Lidar «Pravaha siektara» moža stać namieśnikam staršyni Rady biaśpieki Ukrainy. Chto taki Dźmitryj Jaraš

Rada Majdana i narodnyja deputaty ŭzhadnili kandydatury na niekatoryja pasady va ŭradzie narodnaha davieru.

Jak paviedamiŭ ahienctvu «Interfaks-Ukraina» adzin z udzielnikaŭ pasiadžeńnia, užo prahałasavali pa kandydaturach na pasadu ministra kultury — zasłužanaha artysta Ukrainy Jaŭhiena Niščuka, ministra ekanomiki — zasnavalnika Kijeva-Mahilanskaj biźnies-škoły, prezidenta Kijeŭskaj škoły ekanomiki Paŭła Šaramiety (nie błytać ź biełaruskim žurnalistam Paŭłam Šaramietam), ministra moładzi i sportu — aktyvista Aŭtamajdanu Dźmitryja Bułatava.

Na pasadu sakratara Rady nacyjanalnaj biaśpieki i abarony ŭzhodniena kandydatura narodnaha deputata frakcyi «Baćkaŭščyna» Andreja Parubija, na pasady jaho namieśnikaŭ — kandydatury vykanaŭčaha dyrektara Instytuta masavaj infarmacyi Viktoryi Siumar i lidara «Pravaha siektara» Dźmitryja Jaraša.

Chto taki Dźmitryj Jaraš

Revalucyja naradžaje novych lidaraŭ i hierojaŭ. 42-hadovy Dźmitryj Jaraš staŭ adnym z samych zaŭvažnych piersanažaŭ Majdana. Dužy, karotka stryžany, zaŭsiody ŭ kamuflažy.

Jahony «Pravy siektar» byŭ adnym z hałoŭnych ruchavikoŭ Majdana. Hetyja chłopcy davali adpor «bierkutaŭcam». Spačatku kamianiami i pietardami, paśla ŭ ich źjaviłasia zbroja. «U nas dastatkova pistaletaŭ, kab abaranić Ukrainu ad akupantaŭ», — kazaŭ Jaraš.

«Zdabudzieš ukrainskuju dziaržavu ci zahinieš u baraćbie za jaje», — tak hučyć pieršy zapaviet ukrainskaha nacyjanalista. Na Majdanie mnohija ź ich sapraŭdy paŭstali pierad takim vybaram – zahinuć ci praciahvać zmahańnie. Da hetaha mnohija stavilisia da nacyjanalistyčnych arhanizacyj krychu pabłažliva. Maŭlaŭ, chłopcy hulajucca ŭ vajnušku, a jak budzie sapraŭdnaja zavaruška, to navalać u portki. Skieptykaŭ u hetym pytańni pasaramacili.

«Pravy siektar» — heta kanfiederacyja nacyjanalistyčnych arhanizacyj, u jaje skład uvachodzić słavutaje ŭ 90-ch UNA-UNSO, «Patryjot Ukrainy», «Bieły Mołat», «Vola», «Tryzub». I ŭźnikła hetaje ŭtvareńnie ŭ pieršyja dni Majdanu. Pieršapačatkova lidara ŭ «Pravym siektary» nie było, ale z padziejami stała bolš jaskrava akreślivacca postać Dźmitryja Jaraša, lidara «Tryzuba».

Jon rodam z Uschodniaj Ukrainy, Dnieprapiatroŭskaj vobłaści. Ad kanca 90-ch uvachodziŭ u patryjatyčnyja arhanizacyi. Spačatku byŭ siabram Ruchu (anałah našaha BNF). Pastupleńnie na fiłfak Drahobyčskaha pieduniviersiteta było vyrašalnym u losie Jaraša.

Drahobyč, horad u Lvoŭskaj vobłaści, pryniata ličyć radzimaj arhanizacyi «Tryzub» (heta nazva staražytnaha ŭkrainskaha hierba), jakaja ŭ baraćbie kirujecca pryncypami i zapavietami Ściapana Bandery. U Drahobyčy tady vykładaŭ Vasil Ivanišyn, lidar i stvaralnik «Tryzuba». Darečy, adnym ź siabroŭ «Tryzuba» byŭ budučy prezident Kijeva-Mahilanskaj Akademii i patencyjny ministr adukacyi Siarhiej Kvit.

«Tryzub» stavić pierad saboj try zadačy: 1. Prapahanda ideałohii ŭkrainskaha nacyjanalizmu ŭ interpretacyi Bandery. 2. Vychavańnie patryjatyzmu ŭ moładzi. 3. Abarona honaru i hodnaści ŭkrainskaj nacyi lubymi srodkami.

U 2007-m, paśla śmierci Ivanišyna, mienavita Dźmitryj Jaraš staŭ novym pravadyrom arhanizacyi.

Takimi, jak Jaraš pałochajuć na rasijskich telekanałach. Karavuł, fašyst, banderaviec! Na heta mužčyna adkazvaje: «Ja nie razumaju niejkich rasisckich rečaŭ. Na Majdanie za Ukrainu zahinuŭ biełarus, armianin z Dnieprapiatroŭska. Jany mnie bolšyja braty, čym kamunistyčnyja śvińni, jakija źjaŭlajucca etničnymi ŭkraincami».

I jašče dadaje: «Kala 40% siabroŭ «Pravaha siektaru» – heta ruskamoŭnyja ludzi. Ni pra jakuju prymusovuju «ŭkrainizacyju» my nie havorym».

Lidar «Pravaha siektaru» žanaty. Jon maje troch dziaciej. Dačka ad samaha malenstva była ŭ «Tryzubie». «Apošni raz siamju bačyŭ na Kalady. Jany va Ukrainie, ale daviałosia źmianić miesca žycharstva», — kaža Jaraš.

Dvaccać piać hadoŭ jon byŭ u ciani, nie vychodziŭ u vialikuju palityku. Majdan daŭ takuju mahčymaść. Sam Jaraš nie vyklučaje, što «Pravy siektar» moža pieraraści ŭ palityčnuju arhanizacyju.

«Toje, što va Ukrainie raskoł — heta vialikaja chłuśnia. Janukovič, daj Boh jamu zdaroŭja, abjadnaŭ krainu».

• 0
• 0
• 0
• 0
• 0
• 0
• 0
• 0