Žychar Mahilova, siabar Biełaruskaj sacyjał-demakratyčnaj partyi «Hramada» Ihar Barysaŭ patrabuje ad kiraŭnictva abjadnańnia «Mahiloŭabłaŭtatrans», kab kiroŭcy aŭtobusaŭ prybrali z kabinaŭ mašyn rasijskija ściažki.
U skarzie jon padaje numary aŭtobusaŭ, kiroŭcy jakich pavyviešvali symboliku susiedniaj dziaržavy. Akramia kiraŭnictva «Mahiloŭabłaŭtatransa», zvarot aktyvist adrasavaŭ i va ŭpraŭleńnie idealahičnaj pracy Mahiloŭskaha harvykankamu, paviedamlaje radyjo «Svaboda».
U svaim zvarocie da aŭtobuśnikaŭ aktyvist zaznačaje, što Biełaruś — niezaležnaja kraina, i kab dasiahnuć niezaležnaści, jana prajšła doŭhi šlach praz pakuty i trahiedyi. Vyviešvańnie rasiejskich ściahoŭ u hramadzkich aŭtobusach, davodzić Barysaŭ, — vyklik jak biełaruskaj dziaržaŭnaści, hetak i hramadzianam krainy.
Svaju prychilnaść da toj ci inšaj dziaržavy kiroŭcy aŭtobusaŭ mohuć demanstravać u svaich pryvatnych aŭtamabilach, kaža ŭ zvarocie sacyjał-demakrat Ihar Barysaŭ.
«Jany prosta vychavanyja ŭ savieckaj i rasiejskaj kultury i navat nie zadumvajucca pra toje, što robiać. Tym bolej šmat chto z kiroŭcaŭ pracavaŭ u Rasiei.
Načalnikam ža navat i ŭ hałovy nia moža pryjści, što tut niešta nia tak, bo ŭviečary jany hladziać tyja ž samyja rasiejskija seryjały, filmy pra Vialikuju Ajčynnuju vajnu, rasiejskija naviny, dzie ŭsio rasiejskaje i ruskamoŭnaje», — kamentuje sytuacyju Ihar Barysaŭ.
Aktyvist patrabuje, kab z kiroŭcami aŭtobusaŭ praviali prafilaktyčnyja hutarki, a tym, chto maje rasiejskija ściažki, zrabili zaŭvahu pra niedapuščalnaść vykarystańnia ŭ hramadzkim transparcie zamiežnaj symboliki.
Ihar Barysaŭ kaža, što praciahły čas u Mahilovie nieviadomyja biaspłatna razdajuć rasiejskija ściažki kiroŭcam aŭto. Na kantakt jany nie iduć. Pry sprobie pahutaryć — uciakajuć. Razdajuć maładziony rasiejskuju symboliku, kali mašyny stajać na śviatłaforach.
Hladzi taksama: Henik Łojka – staršyni KDB: «Raźbiaryciesia z handlem rasijskimi ściažkami!»
Kamientary