Urad Litvy pakul nie ŭstanaviŭ pamier zboru za dezinfiekcyju hruzavoha transpartu na miažy ź Biełaruśsiu. Hety zbor moža skłaści mienš jak 25 litaŭ, pra jakija paviedamlałasia raniej, zajaviŭ žurnalistam 21 žniŭnia paśla pasiadžeńnia ŭrada premjer-ministr Litvy Alhirdas Butkiavičus.
Pavodle jaho słoŭ, sumu zboru i paradak praviadzieńnia dezinfiekcyi pavinna vyznačyć Dziaržaŭnaja charčova-vieterynarnaja słužba Litvy (DCHVS).
Jak rastłumačyŭ litoŭski premjer, dla ŭviadzieńnia zboru nieabchodna ŭnieści karektyvy ŭ zakanadaŭstva, tamu dezinfiekcyja budzie ažyćciaŭlacca ŭ jakaści płatnaj pasłuhi, što akazvaje dziaržarhanizacyja. "Heta aznačaje, što DCHVS sama vyznačyć paradak, jak pravodzić hetu pracu pa dezinfiekcyi i kolki płacić za hetyja pasłuhi", — cytuje Butkiavičusa infarmahienctva BNS.
Pavodle jaho słoŭ, Ministerstva sielskaj haspadarki, mahčyma, "adšukaje dadatkovyja srodki, kab dla pieravozčykaŭ byŭ ustanoŭleny zbor mienšy".
Nahadajem, z 23 lipienia Litva pravodzić dezinfiekcyju lehkavych aŭtamabilaŭ, jakija ŭjazdžajuć na jaje terytoryju ź Biełarusi, a taksama abutku i ruk ludziej. Heta pracedura pravodzicca biaspłatna.
19 žniŭnia ŭrad Litvy pryniaŭ rašeńnie ŭvieści zbor za dezinfiekcyju hruzavych aŭtamabilaŭ i nazvaŭ pamier zboru — 25 litaŭ.
Akramia taho, litoŭskija ŭłady žadajuć uźvieści na miažy ź Biełaruśsiu ścianu z metaj abarony ad AČS i prosiać kiraŭnictva ES dapamahčy ŭ hetym. DCHVS prosić Jeŭrakamisiju vydzielić dla baraćby z AČS u Biełarusi 13,5 młn. jeŭra (46,6 młn. litaŭ), pakolki 750 tys. litaŭ, vydzielenych na abstalavańnie dla dezinfiekcyi na miažy, da siaredziny žniŭnia ŭžo buduć patračanyja. 10 młn. jeŭra (34,5 młn. litaŭ) z zapytanaj sumy śpiecyjalisty płanujuć vykarystoŭvać na ŭstanoŭku aharodžy ad žyvioł na miažy ź Biełaruśsiu. Kolki budzie kaštavać źniščeńnie śviniej u budučaj bufiernaj zonie, pakul nie padličana.
Pa dapamohu ŭ ES źviarnulisia taksama inšyja zachodnija susiedzi Biełarusi — Łatvija i Polšča.
Ačahi AČS aficyjna vyjaŭlenyja ŭ Biełarusi ŭ dvuch miescach — Iŭjeŭskim rajonie Hrodzienskaj vobłaści i ŭ Viciebskim rajonie. Biełaruskija ŭłady zajavili, što pryčynaj zachvorvańnia śviniej staŭ zaražany kambikorm, jaki byŭ pastaŭleny pradprymalnikam z-za miežaŭ Biełarusi i realizavany nasielnictvu.
Časovaja zabarona na ŭvoz śvińniaŭ i śvininy ź Biełarusi ŭviedzienaja ŭ Rasii, Ukrainie, Polščy, Litvie i Łatvii.
