Rasija nie suprać zapytanaha Biełaruśsiu na 2014 hod abjomu naftavaha bałansu ŭ 23 młn ton, paviedamiŭ žurnalistam 30 studzienia ŭ Minsku pasoł Rasijskaj Fiederacyi Alaksandr Surykaŭ.
Pavodle jaho słoŭ, z naftavym bałansam «spravy iduć dobra». «Biełaruski bok zajaŭlaje 23 młn ton. My, u pryncypie, nie piarečym suprać hetaj kolkaści, ale pakul padpisali pratakoł na paŭhoda na 11,5 młn. ton, heta značyć paćviardžajem svaju hatoŭnaść da 23 młn. ton», - skazaŭ Surykaŭ.
Kančatkovaja ličba budzie zaležać ad «dalejšych pieramovaŭ, jak składziecca bałans zdabyčy nafty ŭ pieršym paŭhodździ i hetak dalej». «Pakul my tearetyčna hatovyja i praktyčna padpisali na paŭhoda», — adznačyŭ pasoł.
Pa prośbie BiełaPAN Surykaŭ prakamientavaŭ siońniašniuju zajavu Alaksandra Łukašenki ab tym, što «kamuści chaciełasia b intehracyjny prajekt tańniejšy, ci za biaspłatna ŭziać naftapierapracoŭčyja zavody».
Rasiejski pasoł skazaŭ, što ź intehracyjnymi prajektami «nijakich prablem niama». «Alaksandr Ryhoravič siońnia skazaŭ, što my chočam intehravacca, ale na jasnych i zrazumiełych umovach», - adznačyŭ Surykaŭ.
Pa słovach dypłamata, słovy Łukašenki ab sprobie kupić niejkija biełaruskija pradpryjemstvy tanna adnosilisia da rasijskaj praktyki pryvatyzacyi 90-ch hadoŭ minułaha stahodździa.
U kiraŭnictvie ŭrada RF raniej zajaŭlali, što padpisańnie naftavaha bałansu ź Biełaruśsiu budzie zaležać ad usiaho kompleksu dvuchbakovych adnosin.
Viadoma, što pytańnie ab pastaŭkach nafty rasijski bok uviazvaje z realizacyjaj piaci intehracyjnych prajektaŭ, jakija praduhledžvajuć stvareńnie sumiesnych biełaruska -rasijskich chołdynhaŭ abo pryvatyzacyju biełaruskich pradpryjemstvaŭ Rasijaj. Ab realizacyi takich prajektaŭ bolš za hod tamu damovilisia premjer-ministry Michaił Miaśnikovič i Dźmitryj Miadźviedzieŭ, adnak dalej damoŭlenaściej sprava pakul nie pajšła. U zaciahvańni pieramovaŭ rasiejski bok abvinavačvaje biełaruskich partnioraŭ.
Kamientary