Hidrołahi paviedamili, što ŭ Biełarusi pačałosia rastavańnie lodu na asobnych rekach, najpierš u paŭdniovych i paŭdniova-zachodnich rehijonach, piša BiełTA.
Jak paviedamlajecca, užo vyzvalilisia ad lodu niekatoryja prytoki Niomana i Soža. Całkam ačyściłasia ad ledzianych utvareńniaŭ raka Śvisłač kala vioski Dzinievičy Bierastavickaha rajona.
Pa stanie na 25 lutaha na bolšaści rek zachoŭvajecca ledastaŭ abo ledastaŭ z pałonkami. Taŭščynia lodu składaje ad 13 da 45 santymietraŭ. U paŭdniovych i paŭdniova-zachodnich rajonach pavialičylisia pałonki i zakrainy, miescami źjaŭlajecca vada na lodzie.
Na bujnych vadaschoviščach — Vilejskim, Čyhirynskim, Salihorskim, Zasłaŭskim, Krasnaja Słabada — a taksama na aziorach Narač, Dryviaty, Čyrvonaje i Łukomskaje zachoŭvajecca sucelnaje ledzianoje pokryva taŭščynioj ad 20 da 42 santymietraŭ.
Rost uzroŭniu vady na 1—14 santymietraŭ za sutki adznačajecca ŭ basiejnach Niomana, Vilii, Prypiaci, na Dniapry ŭ rajonie Oršy i Łojeva, na Biarezinie kala Barysava, na Sožy ŭ Homieli i na šerahu ich prytokaŭ. Najbolš intensiŭny padjom — da 50 santymietraŭ za sutki — nazirajecca na rekach basiejna Buha.
Na race Pcič kala vioski Pieršaja Słabodka Pietrykaŭskaha rajona ŭzrovień vady ŭžo pieravysiŭ adznaku vychadu na pojmu. U najbližejšyja sutki takaja situacyja prahnazujecca i na Vilii kala ahraharadka Ściešycy Vilejskaha rajona.
Pavodle prahnozaŭ, na rekach basiejnaŭ Niomana, Vilii, Buha i Prypiaci rost uzroŭniu vady praciahniecca, a lod budzie dalej rastavać. U basiejnach Dźviny, Dniapra, Biareziny i Soža istotnych źmien u ledzianoj abstanoŭcy pakul nie čakajecca.
Kamientary