Učora pajšoŭ z žyćcia majstar sportu SSSR pa boksie, zasłužany trenier Biełarusi, adzin z samych aŭtarytetnych śpiecyjalistaŭ i nastaŭnikaŭ Anatol Kołčyn.
Nasupierak ciažkaj chvarobie, jon da apošnich dzion nie sychodziŭ z rynha.
Pryśviaciŭšy žyćcio pracy na rynhu, Anatol Kołčyn staŭ pradaŭžalnikam tradycyj Viciebskaj škoły boksa, jakaja vychavała šmat znakamitych bajcoŭ i trenieraŭ. Siarod vučniaŭ Kołčyna asablivaje miesca zajmajuć udzielnik nacyjanalnaj zbornaj Uładzimir Cieran, pryzior Alimpijskich hulniaŭ u Afinach i ŭładalnik uznaharod mnohich najbujniejšych mižnarodnych turniraŭ Viktar Zujeŭ, a taksama pieršy ŭ historyi ajčynnaha boksa čempijon śvietu siarod prafiesijanałaŭ u ciažkaj vazie Siarhiej Lachovič. Kožny ź ich, uspaminajučy svaju darohu da suśvietnych viaršyniaŭ, asabliva adznačaŭ pracu treniera, jaki dla kožnaha ź ich byŭ, bieź pierabolšańnia, druhim baćkam.
U 2011 hodzie Anatol Kołčyn, pad kiraŭnictvam jakoha nacyjanalnaja zbornaja krainy zavajavała čatyry miedali na čempijanacie Jeŭropy ŭ Maskvie, byŭ pryznany trenieram hoda ŭ Biełarusi. Navat pakinuŭšy pasadu hałoŭnaha treniera, Kołčyn praciahvaŭ adyhryvać najvažniejšuju rolu ŭ padrychtoŭcy nacyjanalnaj zbornaj krainy, pieradajučy svoj dośvied novym pakaleńniam spartoŭcaŭ.
Kamientary