Zvyčajnaja rekłamnaja akcyja na adnoj z najbujniejšych kryptabiržaŭ Paŭdniovaj Karei pieratvaryłasia ŭ atrakcyjon finansavaj ščodraści hłabalnaha maštabu.
U centry hučnaha skandału z-za hałavałomnaj techničnaj pamyłki apynułasia adna z najbujniejšych kryptavalutnych biržaŭ Paŭdniovaj Karei Bithumb.
Usio pačałosia sa zvyčajnaj rekłamnaj kampanii, padčas jakoj płanavałasia razdać karystalnikam nievialikija hrašovyja ŭznaharody. Ahulny pryzavy fond składaŭ ścipłyja 620 tysiač karejskich von, što ekvivalentna prykładna 425 dalaram ZŠA, piša The Wall Street Journal.
Adnak zamiest von supracoŭnik biržy pamyłkova ŭvioŭ inšuju valutu. U vyniku karystalnikam było naličana nie 620 tysiač von, a 620 tysiač bitkojnaŭ. Na momant, kali adbyłasia pamyłka, hetaja suma aceńvałasia bolš čym u 40 miljardaŭ dalaraŭ.
Dla razumieńnia maštabu zdareńnia: pieramožca, jaki pavinien byŭ atrymać simvaličnyja 2000 von — košt kubka kavy, — raptam staŭ uładalnikam aktyvaŭ na sumu bolš za 120 miljonaŭ dalaraŭ. Častka atrymalnikaŭ pasprabavała nieadkładna pradać abo vyvieści bitkojny.
Reakcyja rynku była imhniennaj — cana bitkojna na biržy abvaliłasia na 17%. Prykładna praz paŭhadziny paśla pačatku incydentu kryptabirža całkam spyniła tarhi. Ad dziejańniaŭ Bithumb paciarpieli i zvyčajnyja inviestary, jakija trymali svaje aktyvy na biržy da incydentu: ich straty aceńvajucca ŭ 685 tysiač dalaraŭ.
Kiraŭnictva Bithumb zajaviła, što amal usie pamyłkova naličanyja srodki byli viernutyja: bolš za 99% bitkojnaŭ abo byli aŭtamatyčna adklikanyja, abo dobraachvotna viernutyja karystalnikami. Adnak zastajecca prablema z tymi, chto paśpieŭ pradać bolš za 100 bitkojnaŭ — heta kala 9 miljonaŭ dalaraŭ pa kursie na momant incydentu.
Kab zahładzić vinu, Bithumb prapanavała kampiensacyju paciarpiełym, časova admianiła handlovyja kamisii i paabiacała stvaryć fond abarony klijentaŭ u pamiery 70 miljonaŭ dalaraŭ na vypadak budučych zdareńniaŭ.
Incydent pryciahnuŭ pilnuju ŭvahu rehulataraŭ i vykryŭ surjoznyja prablemy ŭ sistemie biaśpieki paŭdniovakarejskaha kryptarynku.
Zakanadaŭcy i ekśpierty ŭźniali pytańnie ab tak zvanych «fantomnych manietach». Pavodle miascovaha zakanadaŭstva, biržy nie majuć prava dazvalać handal abjomami, jakija pieravyšajuć ich realnyja reziervy. Adnak Bithumb niejkim čynam udałosia technična raźmierkavać 620 tysiač bitkojnaŭ, chacia jaje ŭłasnyja zapasy aceńvalisia prykładna ŭ 50 tysiač maniet.
Finansavyja rehulatary Paŭdniovaj Karei ŭžo raspačali aficyjnaje rasśledavańnie, jakoje pahražaje biržy štrafami i sankcyjami. Li Čon Su, daradca ŭrada pa ličbavych aktyvach, nazvaŭ situacyju «katastrafičnym pravałam unutranaha kantrolu», adznačyŭšy, što dla takoj bujnoj finansavaj ustanovy mieć nastolki ŭraźlivyja IT-sistemy prosta niedapuščalna.
Maštabnyja vypadkovyja straty abo «razdačy» bitkojnaŭ zdarajucca nadzvyčaj redka. U 2013 hodzie IT-śpiecyjalist z Uelsa straciŭ kala 7,5 tysiačy bitkojnaŭ paśla taho, jak ćviordy dysk z klučami byŭ vypadkova vykinuty. U 2021 hodzie kryptakredytor BlockFi pamyłkova adpraviŭ karystalnikam sotni bitkojnaŭ, ale paśla zdoleŭ viarnuć bolšuju častku srodkaŭ.
Adnak toje, što adbyłosia z Bithumb, užo nazyvajuć adnoj z samych darahich pamyłak u historyi kryptaindustryi i surjoznym sihnałam dla ŭsiaho rynku.
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary