Nijakaha «Ruskaha maršu» kłub zaŭziataraŭ Russia Unites arhanizoŭvać nie płanuje, zajaviŭ prezident kłuba Eduard Łatypaŭ.
U kamientary, raźmieščanym 30 krasavika na sajcie Russia Unites, adznačajecca, što ŭ šerahu biełaruskich i rasijskich ŚMI źjaviłasia infarmacyja ab tym, što 9 maja ŭ Minsku nibyta adbudziecca niejki «Ruski marš» z udziełam rasijskich chakiejnych fanataŭ. U svaich materyjałach ŚMI spasyłalisia na prezidenta Russia Unites Łatypava.
Sapraŭdy, adznačajecca ŭ kamientary kłuba, u paniadziełak, 28 krasavika, u Sankt-Pieciarburhu adbyłasia pres-kanfierencyja, pryśviečanaja startu čempijanatu śvietu pa chakiei i adkryćci Doma balelščykaŭ zbornaj Rasii Russia Unites u Minsku na čas praviadzieńnia čempijanatu śvietu. U pryvatnaści, pra zapłanavanyja akcyi balelščykaŭ paviedamiła Bałtyjskaje infarmacyjnaje ahienctva: «Adkryćcio čempijanatu śvietu sioleta vypadaje na 9 maja. Tradycyjna my arhanizujem mierapryjemstvy, pryśviečanyja Dniu Pieramohi. Jakraz 9 maja płanujem arhanizavać kałonu rasijskich balelščykaŭ i paŭdzielničać u mierapryjemstvach u Minsku, — paviedamiŭ Łatypaŭ. — Ciapier viadziom pieramovy pa hetym pytańni z pasolstvam RF u Biełarusi i ź Minharvykankamam, jaki zajmajecca arhanizacyjaj čempijanatu śvietu».
U svaim kamientary ad 30 krasavika Eduard Łatypaŭ adznačaje: «Vielmi škada, što niekatoryja ŚMI, pahnaŭšysia za hučnymi zahałoŭkami, paviedamili pra niejki «Ruski marš» u Minsku, u vyniku čaho mnohija ŭjavili sabie žachlivuju karcinu, jak natoŭp ruskich nacyjanalistaŭ idzie pa stalicy Biełarusi, machajučy impieryjalistyčnymi ściahami i vykrykvajučy «Słava Rasii».
«Adkazna zajaŭlaju: nijakaha «Ruskaha maršu» kłub balelščykaŭ Russia Unites arhanizoŭvać nie płanuje. Ale ŭ nas sapraŭdy jeść damoŭlenaść z uładami Minska ab tym, što rasijskija balelščyki voźmuć udzieł u mierapryjemstvach, pryśviečanych Dniu Pieramohi.
9 maja — śviata, jakoje adnolkava darahoje žycharam Rasii, Biełarusi i ŭsich krain, jakija byli ŭciahnutyja ŭ žachlivyja padziei siaredziny minułaha stahodździa. I my ni ŭ jakim razie nie źbirajemsia pierabolšvać ci prymianšać zasłuhi kožnaha naroda ŭ hetaj ahulnaj Pieramozie», — padkreślivaje kiraŭnik kłuba balelščykaŭ zbornaj Rasii.
«Dla ŭsich hramadzianaŭ Rasii śviaty abaviazak — 9 maja addać daninu pamiaci i pavahi podźvihu savieckich sałdat. I łahična, što, apynuŭšysia ŭ inšaj krainie, rasijskija balelščyki taksama zachočuć uskłaści vianki da pomnikaŭ hierojam. Tym bolš što ŭ Biełarusi, jak i ŭ Rasii, Dzień Pieramohi — dziaržaŭnaje śviata. Naša ideja — sabrać rasijskich balelščykaŭ razam, kab centralizavana ŭziać udzieł u tych mierapryjemstvach, jakija zapłanavanyja biełaruskimi ŭładami», — tłumačyć Łatypaŭ.
Jon taksama źviartaje ŭvahu, što hod tamu padčas čempijanatu śvietu pa chakiei ŭ Chielsinki kłub balelščykaŭ Russia Unites sumiesna z pasolstvam Rasii ŭ Finlandyi taksama braŭ udzieł va ŭskładańni viankoŭ da miemaryjała ŭ honar zahinułych savieckich vajennapałonnych.
Bolš za toje, praciahvaje Łatypaŭ, «u Minsk z Rasii źbirajecca vyklučna intelihientnaja publika. Mnohija jeduć siemjami».
Russia Unites — prajekt hramadski, stvorany dla balelščykaŭ samimi balelščykami, padkreślivaje jaho kiraŭnik. «My nie trymajemsia nijakich palityčnych, nacyjanalistyčnych i inšych dyskryminujučych idej, a taksama niezaležnyja ad jakich-niebudź dziaržaŭnych struktur», — adznačajecca ŭ kamientary.
Kiraŭnik Russia Unites spadziajecca, što «nie tolki 9 maja, ale i ŭsie nastupnyja dni čempijanatu śvietu pa chakiei projduć biez ekscesaŭ i raspalvańnia nacyjanalnaj niepryjazi, tym bolš z ulikam i biez taho niaprostaha palityčnaha stanovišča ŭ śviecie».
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary