Kommiersant: Fiktyŭny biełaruski impart kaštavaŭ Rasii $15 miljardaŭ

Upieršyniu apublikavanyja CB dadzienyja abjomach vyvadu srodkaŭ z Rasii praz schiemy fiktyŭnaha impartu z našaj krainy akazalisia horšymi za lubyja čakańni. Tolki ŭ 2012 hodzie takija schiemy zabiaśpiečyli vyvad $15 młrd — bolš čym čverć čystaha adtoku kapitału z krainy. Baraćba ź imi, anansavanaja na mnohich uzroŭniach, pakul realnych vynikaŭ nie pryniesła. Kiraŭnictva Mytnaha sajuza, CB, bankiry, Raśfinmanitorynh i pravaachoŭnyja orhany skidvajuć adkaznaść adzin na adnaho, piša rasijskaje vydańnie «Kommiersant».

Aficyjnuju acenku abjomaŭ vyvadu kapitału z Rasii z dapamohaj fiktyŭnaha impartu tavaraŭ ź Biełarusi CB pryvioŭ u apublikavanym u aŭtorak liście 104-T «Ab pavyšeńni ŭvahi kredytnych arhanizacyj da asobnych apieracyj klijentaŭ». Tolki ŭ 2012 hodzie takim čynam było vyviedziena z Rasii bolš za $15 młrd — heta bolš čym čverć sukupnaha čystaha adtoku kapitału z krainy. Da hetaha času maštab prablemy, jakaja isnuje ŭžo niekalki hadoŭ, aficyjna nie raskryvajecca. Pradstaŭniki CB tolki pakazvali, što tak zvany «biełaruski sindrom» šmat u čym zamiaściŭ inšyja schiemy, jakija stali niazručnymi abo niemahčymymi ŭ vyniku dziejańniaŭ rehulataraŭ. Pryčym ličba ŭ $15 młrd nie ŭličvaje vyvad kapitału z Rasii z dapamohaj anałahičnych «kazachstanskich schiem». U CB ich abjom nie raskryvajuć.

Sutnaść schiemy ŭ tym, što rasijskija rezidenty pieravodziać srodki pa zamiežnahandlovych kantraktach, pa jakich «uvoz» tavaraŭ «ažyćciaŭlajecca» ź Biełarusi, a srodki pieraličvajucca na rachunki «pradaŭcoŭ» u zamiežnych bankach za miežami hetych krain.

Ułasna, samo isnavańnie MS i pravakuje źjaŭleńnie raznastajnych schiem. Viasnoj 2012 hoda mytnymi słužbami sajuza abmiarkoŭvałasia prablema «cieniavych schiem pa ŭchileńni ad vypłaty ŭskosnych padatkaŭ». U jakaści prykładu pryvodziŭsia vypadak adhruzki rasijskim pradprymalnikam nabytaha ŭ Kazachstanie tavaru naŭprost z terytoryi krainy za miažu MS biez abaviazkovaj vypłaty PDV u biudžet RF. Pry hetym baraćba ź imi praz uzmacnieńnie žorstkaści zakanadaŭstva idzie nasupierak z zadačami, dziela jakich hety sajuz stvaraŭsia: spraščeńnie handlu pamiž krainami-ŭdzielnicami.

Prablemu pryznajuć i ŭ kiraŭnictvie MS.

«Dziakujučy režymu Mytnaha sajuza naš uzajemny handal u 2011–2012 hadach ros istotna chutčej za zamiežny i suśvietny, ale, zrazumieła, zaŭsiody jość udzielniki rynku, jakija chacieli b złoŭžyć hetym režymam», — kaža ministr pa handli Jeŭrazijskaj ekanamičnaj kamisii Andrej Ślapnioŭ. Tamu, ličyć jon, intehracyjny prajekt patrabuje ad nacyjanalnych kantrolnych słužbaŭ «bolš ciesnaha i praduktyŭnaha ŭzajemadziejańnia, kab minimizavać takija złoŭžyvańni».

Sproby takoha ŭzajemadziejańnia rabilisia — u pryvatnaści, rasijskim CB i biełaruskim Nacbankam. Jany viali sumiesnuju pracu nad udaskanaleńniem adzinaj biełaruskaj bazy TTN, pa jakoj rasijskim bankam prapanoŭvali praviarać sapraŭdnaść nakładnych. Zrešty, miarkujučy pa tonie lista CB i novych rekamiendacyjaŭ rasijskim bankam pa baraćbie ź biełaruskimi schiemami, jakija źmiaščajucca ŭ im, prykmietnaha vyniku miery pakul nie prynieśli. Ciapier bankam prapanujecca pierajści na tatalnaje infarmavańnie Raśfinmanitorynhu ab usich apieracyjach pa apłacie rasijskimi klijentami pastavak tavaraŭ ź Biełarusi ŭ karyść kontrahientaŭ ź inšych jurysdykcyj — pa-za zaležnaściu ad taho, sumnieŭnyja hetyja apieracyi ci nie. Akramia taho, im rekamiendavana nakiroŭvać u terupraŭleńni CB usiu najaŭnuju infarmacyju pra klijentaŭ, jakija pravodziać takija apieracyi, ich kontrahientach, zamiežnahandlovych kantraktach i inšym.

Navošta rehulataru hetaja niaprofilnaja infarmacyja i jak heta dapamoža baraćbie z admyvańniem, u liście nie tłumačycca.

Takija sproby rabilisia, havorycca ŭ spravazdačy Raśfinmanitorynhu za 2012 hod: «Sumiesna z Bankam Rasii praanalizavana bolš za 100 bankaŭ, ź ich pa 73 materyjały nakiravanyja ŭ pravaachoŭnyja orhany».

Im pavinna być adrasavanaje hałoŭnaje pytańnie — ab kančatkovym vyniku toj vielizarnaj pracy, u jakoj CB vymušaje ŭdzielničać banki, ličać bankiry. Zrešty, u pravaachoŭnych orhanach abvinavačvańni ŭ biaździejnaści adviarhajuć. Supracoŭniki MUS zajmajucca hetaj prablemaj, paviedamiła krynica ŭ MUS.

«My ciesna tut ŭzajemadziejničajem z Raśfinmanitorynham, apošniaja sumiesnaja narada na hetuju temu prajšła litaralna dniami. Pa ŭsich pradstaŭlenych nam faktach viadziecca praca, u tym liku i z kalehami ź Biełarusi, — patłumačyŭ jon. — U pryvatnaści, my ź ich dapamohaj užo vyśvietlili, što biełaruskija firmy da tych machinacyj z vyvadam srodkaŭ, pra jakija my majem infarmacyju, dačynieńnia nie majuć, — ich nazvy vykarystoŭvajucca dla prykryćcia». Pra kančatkovyja vyniki pracy kazać pakul rana, udakładniŭ surazmoŭca, ale pa hetym kirunku jana «adnaznačna viadziecca, i vielmi aktyŭna».

• 0
• 0
• 0
• 0
• 0
• 0
• 0
• 0