BATE — «Kryły Savietaŭ» 0:2 (0:2), «Cieplice» — MTZ-RIPO 2:1 (1:1). Repartaž z barysaŭskaha matču Aleha Rajaŭca.
Šancy trapić u asnoŭnuju sietku Kubku UEFA ŭ biełarusaŭ byli. Pierad matčami ŭ adkaz 25 žniŭnia ich było bolej u mienskaha MTZ-RIPA. Na BATE spadzievaŭ było mieniej. Tut dadavałasia niaŭpeŭnienaja hulnia ŭ sioletnim čempijanacie, a taksama paraza ŭ pieršym matčy ŭ Samary z «Kryłami Savietaŭ» 0:2. Kab prajści ŭ nastupny raŭnd, barysaŭcy musili zabić try miačy, nie prapuściŭšy nivodnaha. Zadača z sfery fantastyki. Prostaja pieramoha nad rasiejcami dadała b paru bałaŭ u ahulny kaeficyjent biełaruskich klubaŭ na eŭrapiejskaj arenie.
Matč pačaŭsia a 21-j pa prośbie haściej. A 19-j picierski «Zenit» hulaŭ z aŭstryjskim «Superfundam», i maskoŭskim televizijnikam karcieła pakazać abodva matčy.
Za BATE chvarejuć nia tolki ŭ Barysavie. Pa darozie my dahaniali mikraaŭtobusy ź mienskimi j žodzinskimi zaŭziatarami.
Za «Kryły Savietaŭ» ža pryjechali pachvareć zaŭziatary nia tolki z Samary j Maskvy, ale navat z Ukrainy i Litvy. Usiaho kala 200 čałaviek, u dziesiać razoŭ bolej, čym biełarusaŭ na matčy na bierahach Vołhi dva tydni tamu.
Utulny barysaŭski stadyjon byŭ całkam zapoŭnieny (5500 hledačoŭ). Usio było zroblena pad haściej. Navat zamiest biełaruskich piesień pierad matčam tranślavali «Tiečiet rieka Vołha».
Apošniaja nadzieja na pazytyŭny vynik u hulni źnikła z pačatkam matču. Samarcy adrazu kinulisia ŭ ataku i za pieršyja čatyry chviliny sustrečy paśpieli padać ažno try kutnija ŭdary. Na 5-j chvilinie kropku ŭ biełaruska-rasiejskaj dueli pastaviŭ forvard vałžanaŭ i biełaruskaj nacyjanalnaj zbornaj Vital Bułyha, zabiŭšy hoł-pryhažun u levy vierchni ad kipera BATE Fiedaroviča kut. Dzie ty, Vitala, byŭ u matčach z Słavienijaj i Šatlandyjaj, kali miač uparta paśla sustrečaŭ z taboj nia lez u varožyja varoty?
Zrešty, nijakaj varožaści z boku barysaŭskich zaŭziataraŭ da Bułyhi nie nazirałasia. Kali jaho na 66-j chvilinie zamianili na Amary Tetradze, hledačy pravodzili biełarusa apladysmentami. Za «Kryły» zhulali taksama biełarusy Alaksiej Skviarniuk i Dzianis Koŭba.
Biełarusy aktyvizavalisia chiba ŭ druhoj pałovie pieršaha tajmu — praviali niekalki atak i navat zabili hoł, adnak miač nia byŭ zaličany — sudździa zafiksavaŭ napad na bramnika «Kryłaŭ» brazylca Łobasa. Skrasiŭ zmročny nastroj trybunaŭ hanski forvard haściej, eks-hulec mienskaha «Dynama» Baba Adamu, što nia raz pramachvaŭsia z najvyhodniejšych pazycyj. A pad kaniec pieršaha tajmu jon, znachodziačysia na varatarskaj linii, pramachnuŭsia pa miačy i ŭpaŭ. Pabiŭsia kolki chvilin u kanvulsijach — i padniaŭsia. U nas nia Afryka, možna i prastudzicca.
Na paślamatčavaj pres-kanferencyi trener samarcaŭ Hadžy Hadžyjeŭ kanstatavaŭ, što z afrykancam buduć pracavać dalej, majsterstva jamu vidavočna brakuje.
U pierapynku stadyjonny dy-džej pasprabavaŭ zavieści publiku: «Jašče krychu — i pieramoha budzie za nami». Ale dla biełarusaŭ znoŭ nieščaślivaj akazałasia 5-ja chvilina, hetym razam druhoha tajmu, kali «Kryły» zabili druhi miač. Biełaruskija trybuny prycichli, i z hetaha času hledačoŭ kudy bolš cikaviła, chto lepš puskaje «chvalu» — zachodniaja ci ŭschodniaja trybuny. Potym heta nadakučyła, i za piatnaccać chvilin da kanca sustrečy pačaŭsia masavy adtok hledačoŭ. Hladzieć nie było na što. Bolšaść udaraŭ barysaŭcaŭ nanosiłasia z-za miežaŭ štrafnoj, a forvardy BATE nadta ŭžo nieachvotna pierasoŭvalisia pa poli.
«Chutki hoł faktyčna vyrašyŭ chadu hulni. Niekatoryja našy hulcy prosta prysutničali na poli».
Na šlachu ŭ cyvilizavanuju Eŭropu nas abhaniajuć nia tolki zachodnija susiedzi, ale i ŭschodni. Rasiejskija karespandenty pryjechali z noŭtbukami, kab pieradać repartaž u nastupny, piatničny numar, a adzin z samarskich žurnalistaŭ vioŭ žyvuju tranślacyju na tamtejšaje FM-radyjo pa mabilnym telefonie. U biełaruskaj spartovaj štodzionnaj presie repartaž pra matč źjaviŭsia tolki na piaty dzień, u aŭtorak. I prablema tut nia stolki ŭ žurnalistach, kolki ŭ manapolii ajčynnych drukaroŭ.
Tamu mianie nie ździviŭ repartaž ab matčy ŭ aŭtarytetnaj rasiejskaj hazecie «Sport-Ekspriess», karespandent jakoj paraŭnaŭ vizyt u Biełaruś ź viartańniem u minułaje: «Pabyvaŭšy ŭ Biełarusi, vielmi ciažka abyścisia biez matyvaŭ retra. Adnyja paviazki «družyńnik» čaho vartyja... Ci absalutnaja adsutnaść atrybutyki ŭ miascovaj kamandy. Pavodle suvorych biełaruskich zakonaŭ, kab vypuskać prahramki na prodaž, klub musić nabyć darahuju licenziju, što robić hety biznes niavyhadnym. U vyniku prahramki vydali stroha pa adnoj tolki žurnalistam, futbalistam i VIP-haściam».
Ale hałoŭnaje — roźnica ŭ klasie. Tyja ž «Kryły» ničoha zvyšnaturalnaha ŭ Barysavie nie prademanstravali. Praź finansavyja ciažkaści i źmienu prezydenta klubu kamandu pakinuła dziesiać viadučych futbalistaŭ, zamiest ich nabrana moładź, a «Kryły» ŭ čempijanacie Rasiei skacilisia na 13-je miesca. BATE ž — adzin z najlepšych biełaruskich klubaŭ, jon nivodnaha razu nie apuskaŭsia nižej za treciaje miesca. Ale prajhrali pa ŭsich artykułach. Toj ža «Sport-ekspriess» vielmi trapna acharaktaryzavaŭ moc biełaruskaha futbołu, zaŭvažyŭšy, što BATE pryjšłosia b ciažka navat u pieršaj — nie vyšejšaj — lizie rasiejskaha čempijanatu.
U nastupnym raŭndzie Kubku UEFA «Kryły Savietaŭ» sustrenucca z halandzkim AZ, što letaś ździviŭ usich, vybiŭšysia ŭ paŭfinał Kubku UEFA. Česki «Cieplice» trapiŭ na katalunski «Espańjoł». Kluby z Alkmaaru i Barselony mahli b pryjechać i ŭ Biełaruś, ale pakul naša dola — kipryjoty i hruziny ŭ kvalifikacyjnych raŭndach.
Kamientary