Słužba biaśpieki Ukrainy vykryła i spyniła złačynnuju dziejnaść ekstremisckaj terarystyčnaj hrupy, tak zvanaj «Bryhady apieratyŭnaha reahavańnia», jakaja z krasavika dziejničała ŭ Adeskaj vobłaści.
Jak paviedamiła ŭ piatnicu pres-słužba SBU, lidar «bryhady», 35-hadovy žychar Adesy, jaki doŭhi čas pražyvaŭ u AR Krym, raspracavaŭ i raźmiaściŭ u internecie dapamožnik «Płan pierachopu ŭłady» z kankretnymi rekamiendacyjami zbrojnaha supracivu dziejučaj uładzie.
SBU vyśvietliła, što ŭdzielniki hetaj ekstremisckaj hrupoŭki faktyčna dziejničali pa zamovie adnaho z rasijskich telekanałaŭ, atrymlivajučy materyjalnaje ŭznaharodžańnie za kožnuju akcyju — stvareńnie nieabchodnaj rasijskim televizijnikam «karcinki».
«Udzielniki hrupy raspaŭsiudžvali ahitacyjnyja materyjały, nakiravanyja na hvałtoŭnaje źmianieńnie abo źviaržeńnie kanstytucyjnaha ładu ci zachop dziaržaŭnaj ułady, ažyćciaŭlali roznaha rodu pravakacyjnyja akcyi i ekstremisckija dziejańni, akazvali mietadyčnyja rekamiendacyi pa vyrabie tak zvanych «kaktejlaŭ Mołatava».
Akramia hetaha, jany zapałochvali hramadzian, jakija padtrymlivali dziejnaść Jeŭramajdana, padpalvali ofisnyja pamiaškańni, pryvatnyja damy, kvatery, mašyny, kramy», — havorycca ŭ paviedamleńni SBU.
U viedamstvie adznačyli, što ŭ noč na 20 krasavika hrupa ździejśniła sprobu padpału adnaho z adeskich supiermarkietaŭ.
Akramia taho, ustanoŭlena, što złamyśniki płanavali zładzić u Adesie pravakacyi na 9 maja. Jany źbiralisia, pa ich słovach, «cynična teraryzavać» vieteranaŭ, u dalejšym abvinavaciŭšy ŭ hvałtoŭnych dziejańniach praŭkrainskija siły.
25 krasavika supracoŭniki SBU zatrymali pieciarych udzielnikaŭ hetaj złačynnaj hrupy pry sprobie padpału «kaktejlami Mołatava» ofisa adnaho z adździaleńniaŭ PAO «PryvatBank».
Pry ahladzie aŭtamabila zatrymanych kanfiskavana ahniastrelnaja zbroja z patronami, reštki zapalnaj sumiesi i srodki videazdymak, na jakija złamyśniki fiksavali svaje supraćpraŭnyja dziejańni.
Kiravańniem SB Ukrainy ŭ Adeskaj vobłaści raspačata kryminalnaja vytvorčaść pa st.109 (dziejańni, nakiravanyja na hvałtoŭnaje źmianieńnie abo źviaržeńnie kanstytucyjnaha ładu ci na zachop dziaržaŭnaj ułady) i č.2 art.194 (naŭmysnaje źniščeńnie abo paškodžańnie majomaści).
Ciapier čytajuć
«Da akcyi dałučylisia tolki marhinały». Što pisaŭ u čatach paśla svajho vykryćcia kadebešnik, adkazny za biełaruskuju emihracyju1
Kamientary