«Jak staršynia Savieta ministraŭ Aŭtanomnaj Respubliki Krym, ja realizuju paŭnamoctvy, uskładzienyja na mianie Viarchoŭnaj radaj AR Krym, prymaju rašeńnie ab časovym pierapadparadkavańni złučeńniaŭ i častak siłavych struktur MUS, SBU, Uzbrojenych siłaŭ, MNS, fłota, padatkovaj słužby, pamiežnikaŭ niepasredna mnie. Usim kamandziram vykonvać tolki maje zahady i rasparadžeńni, niazhodnych prašu pakinuć słužbu», — zajaviŭ Siarhiej Aksionaŭ, pryznačany premjeram Kryma na pasiedžańni 27 lutaha, u zachoplenym uzbrojenymi ludźmi budynku parłamienta aŭtanomii.
«Zychodziačy z vyšej skazanaha, razumiejučy svaju adkaznaść za žyćcio i biaśpieku hramadzian, ja źviartajusia da prezidenta Rasijskaj Fiederacyi Uładzimira Pucina ab akazańni sadziejničańnia ŭ zabieśpiačeńni miru i spakoju na terytoryi AR Krym», — cytujuć zvarot S.Aksionava rasijskija infarmacyjnyja ahienctvy.
«Pryznačeńnie na pasadu kiraŭnika krymskaj milicyi Ihara Avruckoho, a taksama najaŭnaść na terytoryi aŭtanomii nieapaznanych uzbrojenych hrup, bajavoj techniki i niazdolnaść siłavych struktur, raźmieščanych u ARK, efiektyŭna kantralavać situacyju na terytoryi respubliki, vyklikali biesparadki z užyvańniem ahniastrelnaj zbroi», — havorycca ŭ zajavie.
Pavodle zakonaŭ Ukrainy, siłavyja struktury padparadkoŭvajecca centralnaj uładzie, aŭtanomija i rehijony nie majuć prava padparadkoŭvać vojska, fłot i SBU. Zajava Aksionava moža traktavacca jak uzbrojeny miaciež.
Adnak centralnyja ŭłady krainy naŭrad ci zdolnyja ažyćciavić svaje paŭnamoctvy ŭ Krymie, bo častki Čarnamorskaha fłota majuć značnuju pieravahu ŭ žyvoj sile i technicy. Akramia taho, 26—28 lutaha ŭzbrojenyja ludzi biez apaznavalnych znakaŭ, imavierna, rasijski śpiecnaz, zachapili aeraporty, infrastrukturu i ŭziali pad kantrol darohi.
Prezident ZŠA Abama na śpiecyjalnym bryfinhu ŭ Vašynhtonie zajaviŭ, što za luboje zbrojnaje ŭmiašańnie Rasii ŭ Krymie budzie mieć svoj košt.
***
«Rasija biez uvahi hety zvarot nie pakinie», — zajavili ŭ administracyi prezidenta RF u suviazi sa zvarotam Aksionava, pieradaje RIA Naviny.
Kamientary