U minskim raddomie pamierła maładaja nastaŭnica: rodnyja vinavaciać daktaroŭ
Nastaŭnica staličnaj škoły №30 Hanna Jakutovič naradziła svajo pieršaje dzicia. Adnak z raddoma viarnułasia tolki maleńkaja dačka. Nieŭzabavie paśla rodaŭ Hanna ŭpała ŭ komu i pamierła.
«Padaryła dačku na hadavinu»
Andrej, muž Hanny, dahetul znachodzicca ŭ šoku. «Jana była absalutna zdarovaja, kali jaje zabrali ŭ raddom. I naradziła absalutna zdarovuju dziaŭčynku na hadavinu viasiella — my pabralisia šlubam jakraz 12 studzienia hod tamu».
Bolš padrabiazna pra padziei miesiačnaj daŭniny raskazvaje Darja Hančarenka, svajačka Andreja.
«11 studzienia ŭviečary ŭ Hanny adyšli vody. Jana i jaje maci vyklikali «chutkuju», ich advieźli ŭ šosty raddom. Paśla maci źjechała dadomu. Rankam 12 studzienia Hanna naradziła zdarovaje dzicia. Paśla hetaha jana ni razu nie vyjšła na suviaź. A ŭdzień nam paviedamili, što ŭ Hanny adkryŭsia matačny kryvaciok, i jana ŭpała ŭ komu. 15 studzienia jaje nie stała…»
Viersija miedykaŭ
«Supracoŭniki balnicy skazali, što rody prajšli dobra. Kali praź dźvie hadziny ŭ Hanny pačaŭsia kryvaciok, adrazu vyklikali reanimacyjnuju bryhadu na čale z namieśnikam hałoŭnaha doktara Uładzimiram Silavam. Jany zrabili ci dźvie, ci try apieracyi: spačatku vydalili reštki płacenty. Heta nie spyniła kryvaciačeńnie, tamu Hańnie vydalili matku. Uzhadvali i pra treciuju apieracyju, kazali niešta pra mijomu.
Paśla apieracyj stan Hanny nie palepšyŭsia, jaje padłučyli da aparata štučnaha zabieśpiačeńnia žyćciadziejnaści.
Čamuści nam pastajanna nahadvali: «Hałoŭnaje, kab vytrymała serca». 14 studzienia ŭ Hanny spyniłasia serca. Ale miedyki nibyta praviali dyfiebrylacyju i zapuścili jaho. 15 studzienia, kali Hanny pamierła, patłumačyli, što ŭ jaje nie vytrymali nyrki», — kaža Darja.
«Pamierła jašče dvanaccataha»
Adnak Darja i Andrej nie vierać lekaram. Jak miedyki mahli prahladzieć masiŭny kryvaciok, što pryviało da komy i letalnaha kanca?
Darja raskazvaje, što ź joj ananimna padzialilisia akaličnaściami vypadku z Hannaj: «Hannu, paprostu kažučy, nie dahladzieli. Choć jana znachodziłasia nie ŭ vielmi dobrym stanie, jaje vykacili z radavoj zały na kalidor — adtul potym paradzich razvoziać pa pałatach. Vidać, za stanam Hanny nichto nie sačyŭ: jakraz išła pieraźmienka. Schamianulisia praź dźvie hadziny, kali kryvastrata dasiahnuła dvuch litraŭ. Mienavita tady ŭ jaje i spyniłasia serca. Sercabićcio adnavili, ale na toj momant mozh užo pamior, tamu Hanna skanała tady, 12-ha».
Krynica z 8-j balnicy, dzie Hanna ŭletku lažała «na zachavańni», paćvierdziła «NN» dobraje ciačeńnie jaje ciažarnaści. A 12 studzienia ŭ 6-ty raddom dla kansultacyi nibyta byŭ vyklikany śpiecyjalist Ministerstva zdaroŭja pa hiniekałahičnych pytańniach, jaki paśla ŭzhadvaŭ, što daktary «pravaronili» kryvaciok.
«Sami spytajcie ŭ vašaj žonki!»
Darja Hančarenka ŭzhadvaje i niehatyŭny dośvied kamunikacyi ź piersanałam balnicy. «Kali Hanna ŭpała ŭ komu, my pajšli da Silavy. Adnak jon pavodziŭ siabie absalutna niavietliva, adkazaŭ Andreju: «Zapytajciesia ŭ svajho dziciaci i svajoj žonki sami».
Siamja Hanny vyrašyła davieści spravu da kanca i znajści vinavatych u śmierci žančyny i źviarnułasia da advakata.
Prosić nie pakidać spravu i kalektyŭ škoły №30 h. Minska, dzie vykładała Hanna. Mienavita jany ŭhavaryli Andreja pajści na kantakt sa ŚMI:
«Dla nas heta važna, bo ŭ nas pracujuć maładyja žančyny, i jany taksama chočuć naradzić dzicia, ale paśla vypadku z Hannaj prosta strašna».
Małoje dzicia zabrali da siabie babula i dziadula, baćki Hanny.
Na momant padrychtoŭki publikacyi ŭziać kamientary pradstaŭnikoŭ Ministerstva achovy zdaroŭja i Kamiteta pa achovie zdaroŭja Minharvykankama nie atrymałasia.
Hałoŭny doktar 6-j kliničnaj balnicy Viktar Hurko, pačuŭšy pytańnie pra byłuju pacyjentku balnicy, chutka pramoviŭ, što nie moža ničoha kamientavać, i kinuŭ słuchaŭku.
Ciapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary