Pavodle źviestak Centrvybarkama, za čatyry dni daterminovaha hałasavańnia na vybarach deputataŭ miascovych savietaŭ prahałasavali ŭžo 1 młn 737 tys. 16 čałaviek, abo 24,92% ad ahulnaj kolkaści biełaruskich vybarščykaŭ.
Daterminovaje hałasavańnie pačałosia 18 sakavika i zaviaršajecca siońnia.
Najbolš aktyŭna hałasujuć u Homielskaj (26,02%) i Viciebskaj (25,95%) abłaściach, a taksama ŭ Minsku (25,88%). U Mahiloŭskaj vobłaści daterminova prahałasavali 25,43% vybarščykaŭ, u Minskaj — 24,38%, u Bresckaj — 23,57%. Najmienšaja jaŭka vybarščykaŭ nazirajecca ŭ Hrodzienskaj vobłaści — 22,63%.
Na paŭtornych vybarach deputata Pałaty pradstaŭnikoŭ pa Homielskaj-Novabielickaj akruzie № 36 prahałasavali 18,34% vybarščykaŭ.
Varta zaznačyć, što z kožnym dniom hałasavańnia jaŭka vybarščykaŭ była bolšaj, čym u papiaredni dzień. Tak, u pieršy dzień daterminova prahałasavali 3,82% vybarščykaŭ, druhi — 5,99%, treci — 6,99%, čaćviorty — 8,12%.
Pradstaŭniki apazicyi nieadnarazova zajaŭlali pra nieabchodnaść admieny ci abmiežavańnia daterminovaha hałasavańnia. Pavodle ich źviestak, mienavita ŭ čas daterminovaha hałasavańnia mahčymyja masavyja falsifikacyi — naprykład ukidavańnie ci zamiena biuleteniaŭ u načny čas, kali naziralniki nie majuć mahčymaści sačyć za zachavanaściu skryniaŭ dla hałasavańnia. Aprača taho, pavodle źviestak niezaležnych naziralnikaŭ i pravaabaroncaŭ, padčas daterminovaha hałasavańnia ŭłady aktyŭna zadziejničajuć administracyjny resurs, kab pavialičyć jaŭku vybarščykaŭ za košt studentaŭ, vajennasłužačych, rabotnikaŭ dziaržustanoŭ.
Niezaležnyja naziralniki i pravaabaroncy zajaŭlajuć pra masavyja parušeńni zakanadaŭstva padčas ciapierašniaj vybarčaj kampanii. Samyja raspaŭsiudžanyja ź ich: prymušeńnie da daterminovaha hałasavańnia, zavyšeńnie jaŭki vybarščykaŭ, stvareńnie pieraškod u pracy niezaležnych naziralnikaŭ.
Asnoŭny dzień hałasavańnia pa vybarach deputataŭ miascovych savietaŭ — 23 sakavika. Vybarčyja ŭčastki adkryjucca ŭ 8.00 i buduć pracavać da 20.00.
Vybary prachodziać u 1.328 miascovych savietaŭ deputataŭ pa 18.816 vybarčych akruhach. Kandydatami ŭ deputaty miascovych savietaŭ zarehistravanyja bolš jak 22 tysiačy čałaviek.
Kamientary