Siońnia spaŭniajecca 75 hadoŭ Miečysłavu Hrybu, pad staršynstvam jakoha Viarchoŭny Saviet 15 sakavika 1994 hoda pryniaŭ Kanstytucyju Respubliki Biełaruś.
Miečysłaŭ Hryb naradziŭsia ŭ vioscy Savičy Dziatłaŭskaha rajona Hrodzienskaj vobłaści. Skončyŭ Ilvoŭskaje pažarna-techničnaje vučylišča i Biełaruski dziaržaŭny ŭniviersitet. Hienierał-lejtenant milicyi. Zasłužany juryst Biełarusi.
U 1981–1985 hadach pracavaŭ načalnikam upraŭleńnia achovy hramadskaha paradku MUS BSSR, 1985–1990 hadach — načalnikam upraŭleńnia ŭnutranych spraŭ Viciebskaha abłvykankama.
U 1990–1996 hadach — deputat Viarchoŭnaha Savieta 12-ha i 13-ha sklikańniaŭ. Na praciahu dvuch hadoŭ źjaŭlaŭsia staršynioj parłamienta.
Ciapier źjaŭlajecca hienieralnym sakratarom Biełaruskaj sacyjał-demakratyčnaj partyi (Hramada), u jakuju ŭstupiŭ u červieni 1996 hoda.
Svajo 75-hodździe Hryb źbirajecca sustreć na dačy. «Niejkich asablivych tradycyj pry śviatkavańni dzion naradžeńniaŭ u nas niama, — raskazaŭ jon BiełaPAN. — Prosta źbiarucca blizkija svajaki — dzieci, unuki, brat, siastra, pryjeduć niekalki siabroŭ. Pasiadzim, paabiedajem, vykažam, što adzin pra druhoha dumajem».
«Samaje hałoŭnaje ŭ žyćci ŭ maim uzroście — siamja. Na žal, žonka ŭžo pamierła. Ale jość dzieci, unuki — treba być bližej da ich», — skazaŭ Miačysłaŭ Hryb.
Sychodzić z radoŭ BSDP (Hramada) jon nie źbirajecca. «Budu vopyt i viedy addavać spravie sacyjał-demakratyi», — padkreśliŭ Hryb.
Jubilar adznačyŭ, što ad palityki, «viadoma, jak i napeŭna ŭsie pradstaŭniki apazicyi, stamiŭsia». «Amal 20 hadoŭ nie vielmi paśpiachovaj baraćby, amal bieź pieramoh — stamlaješsia maralna i fizična. Ale ja nie dumaju pakidać svaju partyju, u nas heta nie pryniata. Z našaj partyi pa ŭzroście nichto nie vychodzić», — skazaŭ jon.
Hryb ličyć, što dla pieramohi apazicyi nie chapaje šmat składalnikaŭ. «Pa-pieršaje, apazicyi nie chapaje imknieńnia da abjadnańnia. Pra jaho kažuć usie, ale kali realna staić pytańnie abjadnoŭvacca, to ŭ kožnaha znachodziacca svaje mierkantylnyja intaresy. My ŭžo hetulki hadoŭ havorym pra abjadnańnie sacyjał-demakratyčnych partyj i ruchaŭ, byccam by ŭsie „za“, ale ŭsie žadajuć, kab abjadnańnie było pad ich kiraŭnictvam, a nie inšych», — skazaŭ jon.
Pa-druhoje, pradoŭžyŭ jubilar, u apazicyi pakul nie naładžany dobryja suviazi z narodam. «U hetym vina nie tolki samoj apazicyi. Ułada robić usio, kab pradstaŭniki apazicyjnych partyj nie mieli mahčymaściaŭ narmalna kantaktavać z narodam, dziaržaŭnyja ŚMI dla nas zakrytyja. I samaje hałoŭnaje, u nas mažarytarnaja vybarčaja sistema, jakaja vielmi mocna tarmozić raźvićcio partyj», — ličyć jon.
Jak hramadzianin i palityk Hryb chacieŭ by bačyć Biełaruś svabodnaj i demakratyčnaj dziaržavaj ź niejtralnym statusam. «Chaciełasia b, kab Biełaruś nie ŭmiešvałasia ni ŭ jakija kanflikty, ni z kim nie vajavała. Ja suprać usich vajennych błokaŭ, nikoli jany nam za ŭsiu historyju ničoha dobraha nie prynosili», — skazaŭ jon.
Što zapisana aficyjnaj pryčynaj śmierci adzinaha syna Jarmošynaj?8
Kamientary