Z momantu źniknieńnia Dźmitryja Zavadskaha prajšło 13 hadoŭ

U 1994–1997 hadach Zavadski pracavaŭ u apieratarskim pule Alaksandra Łukašenki, zatym pierajšoŭ na ORT (ciapier Pieršy kanał).

Viasnoj 1997 hoda Dźmitryj razam z karespandentam ORT Paŭłam Šaramietam byŭ aryštavany i abvinavačany ŭ niezakonnym pierasiačeńni biełaruska-litoŭskaj miažy padčas zdymak repartažu, jaho ŭmoŭna asudzili na paŭtary hady pazbaŭleńnia voli. Z kastryčnika 1999 hoda pa maj 2000-ha Zavadski pracavaŭ u Čačni, dzie z Šaramietam zdymaŭ film «Čačenski dziońnik».

Ranicaj 7 lipienia 2000 hoda Zavadski vyjechaŭ z domu ŭ nacyjanalny aeraport Minsk sustrakać Šaramieta, jaki prylataŭ z Maskvy. Z taho času apieratara nichto nie bačyŭ. Jaho aŭtamabil byŭ znojdzieny ŭ aeraporcie.

U 2002 hodzie Minski abłasny sud pryznaŭ vinavataj u vykradańni Zavadskaha hrupu byłoha bajca śpiecpadraździaleńnia MUS «Ałmaz» Valeryja Ihnatoviča, jaki sustrakaŭ Zavadskaha ŭ Čačni. Dva ŭdzielniki hetaj hrupy, u tym liku sam Ihnatovič, pryhavorany da pažyćciovaha źniavoleńnia. U sakaviku 2004 hoda prakuratura prypyniła rasśledavańnie spravy ab vykradańni Zavadskaha «ŭ suviazi ź nievyjaŭleńniem bieź viestak źnikłaj asoby». U 2005 hodzie rasśledavańnie było adnoŭlena, ale ŭ krasaviku 2006-ha znoŭ prypyniena.

Na dumku staršyni jurydyčnaj kamisii pravaabarončaha abjadnańnia «Biełaruski Chielsinkski kamitet» (BCHK) Hary Pahaniajły, śledstva «vielmi šmat nie zrabiła dla rasśledavańnia spravy Zavadskaha». «Poŭnaściu nie dakazany sam fakt vykradańnia, nie vyśvietleny jaho akaličnaści, chto ŭ im udzielničaŭ. Choć abvieščana, što ŭdzielnikami vykradańnia źjaŭlajucca Malik i Ihnatovič, ale jany dziejničali ŭ składzie hrupy nieviadomych asob. Abodva znachodziacca ŭ turmie, i niezrazumieła, čamu nielha było praciahnuć pracu ź imi, kab vyśvietlić usie akaličnaści spravy», — adznačyŭ juryst u intervju BiełaPAN.

Pavodle jaho acenki, prysud u dačynieńni da vykradalnikaŭ Zavadskaha «hučyć vielmi niepierakanaŭča, padadziena mała dokazaŭ taho, što złačynstva sapraŭdy raskryta».

«Čym bolš prachodzić času, tym mienš šansaŭ, što złačynstvy, źviazanyja z hučnymi źniknieńniami ludziej u Biełarusi, buduć raskryty», — dadaŭ Pahaniajła. Pry hetym jon miarkuje, što na apieratyŭnym uzroŭni złačynstvy, źviazanyja sa źniknieńniem Zavadskaha, a taksama byłoha ministra ŭnutranych spraŭ Juryja Zacharanki, palityka Viktara Hančara i biźniesmiena Anatola Krasoŭskaha (źnikli ŭ 1999 hodzie), raskryty.

Zhodna ź mierkavańniem Pahaniajły, u dačynieńni da spraŭ vykradzienych varta zrabić tolki «niekatoryja pracesualnyja dziejańni, jakija pakłali b u dokaznuju bazu sabranyja raniej fakty», i materyjały spraŭ možna było nakiravać u sud. «Ale hetaha tak i nie adbyłosia. Nikomu ničoha nie paviedamlajuć, robiać vyhlad, što śledstva idzie. Dziaržava demanstruje niežadańnie pracavać pa hetych spravach — heta nie prosta biazvolle i biezynicyjatyŭnaść, heta adsutnaść usiakaha žadańnia vieści śledstva i źbirać dokazy», — padkreśliŭ pravaabaronca.

Jak ličyć pradstaŭnik BCHK, «biaździejnaść uład samym krasamoŭnym čynam śviedčyć pra ich dačynieńnie da złačynstvaŭ».

Varta adznačyć, što ŭ pačatku 2000-ch hadoŭ byli apublikavany dakumienty, ź jakich vynikała, što z apazicyjnymi palitykami i hramadskimi aktyvistami raspraviŭsia śpiecyjalna stvorany dla hetaha «eskadron śmierci». Siarod tych, chto maje dačynieńnie da vykradańniaŭ, zhadvaŭsia były kiraŭnik MUS Juryj Sivakoŭ. Z hetaj pryčyny jamu, jak i šerahu inšych biełaruskich čynoŭnikaŭ, byŭ zabaronieny ŭjezd na terytoryju Jeŭrasajuza.

Hramadskaje abjadnańnie «Biełaruskaja asacyjacyja žurnalistaŭ» (BAŽ) prapanuje kaleham 7 lipienia ŭ 12.00 pravieści chvilinu maŭčańnia ŭ internecie. Dałučycca da akcyi možna, źmiaściŭšy na peŭny čas na sajtach «zahłušku» ci fłeš-banar. «Žurnalisty nie majuć prava zabyvać pra kalehaŭ z trahičnym losam. My pavinny nahadvać suhramadzianam pra tyja spravy, kropka ŭ jakich jašče nie pastaŭlena», — padkreślivaje BAŽ.

• 0
• 0
• 0
• 0
• 0
• 0
• 0
• 0