samoj abvinavačvanaj. Pra sutnaść parušeńnia ŭ pastanovie nie havorycca ni słova. Sudździa N.Siańko vysłała pastanovu ź Bieraścia ŭ Biełaaziersk poštaj.

U animataraŭ zabrali pašparty

U raspaŭsiudnika fłeš-multfilmaŭ, siabra hramadzianskaj inicyjatyvy «Treci šlach» Aleha Miniča i jahonaj žonki Haliny z Horadni śledčy zabraŭ pašparty. Kaardynatar sajtu «Treci šlach» Pavał Marozaŭ źviarnuŭsia pa dapamohu ŭ RHA «Biełaruski Chelsynski kamitet».

List Statkieviču

List padtrymki ad kiraŭnika Sacyjał-demakratyčnaj partyi Niamieččyny Franca Miunteferynha atrymaŭ 22 žniŭnia palitviazień Mikoła Statkievič.

AŠ

• 0
• 0
• 0
• 0
• 0
• 0
• 0
• 0