Adna z paciarpiełych pry vybuchu na Łyntupskim śpirtzavodzie pamierła, paviedamiŭ hałoŭny doktar Pastaŭskaj centralnaj rajonnaj balnicy Uładzimir Čekavy.
Niesumiaščalnyja z žyćciom traŭmy atrymała žančyna 1986 hoda naradžeńnia, jakaja praź niekalki hadzin paśla dastaŭki ŭ špital pamierła.
Stan jašče adnoj paciarpiełaj 1964 hoda naradžeńnia, jakaja znachodzicca ŭ reanimacyi z zakrytaj čerapna-mazhavoj traŭmaj i udaram hałaŭnoha mozhu, aceńvajecca jak stabilny. Jana ahledžana niejrachirurham, jaki prybyŭ u składzie bryhady lekaraŭ z abłasnoha centra. Jaje žyćcio pa-za niebiaśpiekaj, adznačyŭ Uładzimir Čekavy.
Dvoje inšych paciarpiełych - žančyna 1990 hoda naradžeńnia i mužčyna 1980 hoda naradžeńnia - z traŭmami lohkaj stupieni ciažkaści (apiokami) znachodziacca ŭ chirurhičnym adździaleńni. Bližejšy čas im pryjdziecca pravieści ŭ ścienach lakarni.
***
Na Łyntupskim śpirtzavodzie ŭ Pastaŭskim rajonie 27 sakavika adbyŭsia vybuch.
Paviedamleńnie ŭ MNS pastupiła ŭ 14:12. Pa prybyćci da miesca vykliku padraździaleńniaŭ MNS nazirałasia hareńnie na pieršym paviersie ŭnutry piacipaviarchovaha žalezabietonnaha budynka.
U cechu pamieram 30×30 m pa rektyfikacyi śpirtu adbyŭsia vybuch mietaličnaj jomistaści (2 kub.m)ź sivušnym śpirtam z nastupnym hareńniem praduktu na płoščy 8 kvadratnych mietraŭ. Technałahičnaje abstalavańnie — 3 kałony i 4 jomistaści sa śpirtam — nie paškodžana.
U vyniku vybuchu traŭmy roznaj stupieni ciažkaści atrymali try žančyny (1990, 1964 i 1986 hoda naradžeńnia) i mužčyna 1980 hoda naradžeńnia.Bryhadami chutkaj miedycynskaj dapamohi jany dastaŭleny ŭ Pastaŭskuju centralnuju rajonnuju balnicu.
U cechu paškodžana jomistaść ź sivušnym śpirtam, vybityja šyby, paškodžanyja leśvicy.
Kamientary