Dream team

Pa vialikim rachunku ad sioletniaha čempijanatu Eŭropy pa baskietbole siarod žančyn biełaruskija zaŭziatary mała čaho čakali.

Naša zbornaja ŭpieršyniu trapiła na taki turnir. Pryčym, tolki z druhoha miesca ŭ adboračnaj hrupie, tamu i bukmekierami biełaruski razhladalisia, jak aŭtsajder pieršynstva kantynentu. Realnaść ža akazałasia našmat bolš pryjemnaj i niečakanaj, čym papiarednija prahnozy.

U Italii kamanda Anatola Bujalskaha pačała nia vielmi ŭžo ŭdała. Našy dziaŭčaty, choć i z baraćboj, ale sastupili daśviedčanym hišpankam, jakich i ličać hałoŭnymi pretendentkami na «zołata». Za hetym paražeńniem pryjšli dźvie pa‑sapraŭdnamu fejeryčnyja pieramohi ŭ pradstaŭničak Bałkanskaj paŭvyspy — Serbii i Charvatyi. Supiernicy absalutna nia viedali, što rabić z našymi mabilnymi dziaŭčatami. Vieramiejenka, Leŭčanka (jana pahulała navat u žanočaj NBA), Marčanka, Trafimava, Kres i inšyja baskietbalistki vyvieli zbornuju ŭ druhoje koła spabornictvaŭ. Užo heta ŭ niejkaj stupieni źjaŭlałasia sensacyjaj, bo nivodnaja hulniavaja nacyjanalnaj kamanda krainy, aproč chakiejnaj, nie dabivałasia takoha pośpiechu.

Kab vyjści ŭ vosiemku najmacniejšych zbornych Staroha śvietu, dziaŭčatam było dastatkova pieramahčy chacia b u adnym z troch matčaŭ druhoha raŭndu. Adnak zrabić heta było nia tak i prosta. Projhryš u dvanaccać punktaŭ ad mabilnych francužanak, paśla razhrom ad rasijanak. Apošniuju hulniu hrupavoha turniru biełaruskam vypadała syhrać z haspadyniami pieršynstva — italjankami. Niahledziačy na mahutnuju padtrymku trybunaŭ i nie zusim abjektyŭnaje sudziejstva, biełaruski dakazali, što jany macniejšyja — 66:51.

Najbolš vynikovaj u hulni stała Alena Leŭčanka, jakaja nabrała 18 punktaŭ.

Takim čynam, zbornaja traplała ŭ čverćfinał z čaćviortaha miesca ŭ hrupie, a heta aznačała, što nastupnym supiernikam našych dziaŭčat stanuć dziejsnyja čempijonki Eŭropy — češki. Na Apeninach češki taksama paćvierdzili svoj status, prajhraŭšy tolki adnojčy.

Pieršyja chviliny ŭčorašniaha matča za vychad u paŭfinał tolki paćvierdzili mierkavańni skieptykaŭ: biełaruski ź vialikimi namahańniami nabirali svaje punkty, pry hetym biez prablem dajučy zakidać u naš košyk. Adnak da siaredziny pieršaj čverci pačali pamylacca i češki, niekalki niatrapnych kidkoŭ faktyčna dazvolili biełaruskam dahnać supiernic — 15:11. Zatoje ŭ druhoj čverci biełarusak było prosta nie paznać — dakładnyja kidki, stabilnaja hulnia ŭ abaronie, vyjhranyja padbory la abodvuch ščytoŭ. Jak vynik, na vialiki pierapynak biełaruski sychodzili majučy +4 u svaim aktyvie — 31:27.

Treciaja čverć znoŭ zastałasia za češkami. Jany zmahli pierałamić chadu hulni j navat vyjści napierad — 39:41.

Apošniaja čverć pavinna była stać hulnioj nervaŭ, i ŭ hetaj hulni krapčejšymi akazalisia biełaruski. Nibyta začaravany, miač uparta nia jšoŭ u košyk paśla kidkoŭ češak. Pieršym trapny streł jany nanieśli, kali da kanca hulni zastavałasia dźvie z pałovaj chviliny. Na toj momant biełaruski mieli pieravahu ŭ siem punktaŭ. U samaj kancoŭcy matču tryvožna stała tady, kali za sorak sekund da zakančeńnia češki zakinuli z dalokaj adlehłaści, źvioŭšy razryŭ biełarusak usiaho da troch punktaŭ. Adnak Kaciaryna Snycina ŭ dvuch apošnich atakach nabrała sa štrafnych jašče try punkty — 52:46. Biełaruski ŭ paŭfinale!

Chto budzie nastupnym supiernikam našych dziaŭčat, zbornaja Belhii ci Hišpanii, vyrašycca siońnia viečaram. Paŭfinalny matč biełaruski praviaduć u subotu a 19:30. Žyvaja tranślacyja na telekanale «Ład».

Vychad u paŭfinał dla našaj zbornaj aznačaje praciah baraćby za pucioŭku na alimpijskija hulni ŭ Pekin. Jość šaniec trapić tudy i biez kvalifikacyj, dla heta ŭsiaho tolki treba pieramahčy na hetym pieršynstvie. Zastałosia zusim ničoha — vyjhrać dva matčy.

• 0
• 0
• 0
• 0
• 0
• 0
• 0
• 0