U Chojnikach rychtujucca da pryjezdu Łukašenki: horad drajać u aŭralnym paradku
U Chojnikach (Homielskaja vobłaść) miascovyja čynoŭniki rychtujucca da pryjezdu Alaksandra Łukašenki, jaki tradycyjna napiaredadni hadaviny čarnobylskaj trahiedyi naviedvaje rehijony Biełarusi, što paciarpieli ad avaryi na ČAES.
U horadzie ŭ aŭralnym paradku navodziać paradak: bielać bardziury, farbujuć aharodžy, ramantujuć prypynki hramadskaha transpartu, układvajuć novaje asfaltavaje pakryćcio. Fasady budynkaŭ ź nieprezientabielnym vidam 23 krasavika zakryli pryhožymi banierami ź vidami pryrody, a abjekty, jakija nie paśpieli pryvieści ŭ paradak, zaciahnuli zialonaj maskirovačnaj sietkaj.
Pavodle słoŭ pradstaŭnikoŭ rajvykankama, jakija biaruć aktyŭny ŭdzieł u dobraŭparadkavańni, u suviazi z pryjezdam Łukašenki z 15 krasavika pracoŭny dzień dla čynoŭnikaŭ doŭžycca z 7.00 da 19.00. Taksama štodzień prachodziać subotniki.
Rychtujucca sustreć kiraŭnika dziaržavy i na novym małočna-tavarnym kompleksie ŭ vioscy Straličava Chojnickaha rajona. 23 krasavika tut pracavali śpiecyjalisty rajvykankama, u pryvatnaści adździeła adukacyi.
Jany zaznačyli, što rady mahčymaści papracavać na fiermie, bo kali jašče, pavodle słoŭ śpiecyjalistaŭ, im daviadziecca «pabyć z karovami».
Tut vialisia raboty pa ŭkładcy tratuarnaj plitki, bialili i farbavali haspadarčyja pabudovy. Ad Chojnikaŭ da Straličava darožnaja słužba kładzie novy asfalt, rysuje raźmietku, ramantuje prypynki hramadskaha transpartu.
Śpiecyjalisty ŭpraŭleńnia sielskaj haspadarki rajvykankama byli ździŭlenyja, jak žurnalist BiełaPAN trapiŭ u haspadarku biez supravadžeńnia supracoŭnikaŭ ideałahičnaha adździeła rajvykankama,a taksama prapanoŭvali «nieadkładna» viarnucca ŭ rajcentr i naviedać abjekty, jakija «možna naviedvać», i ŭ supravadžeńni ideołaha.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja17
Kamientary