Паводле звестак Цэнтрвыбаркама, за чатыры дні датэрміновага галасавання на выбарах дэпутатаў мясцовых саветаў прагаласавалі ўжо 1 млн 737 тыс. 16 чалавек, або 24,92% ад агульнай колькасці беларускіх выбаршчыкаў.
Датэрміновае галасаванне пачалося 18 сакавіка і завяршаецца сёння.
Найбольш актыўна галасуюць у Гомельскай (26,02%) і Віцебскай (25,95%) абласцях, а таксама ў Мінску (25,88%). У Магілёўскай вобласці датэрмінова прагаласавалі 25,43% выбаршчыкаў, у Мінскай — 24,38%, у Брэсцкай — 23,57%. Найменшая яўка выбаршчыкаў назіраецца ў Гродзенскай вобласці — 22,63%.
На паўторных выбарах дэпутата Палаты прадстаўнікоў па Гомельскай-Новабеліцкай акрузе № 36 прагаласавалі 18,34% выбаршчыкаў.
Варта зазначыць, што з кожным днём галасавання яўка выбаршчыкаў была большай, чым у папярэдні дзень. Так, у першы дзень датэрмінова прагаласавалі 3,82% выбаршчыкаў, другі — 5,99%, трэці — 6,99%, чацвёрты — 8,12%.
Прадстаўнікі апазіцыі неаднаразова заяўлялі пра неабходнасць адмены ці абмежавання датэрміновага галасавання. Паводле іх звестак, менавіта ў час датэрміновага галасавання магчымыя масавыя фальсіфікацыі — напрыклад укідаванне ці замена бюлетэняў у начны час, калі назіральнікі не маюць магчымасці сачыць за захаванасцю скрыняў для галасавання. Апрача таго, паводле звестак незалежных назіральнікаў і праваабаронцаў, падчас датэрміновага галасавання ўлады актыўна задзейнічаюць адміністрацыйны рэсурс, каб павялічыць яўку выбаршчыкаў за кошт студэнтаў, ваеннаслужачых, работнікаў дзяржустаноў.
Незалежныя назіральнікі і праваабаронцы заяўляюць пра масавыя парушэнні заканадаўства падчас цяперашняй выбарчай кампаніі. Самыя распаўсюджаныя з іх: прымушэнне да датэрміновага галасавання, завышэнне яўкі выбаршчыкаў, стварэнне перашкод у працы незалежных назіральнікаў.
Асноўны дзень галасавання па выбарах дэпутатаў мясцовых саветаў — 23 сакавіка. Выбарчыя ўчасткі адкрыюцца ў 8.00 і будуць працаваць да 20.00.
Выбары праходзяць у 1.328 мясцовых саветаў дэпутатаў па 18.816 выбарчых акругах. Кандыдатамі ў дэпутаты мясцовых саветаў зарэгістраваныя больш як 22 тысячы чалавек.
Цяпер чытаюць
Полк Каліноўскага паведаміў пра гібель трох байцоў2
Каментары