Radasłaŭ Sikorski, Karł Bilt. Zrabić Jeŭropu adzinaj

Uviesnu 2008 hoda Šviecyja i Polšča raspačali Uschodniaje Partniorstva — ambitnuju palityčnuju prahramu zbližeńnia z šaściu krainami Uschodniaj Jeŭropy, zacikaŭlenymi ŭ bolš ščylnych adnosinach ź ES.

Piać hadoŭ paźniej, napiaredadni treciaha samita Uschodniaha Partniorstva ŭ Vilni, my razam ź inšymi vysokapastaŭlenymi asobami sa Šviecyi i Polščy adpravimsia ŭ vandroŭku va ŭsie stalicy Uschodniaha Partniorstva: Kišynioŭ, Kijeŭ, Tbilisi, Baku, Jerevan i Minsk.

Pierš za ŭsio, my raskažam pra toje, što ŭžo było dasiahnuta — pra zaviaršeńnie pracy nad Pahadnieńniami ab asacyjacyi i zonach volnaha handlu z Hruzijaj, Małdovaj i Ukrainaj. Padpisańnie hetych pahadnieńniaŭ stanie padstavaj dla dalejšaha pahłybleńnia i pašyreńnia kaapieracyi ź ES. My ŭžo padpisali niekalki Pahadnieńniaŭ ab spraščeńni vizavaha režymu, apošniaje ź jakich — z Armienijaj. Dzie-nidzie ŭ prahramie jeŭrapiejskich reformaŭ nazirajecca značny prahres. Šmat času pajšło na ŭdaskanaleńnie tekstaŭ pahadnieńniaŭ i ŭzhadnieńnie biurakratyčnych standartaŭ, adnak my zrabili i realnyja kroki ŭ bok svabodnaha handlu i bieśpieraškodnaha pieramiaščeńnia žycharoŭ krain-udzielnic Uschodniaha Partniorstva.

Pa-druhoje, my paviedamim ab nieabchodnych zachadach dla poŭnaj realizacyi prahramy Uschodniaje Partniorstva. Dla hetaha ad krain-udzielnic prahramy patrabujecca addanaść supolnym kaštoŭnaściam. Taksama nam spatrebiacca abjadnanyja namahańni ŭsich častak hramadstva, kab «vycisnuć» maksimum z novych mahčymaściaŭ. Realnaja transfarmacyja adbudziecca tolki ŭ krainach, jakija prahnuć źmienaŭ.

Zastajučysia viernymi svaim pryncypam, my patrabujem ad Biełarusi vyzvaleńnia palitviaźniaŭ i zaklikajem partnioraŭ paźbiahać praktyki «vybaračnaha pravasudździa». My zaniepakojenyja niekatorym rucham nazad u pytańniach demakratyi. I my pa-raniejšamu čakajem, što Ukraina — pieršy lidar Uschodniaha Partniorstva — zrobić apošni krok nasustrač, što dazvolić padpisać Pahadnieńnie ab asacyjacyi ŭ Vilni.

Jak častyja hości va Uschodniaj Jeŭropie, my viedajem, što vykanać niekatoryja ŭmovy zusim nialohka. Patrabavańni ES mohuć vymahać achviaraŭ, a niekatorym navat pryniasuć straty. Razam z tym, my hłyboka pierakananyja, što zdabytki buduć bolšymi i za hetuju spravu varta ŭziacca.

Usie daśledavańni i ŭvieś nazapašany dośvied havorać na karyść ES i śviedčać pra značnuju ekanamičnuju vyhadu ŭ doŭhaterminovaj pierśpiektyvie. My nazirali taki efiekt na prykładzie krain, jakija stali siabrami ES u 2004 hodzie. Tak, naprykład, tavarazvarot pamiž Polščaj i Šviecyjaj amal padvoiŭsia ciaham niekalkich hod paśla pryniaćcia Polščy ŭ Jeŭrasajuz. My majem i prykład Turcyi ź jaje ekanamičnym cudam, zabiaśpiečanym bolš ščylnymi ekanamičnymi suviaziami ź ES. I my ŭpeŭnienyja, što znoŭ ubačym heta ŭ krainach, jakija padpišuć novyja pahadnieńni ź ES i buduć imi karystacca ŭ poŭnaj miery.

Jeŭraintehracyja stanie ruchavikom reformaŭ. Adaptacyja zakanadaŭstva da jeŭrapiejskich standartaŭ moža vyklikać peŭnyja ciažkaści, adnak my bačyli, jak u kožnaj krainie, što navažyłasia na heta, palapšaŭsia dabrabyt, pavialičvalisia zarobki, a jakaść žyćcia hramadzian rasła. I kaniečnie ž, ES budzie hatovy dapamahčy. Tolki ŭ 2013 hodzie biudžet na padtrymku krain-partnioraŭ skłaŭ bolš za 600 miljonaŭ jeŭra, i čym hłybiejšyja reformy buduć pravodzicca ŭ krainie, tym bolš značnuju padtrymku jany atrymajuć.

Heta nie čysty altruizm, a ŭzajemavyhadnaje supracoŭnictva. Stabilnyja, bahatyja i biaśpiečnyja krainy — najlepšyja susiedzi jak dla nas, tak i dla takich krain, jak Rasija. Padčas našaj vandroŭki my jašče raz vykažam hłybokuju salidarnaść z našymi partniorami, jakija stali abjektam niedalnabačnaj zamiežnaj palityki cisku z metaj prymusić ich admovicca ad dalejšaj intehracyi ź ES.

My spadziajemsia, što Vilenski samit stanie samitam dasiahnieńniaŭ. U toj samy čas jon stanie adpraŭnym punktam hłybiejšaj intehracyi pamiž ES i krainami Uschodniaj Jeŭropy, što pojdzie na karyść usim bakam. Choć my i ŭpeŭnienyja, što dźviery ES adkrytyja dla luboj jeŭrapiejskaj krainy, jakaja žadaje dałučeńnia i adpaviadaje ŭsim kryteryjam, padčas hetaj vandroŭki my nie budziem razdavać abstraktnyja abiacańni, a budziem praktyčna zaachvočvać da dziejańniaŭ.

Usie, ad Minska na paŭnočnym zachadzie i da Baku na paŭdniovym uschodzie, musiać zrazumieć, što ich budučynia vyrašajecca tam, a nie ŭ Varšavie, Stakholmie ci Bruseli. Dla krain-udzielnic Uschodniaha Partniorstva łohika prostaja: hłybinia ich adnosin ź ES budzie naŭprost zaležać vyklučna ad siły ich žadańnia pahłybić hetyja adnosiny. Čym bolš pierakanaŭčaj budzie prahrama jeŭrapiejskich reformaŭ, čym bolš ambitnym budzie šlach jeŭraintehracyi, tym bolš realistyčnym budzie naša bačańnie Jeŭropy, jakaja jość napraŭdu adzinaj i svabodnaj.

• 0
• 0
• 0
• 0
• 0
• 0
• 0
• 0