Charašci zaklikaŭ ułady Biełarusi spynić pieraśled pravaabaroncaŭ

Śpiecdakładčyk pa situacyi ŭ Biełarusi Savieta AAN pa pravach čałavieka Mikłaš Charašci zaklikaŭ biełaruski ŭrad vyzvalić Alesia Bialackaha i spynić pieraśled pravaabaroncaŭ.

Jak paviedamlaje sajt spring96.org, Charašci zaklikaje «terminova i biezumoŭna» vyzvalić i reabilitavać Bialackaha. «Źniavoleńnie Bialackaha źjaŭlajecca simvałam represij suprać pravaabaroncaŭ», — padkreślivaje jon. «Bialacki — pravaabaronca, jakoha pavažajuć va ŭsim śviecie, jaho dziejnaść pa abaronie pravoŭ čałavieka dobra viadomaja i šyroka pryznanaja», — zajaviŭ Charašci.

Jon adznačaje, što Bialacki, «jak i mnohija inšyja pravaabaroncy ŭ Biełarusi, nie moh zajmacca lehalnaj i bieśpieraškodnaj pracaj z-za admovy biełaruskich uład u rehistracyi jaho arhanizacyi».

Charašci zaklikaŭ urad Biełarusi pryznać pravaabarončyja arhanizacyi krainy i pačać supracoŭnictva ź imi dla taho, kab stvaryć «niezaležnuju nacyjanalnuju ŭstanovu pa pravach čałavieka, jak taho patrabujuć abaviazacielstvy krainy ŭ miežach dahavoraŭ Arhanizacyi Abjadnanych Nacyj».

Charašci spasyłajecca na mierkavańnie Kamiteta pa pravach čałavieka AAN pra toje, što likvidacyja «Viasny» źjaŭlajecca parušeńniem svabody abjadnańniaŭ, harantavanaj Mižnarodnym paktam ab hramadzianskich i palityčnych pravach. Akramia taho, jon adznačyŭ, što Saviet pa pravach čałavieka AAN adnahałosna zajaviŭ, što nijaki zakon nie moža ŭvodzić kryminalnuju adkaznaść ci pazbaŭlać lehitymnaści dziejnaść pa abaronie pravoŭ čałavieka ŭ suviazi z krynicami jaje finansavańnia.

«Zatrymańnie Bialackaha — vidavočny vynik jaho pracy ŭ adpaviednaści ź mižnarodnym pravam u halinie pravoŭ čałavieka, — ličyć Charašci.

Charašci zaklikaje ŭrad Biełarusi zabiaśpiečyć Bialackamu «ŭ pieryjad da jaho vyzvaleńnia dostup da luboj miedycynskaj dapamohi, jakaja jamu moža spatrebicca, i harantavać, što ŭmovy ŭtrymańnia ŭ turmie nie ŭpłyvajuć na jaho zdaroŭje, a taksama što Aleś Bialacki maje poŭnyja pravy na spatkańni i pryvatnuju pierapisku».

Nahadajem, Charašci aficyjna pačaŭ vykonvać svaje funkcyi śpiecdakładčyka 1 listapada 2012 hoda. Jaho mandat byŭ pradoŭžany jašče na hod u červieni 2013 hoda. 11–14 lipienia Charašci, jaki tak i nie dačakaŭsia dazvołu biełaruskich uład naviedać Biełaruś, sustreŭsia z pradstaŭnikami biełaruskaj hramadzianskaj supolnaści ŭ Vilni.

***

Vice-prezident Mižnarodnaj fiederacyi pravoŭ čałavieka, staršynia likvidavanaha ŭładami pravaabarončaha centra «Viasna» Aleś Bialacki byŭ zatrymany ŭ Minsku 4 žniŭnia 2011 hoda. Bialacki adbyvaje pakarańnie pa pryhavory suda, jaki 24 listapada 2011 hoda pryznaŭ jaho vinavatym va ŭtojvańni dachodaŭ u asabliva bujnym pamiery i pryhavaryŭ da čatyroch z pałovaj hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu z kanfiskacyjaj majomaści. Padstavaj dla kryminalnaha pieraśledu Bialackaha stała najaŭnaść u jaho rachunkaŭ u bankach Litvy i Polščy. Sud nie ŭličyŭ, što hrošy, jakija na ich pastupali, vykarystoŭvalisia dla pravaabarončaj dziejnaści. Nie byŭ uziaty pad uvahu i toj fakt, što škoda, nibyta naniesienaja Bialackim dziaržavie, była poŭnaściu pahašana za košt dobraachvotnych achviaravańniaŭ hramadzian.

• 0
• 0
• 0
• 0
• 0
• 0
• 0
• 0