U Hiermanii zatrymali deputata ad AdH, na palach jakoha pad Lidaj pracavali viaźni
Deputata ad partyi «Alternatyva dla Hiermanii» Jorha Dornaŭ zatrymali siońnia padčas pasiadžeńnia miascovaha parłamienta ŭ Saksonii. Palicyjanty adviali jaho ŭ asobnaje pamiaškańnie dla dopytu. U jahonym ofisie ŭ łandtahu adbyŭsia pieratrus, paviedamlaje Bild.
Takoha pačatku pasiadžeńnia łandtaha jašče nie było, piša vydańnie. Supracoŭniki palicyi zatrymali 56‑hadovaha deputata ad AdH Jorha Dornaŭ. Pavodle infarmacyi BILD, śledčyja adviali palityka ŭ asobnaje pamiaškańnie dla dopytu. Paralelna prajšli pieratrusy ŭ jaho žyłych i kamiercyjnych pamiaškańniach, a taksama ŭ aŭtamabilach pad Lejpcyham.
Palityka, jaki daŭno viadomy svaimi ciesnymi suviaziami z režymam Łukašenki, vyvieli z zały pasiadžeńniaŭ adrazu paśla taho, jak kalehi pazbavili jaho deputackaj niedatykalnaści. Jaho vinavaciać u abychodzie sankcyj, a cieniem na jahonuju reputacyju kładucca źviestki pra vykarystańnie pracy palitviaźniaŭ na biełaruskich palach.
Sutnaść abvinavačvańniaŭ prakuratury Lejpcyha zaklučajecca ŭ parušeńni zakona ab źniešnieekanamičnaj dziejnaści. Pavodle śledstva, u 2022 hodzie Dornaŭ sprabavaŭ abyści zabaronu na pastaŭki techniki ŭ Biełaruś. Jon aformiŭ dakumienty na ekspart teleskapičnaha pahruzčyka ŭ Kazachstan, ale nasamreč mašyna adpraviłasia ŭ Biełaruś.
Dornaŭ — fihura dla Saksonii adyjoznaja praź jahony biznes «Cybulka-Bieł». Heta vielizarnaja haspadarka na 1000 hiektaraŭ u Biełarusi, dzie vyroščvajuć cybulu. Raniej partał reform.news paviedamlaŭ, što na palach niamieckaha deputata mahli pracavać biełaruskija palitviaźni, jakich tudy adpraŭlali ź miascovych izalataraŭ. Sam palityk hetyja zakidy nijak nie kamientavaŭ.
Kamientary