U Łojeŭskim rajonie pjanyja rasiejcy sa strelbami na Land Rover uciakali ad DAI i prataranili słužbovy aŭtamabil

Na nieadnarazovyja patrabavańni ab prypynku kiroŭca nijak nie reahavaŭ i adzin za adnym ździajśniaŭ niebiaśpiečnyja manieŭry, paviedamlaje pres-słužba UUS Homielskaha abłvykankama.

Načalnik DAI Łojeŭskaha RAUS na trasie Łojeŭ — Rečyca pieraśledvaŭ Land Rover z rasijskimi numarami. Miarkujučy pa niebiaśpiečnym manieŭram, jakija ździajśniaŭ kiroŭca pazadarožnika, možna było mierkavać, što jon znachodzicca ŭ stanie ałkaholnaha apjanieńnia. Na nieadnarazovyja patrabavańni ab prypynku kiroŭca nijak nie reahavaŭ.

U niejki momant supracoŭniku DAI ŭdałosia zahnać parušalnika ŭ tupik. Adnak kiroŭca pazadarožnika pasprabavaŭ razharnucca ŭ abmiežavanaj prastory. U vyniku hetaha manieŭru jon urezaŭsia ŭ słužbovy aŭtamabil DAI.

Na miesca zdareńnia prybyŭ načalnik Łojeŭskaha RAUS.

«U sałonie aŭtamabila byli znojdzieny bojeprypasy da palaŭničaj zbroi. Asoba kiroŭcy była adrazu ŭstanoŭlenaja. Im akazaŭsia hramadzianin Rasijskaj Fiederacyi, jaki, darečy, pracuje na pasadzie miedbrata psichijatryčnaj balnicy prymusovaha lačeńnia», — paviedamili ŭ milicyi rehijonu.

U mašynie znachodziŭsia jašče adzin rasiejec, taksama ŭ stanie apjanieńnia. U chodzie jaho apytańnia udałosia vyśvietlić, što ŭ sałonie znachodzicca jašče i traŭmatyčny pistalet — kopija PM, a taksama 425 palaŭničych patronaŭ dvanaccataha kalibra.

Jak vyśvietliłasia, troje hramadzian RF zaklučyli dahavor i zrabili apłatu dla ŭdziełu ŭ interpalavańni na terytoryi Łojeŭskaha rajona. Pa prybyćci raźmiaścilisia na bazie adpačynku ŭ vioscy Čaplin. Adnak ranišniaje palavańnie nie zadałosia. Jak pryznalisia palaŭničyja, jany zrabili kala sta strełaŭ — i ŭsio mima, źniervavalisia i vypili. Pryčym zbroju ŭ RAUS na adkaznaje zachoŭvańnie nie zdali, jak patrabuje dziejučaje zakanadaŭstva. A zatym pryniali rašeńnie źjeździć u harpasiołak dla dazapraŭki aŭtamabila. Prynamsi, tak jany rastłumačyli milicyjantam.

Treciaha palaŭničaha znajšli na bazie adpačynku — jon byŭ mocna pjany. Zbroja prosta valałasia pad łožkami. Supracoŭniki milicyi kanfiskavali try palaŭničyja strelby dvanaccataha kalibra i jašče 313 patronaŭ.

Paśla razhladu zbroja była kanfiskavana i źmieščana ŭ Łojeŭski RAUS.

Za kiravańnie ŭ pjanym vyhladzie kiroŭca byŭ pryciahnuty da administracyjnaj adkaznaści i pakarany štrafam u pamiery 6.500.000 z pazbaŭleńniem pravoŭ na 5 hadoŭ (za «pjanku» i DTZ pa sukupnaści). Za parušeńnie praviłaŭ abychodžańnia z ahniastrelnaj zbrojaj rasiejec zapłaciŭ štraf u pamiery 750 tys. rubloŭ. I naprykancy jamu zabaranili ŭjezd u Biełaruś terminam na adzin hod.

Hości viali siabie adkryta pa-chamsku: navat da kasy banka dla apłaty štrafu mužčyny sprabavali prarvacca biez čarhi, adsunuŭšy ŭ bok piensijanieraŭ, kažuć u milicyi.

Da administracyjnaj adkaznaści byŭ pryciahnuty i dyrektar ustanovy «Łojeŭskaja rajonnaja arhanizacyjnaja struktura» hramadskaha abjadnańnia «Biełaruskaje tavarystva palaŭničych i rybałovaŭ».

• 0
• 0
• 0
• 0
• 0
• 0
• 0
• 0