Учора пайшоў з жыцця майстар спорту СССР па боксе, заслужаны трэнер Беларусі, адзін з самых аўтарытэтных спецыялістаў і настаўнікаў Анатоль Колчын.
Насуперак цяжкай хваробе, ён да апошніх дзён не сыходзіў з рынга.
Прысвяціўшы жыццё працы на рынгу, Анатоль Колчын стаў прадаўжальнікам традыцый Віцебскай школы бокса, якая выхавала шмат знакамітых байцоў і трэнераў. Сярод вучняў Колчына асаблівае месца займаюць удзельнік нацыянальнай зборнай Уладзімір Церан, прызёр Алімпійскіх гульняў у Афінах і ўладальнік узнагарод многіх найбуйнейшых міжнародных турніраў Віктар Зуеў, а таксама першы ў гісторыі айчыннага бокса чэмпіён свету сярод прафесіяналаў у цяжкай вазе Сяргей Ляховіч. Кожны з іх, успамінаючы сваю дарогу да сусветных вяршыняў, асабліва адзначаў працу трэнера, які для кожнага з іх быў, без перабольшання, другім бацькам.
У 2011 годзе Анатоль Колчын, пад кіраўніцтвам якога нацыянальная зборная краіны заваявала чатыры медалі на чэмпіянаце Еўропы ў Маскве, быў прызнаны трэнерам года ў Беларусі. Нават пакінуўшы пасаду галоўнага трэнера, Колчын працягваў адыгрываць найважнейшую ролю ў падрыхтоўцы нацыянальнай зборнай краіны, перадаючы свой досвед новым пакаленням спартоўцаў.
Каментары