U Biełarusi zarehistravanyja bolš za 2 tysiačy ahrasiadzib

U Biełarusi zarehistravanyja 2.054 ahrasiadziby, paviedamiła BiełaPAN staršynia praŭleńnia Biełaruskaha hramadskaha abjadnańnia «Adpačynak u vioscy» Valeryja Klicunova.

Pavodle jaje słoŭ, u kancy 2012 hoda ŭ krainie naličvałasia 1.775 ahrasiadzib, u kancy 2011-ha — krychu bolš za 1,5 tysiačy. Jak paviedamiła Klicunova, sielskim turyzmam u Biełarusi zajmajucca jak haradžanie, hetak i miascovyja žychary. Mnohija z uładalnikaŭ siadzib mieli vopyt viadzieńnia biźniesu raniej.

Sielski turyzm — heta śfiera, u jakoj haspadary siadzib mohuć samavyjaŭlacca i rabić toje, što im padabajecca, miarkuje Klicunova. «Niechta lubić aktyŭny adpačynak, rybałku, spłaŭ na bajdarkach, buduje viarovačnyja haradki, arhanizoŭvaje kamandnyja hulni. Tyja, chto lubić siamiejny cichi adpačynak, aryjentujucca na siemji i dumajuć, jak arhanizavać volny čas muža, žonki i dziciaci. Niekatoryja siadziby abjadnoŭvajucca i stvarajuć zialonyja maršruty, prasoŭvajučy ceły rehijon», — zaznačyła jana.

Letaś, pavodle słoŭ Klicunovaj, biełaruskija siadziby pryniali kala 220 tys. naviedvalnikaŭ, u 2011 hodzie — 145 tys. «Heta raźvivaje sielskuju miascovaść. Turysty pryjazdžajuć u viosku i pakidajuć tam hrošy, chodziać u miascovyja mahaziny», — paviedamiła kiraŭnik abjadnańnia. Pavodle jaje słoŭ, haspadary siadzib taksama robiać uniosak u raźvićcio viosak, bo karystajucca pasłuhami miascovych žycharoŭ.

Jak zaznačyła Klicunova, patrabavańni naviedvalnikaŭ da ahrasiadzib apošnim časam uzrastajuć, turysty z časam stanoviacca «bolš daśviedčanymi» i paraŭnoŭvajuć biełaruskija siadziby z zamiežnymi. Na dumku śpiecyjalista, dla pryciahnieńnia turystaŭ haspadaram siońnia varta pakłapacicca i pra brend svajho rajona, pradumać zabaŭlalnuju prahramu znachodžańnia haściej jak u dobraje nadvorje, hetak i ŭ daždžlivaje.

Kiraŭnik turystyčnaha partała Holiday.by Andrej Baraška miarkuje, što ŭ Biełarusi nie chapaje kreatyŭnych i cikavych siadzib. Na jaho dumku, sučasnamu turystu «patrebnyja nie tolki ścieny», a jašče i zabavy i aktyŭny adpačynak, dziela jakich jany mohuć adpravicca na siadzibu.

«Za niekalki hadoŭ ludzi prakacilisia pa mnohich abjektach i, napeŭna, užo nie chočuć paŭtarać hety cykł, kali ničoha nie mianiajecca. Dla viartańnia klijenta ŭžo niedastatkova prapanavać jamu śpiecyjalnuju canu, tamu što jon byŭ užo ŭ hetaj miascovaści i viedaje, što tam dobra, ale hetak ža dobra, jak i hod-dva tamu», — skazaŭ ekśpiert.

Na jaho dumku, raźvićcio ahraturyzmu ŭ Biełarusi moža tarmazić zakanadaŭstva: hetyja subjekty haspadarańnia vyzvalenyja ad paŭnacennaha padatkaabkładańnia, ale kali jany prapanujuć naviedvalnikam charčavańnie, animiravanyja ekskursii i inšyja zabavy, im daviadziecca vieści paŭnacennuju pradprymalnickuju dziejnaść.

Razam z tym, zaznačaje Baraška, u Biełarusi jość cikavyja siadziby, ale jany «niedastatkova raskručanyja».

• 0
• 0
• 0
• 0
• 0
• 0
• 0
• 0