Dyjakan Kurajeŭ źvinavaciŭ isłam u paradžeńni teraryzmu

Pieršy terarystyčny akt u Amierycy paśla 11 vieraśnia vyklikaŭ novuju ŭvahu da fienomienu sučasnaha teraryzmu. Va ŭčynieńni terakta padazrajuć dvuch amierykancaŭ čačenskaha pachodžańnia — bratoŭ Carnajevych. Ich datyčnaść vyklikaje mała sumnievaŭ paśla taho, jak jany zaciata adstrelvalisia ad palicyjantaŭ i pryznalisia taksistu, jakoha zmusili siabie pieravozić, što jany terarysty.

Siarod inšych, na padziei ŭ Bostanie adhuknuŭsia rasijski pravasłaŭny intelektuał dyjakan Andrej Kurajeŭ.

«U navucy pryniata ŭličvać tysiačy navat nieŭśviadomlenych nitak, jakimi kankretny čałaviek źviazany sa svaim asiarodździem, svaim minułym i z tymi identyčnaściami, jakija praź jaho jaŭlajuć siabie i dziejničajuć, — piša Kurajeŭ. —

Teleinjekcyi na temu „ŭ teraryzmu niama nacyjanalnaści i relihii“ kožny raz z pradkazalnoj vidavočnaściu spałachvajuć paśla čarhovaha terakta, i jany prosta durnyja. Mo heta inšapłaniecianie padryvajuć našy samaloty i škoły?» — sarkastyčna pytajecca jon.

«Z „palitkarektnym“ tezisam možna było b pahadzicca, kali b vierniki suśvietnych relihij pa čarzie ładzili terakty. To budysty zachopiać škołu i rasstralajuć u joj dziaciej… To daosy ŭzarvuć samalot… To chryścijanie padarvuć kinateatr… Voś u hetym vypadku možna było b abmiežavacca paŭtoram banalnaści ab tym, što ŭ kožnaha naroda jość prava mieć svaich niahodnikaŭ… Ale ž usio zusim nie tak».

«Moža być, teraryzm — heta nastupstva skažonaha razumieńnia Karana. Ale ž — mienavita Karana, a nie knihi pra Vini-Pucha, — piša Kurajeŭ.

«U terarystaŭ niama relihii? Ale jany niesumnienna i mocna vierać u praciah žyćcia paśla vybuchu ŭłasnaha cieła. A nazvy ich arhanizacyj kažuć pra hatoŭnaść vajavać za isłam, a nie za futboł. Ich možna ličyć drennymi musulmanami. Ale heta mienavita musulmanie», — upeŭnieny Kurajeŭ.

Viedajecie, kali ŭ zachodnim śviecie niekalki hadoŭ tamu pačaŭsia carkoŭna-seksualny skandał, to katalikam i ŭ hałavu nie prychodziła kazać, byccam u ich u sieminaryjach vykładajuć homaseksualisty, «u jakich niama nacyjanalnaści i relihii», a nie kataliki. Katalickaja carkva akazałasia dosyć sumlennaj i mužnaj, kab u hetych hrešnikach pryznać svaich ludziej, a, značyć, u ich hrachu pabačyć i svaju vinu. Ubačyć — kab pieraadoleć».

«Tak što Carnajevy — heta vaša, musulmanska-čačenskaje, haŭno, — žorstka vykazvajecca dyjakan. — A pjany manach na sportkary, padarunku ad vialmožnaha paluboŭnika [niadaŭni vypadak u Maskvie — NN] — naša, ruska-pravasłaŭnaje, — samakrytyčna pryznajecca jon.

Mnie zdajecca, Kurajeŭ spraščaje, zvodziačy ŭsio da taho, što jość lepšyja i horšyja relihii.

Ja nie havaru pra teraryzm kštałtu minskaha terakta 2011 hoda — inšaha charaktaru paskudstva. Ja havaru pra ideałahična ci relihijna matyvavany teror.

Najbolš kryvavy terakt u historyi Amieryki pierad 11 vieraśnia, u Akłachoma-sici, učyniŭ bieły amierykaniec ultrapravych pohladaŭ. U Birmie ŭ apošnija miesiacy, naprykład, budysty ŭčynili pahrom musulmanskaj mienšaści — jak u našych krajach kaliści žydy, tak u Birmie musulmanie apanavali handal i abudžajuć u budystaŭ pačućci zajzdraści i kankurencyi.

U historyi da teraryzmu prybiahali mnohija słabiejšyja i pakryŭdžanyja — ad kniahini Rahniedy da Ihnata Hryniavickaha. Terarystyčnymi mietadami słavianskija narody Bałkanaŭ, hreki i armianie zmahalisia za niezaležnaść suprać isłamskaj Asmanskaj impieryi, irłandcy — suprać Brytanii, baski — suprać Ispanii, a biaspraŭnyja kłasy i etnasy Rasijskaj impieryi (pieradusim, habrei) — suprać caryzmu.

Raspačać «vajnu cyvilizacyj» lohka, ciažej stvaryć taki paradak u śviecie, pry jakim usim było b miesca. Ci ŭsio ž sprava ŭ ahresiŭnaści isłamu, i tamu nam, zachodniamu, chryścijanskamu śvietu, treba prosta zastavacca macniejšymi, kab abaranić siabie?

A Vy što pra heta dumajecie? (Tolki racyjanalna, kali łaska, bieź źniavahaŭ relihijnaha charaktaru.)

• 0
• 0
• 0
• 0
• 0
• 0
• 0
• 0