Karlukievič i Badak atrymali ad Rasii pa $28 tysiač

Aleś Karlukievič — dyrektar vydavieckaha doma «Źviazda» i hałoŭny redaktar adnajmiennaj haziety, Aleś Badak — namieśnik dyrektara, hałoŭred časopisa «Nioman». Jany stali łaŭreatami miždziaržaŭnaj premii «Zorki Sadružnaści» za 2013.

Premija ŭručajecca štohod za bujny ŭniosak i dasiahnieńni ŭ halinie navuki i adukacyi, humanitarnaj dziejnaści, jakija adpaviadajuć ŭzroŭniu suśvietnych dasiahnieńniaŭ i spryjajuć supracoŭnictvu krain SND. Adpaviedna, try naminacyi: navuka i adukacyja, kultura i mastactva, humanitarnaja dziejnaść.

U kožnaj naminacyi prysudžajucca try premii pa 2 miljony rasijskich rubloŭ (56 tysiač dalaraŭ). Biełarusy premiju padzialili miž saboj, to bok pa 28 tysiač dalaraŭ.

Za što ŭručajuć takija sumy?

Badaka i Karlukieviča adznačyli za realizacyju prajekta pa vydańni knižnaj sieryi na rasijskaj movie «Suhučča sercaŭ». U kožnym tomie ź sieryi (usiaho 11 knih) pradstaŭleny mastackija tvory adnoj zamiežnaj krainy (Małdova, Tadžykistan, Rasija, Uźbiekistan…) i biełaruskich aŭtaraŭ: usie pierakłady, zrazumieła, pa-rasijsku. Vartaść takich knižak sumnieŭnaja. Možna zrazumieć, kali b jany rabilisia na nacyjanalnych movach kožnaj krainy. A tak vydańni skiravany tolki na rusifikacyju.

Prajekt finansavaŭsia Ministerstvam infarmacyi Biełarusi. Miž inšym, aŭtaram idei i kaardynataram sieryi źjaŭlajecca Lilija Ananič, pieršaja namieśnica ministra infarmacyi, Karklukievič — staršynia redakcyjnaj rady sieryi, Badak — układalnik sieryi.

Jak adbyvajecca vyłučeńnie kandydataŭ na premiju? Heta robiać urady krain SND albo ŭpaŭnavažanyja imi orhany. Zatym prachodziać ekśpiertyzy vysunutych rabot. Ad kožnaj krainy vysoŭvajecca pa adnym kandydacie na kožnuju naminacyju. Kandydaty razhladajucca Radaj, u skład jakoj uvachodziać členy Rady pa humanitarnym supracoŭnictvie dziaržaŭ SND (RHS) i Praŭleńnie Miždziaržaŭnaha fondu humanitarnaha supracoŭnictva dziaržaŭ-udzielnic SND (MFHS), a taksama pa dva čałavieki ad kožnaj krainy — znanyja dziejačy navuki, adukacyi, kultury i mastactva, hramadskija dziejačy. U składzie Rady pracujuć try hrupy — pa naminacyjach.

Ad Biełarusi ŭ pracy Rady brali ŭdzieł Aleh Pralaskoŭski — ministr infarmacyi, staršynia Rady pa humanitarnym supracoŭnictvie dziaržaŭ-udzielnic SND, Barys Śviatłoŭ — ministr kultury, člen Praŭleńnia MFHS, Siarhiej Kilin — hałoŭny navukovy sakratar Akademii navuk, Ihar Krasnoŭ — daradca Pasolstva Biełarusi ŭ Rasii (biełaruskaja hrupa samaja vialikaja). Spansuje Miždziaržaŭny fond humanitarnaha supracoŭnictva dziaržaŭ-udzielnic SND.

Admietna, što ŭ minułym hodzie hetuju ž premiju atrymaŭ staršynia Sajuza piśmieńnikaŭ Biełarusi Mikałaj Čarhiniec. Jaho adznačyli ŭ naminacyi kultura i mastactva. A Karlukieviča mnohija nazyvajuć patencyjnym nastupnikam Čarhinca na pasadzie kiraŭnika aficyjnaha Sajuza piśmieńnikaŭ.

Miž inšym, u minułym hodzie arhanizacyja ŭviała pasadu hanarovaha staršyni. Mikałaju Čarhincu, darečy, užo 76 hadoŭ.

Karlukievič — adstaŭny vajskoviec. Jon zajmajecca krajaznaŭstvam i piša dziciačyja knižki. Da prychodu ŭ «Źviazdu» jon uznačalvaŭ chołdynh «Litaratura i mastactva», jašče raniej — byŭ karespandentam «Sovietskoj Biełoruśsii», «Vo słavu Rodinie», redaktaram «Čyrvonaj źmieny» (pry im jana spyniła vychad).

Badak — paet, aŭtar šerahu knižak dla dziaciej i padletkaŭ. U 1990-ch na jaho słovy vykonvali pieśni Alaksandr Saładucha, Anatol Jarmolenka, Alesia. Paśla abjadnańnia litaraturna-mastackich časopisaŭ i tydniovika ŭ chołdynh, pracavaŭ u jaho struktury, a zatym staŭ namieśnikam Karlukieviča.

Premija «Zorki Sadružnaści» zaćvierdžana ŭ 2009 RHS i MFHS. Raniej łaŭreatami ź Biełarusi stanavilisia śpiavak Anatol Jarmolenka, kampazitar Ihar Łučanok, kalektyŭ navukovych supracoŭnikaŭ Abjadnanaha instytuta prablem infarmatyki Akademii navuk, kalektyŭ dziciačaha adukacyjna-azdaraŭlenčaha centra «Zubrania».

Miž inšym, u halinie humanitarnaj dziejnaści łaŭreatami byli žonka prezidenta Azierbajdžana Miechryban Alijeva i žonka kazachstanskaha kiraŭnika Sara Nazarbajeva.

• 0
• 0
• 0
• 0
• 0
• 0
• 0
• 0