Łukašenka rasparadziŭsia ŭziać «Kieramin» pad poŭny kantrol

Zadaču davieści da siaredziny 2014 hoda dolu akcyj dziaržavy ŭ AAT «Kieramin» da 80% pastaviŭ Alaksandr Łukašenka 12 listapada padčas naviedvańnia pradpryjemstva.

«Siońnia ŭ dziaržavy prykładna 60% akcyj — mała, toj-sioj niedapracoŭvaje. Heta nie mnie treba. Ja prosta nie chaču, kab vy praź niekalki hadoŭ papraknuli mianie ŭ tym, što ja nie ŭbačyŭ hetaha kradziažu», — skazaŭ kiraŭnik dziaržavy. 

Łukašenka nahadaŭ, što raniej jon pryniaŭ rašeńnie ab viartańni hetaha pradpryjemstva dziaržavie. «Była sproba prysvoić pradpryjemstva vašymi byłymi načalnikami. Heta niapravilna, tak być nie pavinna! Hetaje pradpryjemstva narodnaje, jano było stvorana na srodki naroda i naležyć narodu», — padkreśliŭ jon.

«Chutčej za ŭsio, vas u svoj čas ašukali. Tamu ja daruču Kamitetu dziaržkantrolu i KDB razabracca.

Bačym — pačynajucca parušeńni, tamu zapatrabavali viarnuć dziaržavie, — skazaŭ Łukašenka, źviartajučysia da pracoŭnaha kalektyvu «Kieramina». — Mnoj było pryniata rašeńnie viarnuć akcyi dziaržavie, ale nie zabirać ich, a zapłacić pa minimalnaj canie».

Pavodle słoŭ Łukašenki, kali zamiežny inviestar zachoča nabyć pradpryjemstva, usio budzie prachodzić pa ŭstanoŭlenaj u krainie pracedury. Pry hetym jon zaŭvažyŭ, što paradak pryvatyzacyi pradpryjemstvaŭ u Biełarusi vielmi biurakratyčny.

«Źjavicca achvotny kupić, prapanuje dobruju canu — pahladzim, pradavać ci nie, — skazaŭ kiraŭnik dziaržavy. — Ale my ŭžo najelisia hetych pryvatnikaŭ».

Łukašenka nahadaŭ situacyju z kandytarskaj fabrykaj «Kamunarka», jakaja, pavodle jaho słoŭ, sa źmienaj kiraŭnictva navat u kryzisnyja časy pracuje z prybytkam.

«Usie pryvatniki hladziać u svaju kišeniu. Kali ty stvaryŭ kampaniju z nula — dobra. A kali pryjšoŭ na hatovaje — nieparadak. Ja nie chaču, kab usio było razrabavana», — zajaviŭ kiraŭnik dziaržavy.

«Siońnia popyt na biełaruskija pradpryjemstvy vielizarny, vy heta bačycie. Rasija chacieła b štości kupić, nibyta svajho niama.

A čamu? Tamu što my nie razburyli svajo, a niekatoryja pradpryjemstvy pieratvaryli ŭ kvitniejučyja, jak toj ža «Biełaruśkalij». Pachadzili, pachadzili — chočam.

Ja kažu: płacicie 32 młrd. dalaraŭ, i choć cełaje pradpryjemstva, choć častku kuplajcie.

Maŭlaŭ, doraha. Ja kažu: byvajcie. Pasprabavali inšym šlacham — nie atrymałasia», — skazaŭ Łukašenka.

«Maja zadača — abaranić dziaržavu i jaje ŭłasnaść, — zajaviŭ jon. — Nie kryŭdziciesia na žorstkaść, ciapier čas taki. Ciapier usie vakoł Biełarusi chodziać i, jak vaŭki hałodnyja, zubami laskajuć: dzie b prychapić «Kieramin», «Biełarusnaftu», adzin naftapierapracoŭčy zavod, druhi…

Va ŭsich ruki śviarbiać. I siońnia cisnuć nie tamu, što ja taki kiepski, dyktatar, a tamu, što nie addaju. Tym nie addaŭ na Uschodzie, na Zachadzie nie addaŭ. A chočacca, i ŭziać chočuć za biascenak». «My na heta nie zhodnyja», — padkreśliŭ Łukašenka.

AAT «Kieramin» było stvorana ŭ 1994 u vyniku tak zvanaj lhotnaj pryvatyzacyi dziaržpradpryjemstva «Minskbudmateryjały».

Asnoŭnymi akcyjanierami (92 % akcyj) stali dyrektarat i pracoŭnyja zavoda. Rasstanoŭka ŭ akcyjaniernym kapitale AAT «Kieramin» rezka źmianiłasia ŭ 2011.

U śniežni dziaržava pavialičyła svaju dolu z 3% da 57 %. Niezadoŭha da hetaha Anatol Ciuciunoŭ byŭ vymušany pakinuć pasadu hiendyrektara zavoda.

Jak kažuć na zavodzie, «vierahodna, heta byŭ kampramisny varyjant pamiž pravierkaj i Ciuciunovym». «Syšli» z «Kieraminu» i členaŭ jaho siamji, u tym liku i syna Maksima, jaki staŭ deputatam Minharsavieta, źjaŭlajučysia pieršym namieśnikam Ciuciunova-starejšaha.

Narodnaja pahałoska prypisvała Ciuciunovu kiravańnie pradpryjemstvam z momantu jaho stvareńnia. Anatol Ciuciunoŭ nie staŭ davać vializnych kamientaroŭ, zajaviŭšy tolki, što «siem miesiacaŭ nazad syšoŭ na piensiju».

Pry hetym jon paćvierdziŭ infarmacyju, što zastaŭsia akcyjanieram zavoda. «Čamu b im nie zastavacca», — skazaŭ jon.

Pa słovach byłoha mieniedžara «Kieraminu», «Ciuciunoŭ chacieŭ kansalidavać bujny pakiet akcyj, kab pryciahnuć na zavod inviestara. A razdroblenym pakietam zrabić heta prablematyčna».

U 1995-1996 Anatol Ciuciunoŭ byŭ deputatam Viarchoŭnaha savieta 13-ha sklikańnia. Nie padpisvaŭ impičmient Łukašenku i ŭ 1996 hodzie paśpiachova pieraabrany ŭ Pałatu pradstaŭnikoŭ.

U 2002 hodzie Ciuciunova pryznačyli vice-premjeram va ŭrad Siarhieja Sidorskaha. «U Saviecie ministraŭ budzie zapatrabavany vialiki vopyt kiraŭnictva efiektyŭna pracujučym pradpryjemstvam A. Ciuciunova», — skazaŭ Łukašenka.

Ale praz dva hady Ciuciunova razam sa staršynioj kancerna «Biellespapierapram» Fiodaram Kursam abvinavacili «ŭ nievykanańni daručeńnia prezidenta ab uvodzie ŭ ekspłuatacyju da 7 listapada 2003 druhoj čarhi celułoznaha zavoda ŭ Śvietłahorsku».

Cikava, što Łukašenka ŭznaharodziŭ Anatola Ciuciunova Ordenam Pašany niezadoŭha da nacyjanalizacyi «Kieramina».

• 0
• 0
• 0
• 0
• 0
• 0
• 0
• 0