Kab doŭha nie spračacca, jaki film źjaŭlajecca lepšym ź lepšych, papularny časopis Empire vyrašyŭ naŭprost spytać pra heta ŭ svaich čytačoŭ.
Było praviedziena hałasavańnie, pa vynikach jakoha palma pieršynstva dastałasia karcinie «Zornyja vajny: Epizod 5 — Impieryja nanosić zvarotny ŭdar», druhoje i treciaje miescy zavajavali «Chrosny baćka» i «Ciomny rycar» adpaviedna, čaćviortaje miesca va «Ŭciokaŭ z Šoŭšenka», piataje ŭ «Kryminalnaha čytva».
U apytańni paŭdzielničali 250 tys. čałaviek, a vybar im treba było rabić sa śpisu ŭ 301 kinastužku.
U dziasiatku lepšych trapiŭ taksama šosty epizod «Zornych vojnaŭ», jaki nazyvajecca «Viartańnie Džedaja», jon raźmiaściŭsia na šostym radku. U dziasiatku lepšych taksama ŭvajšli takija lehiendarnyja filmy, jak «Uładar piarścionkaŭ: Braterstva piarścionka», «Skivicy», «Indyjana Džons: U pošukach stračanaha kaŭčeha», «Pačatak».
Režysiory Krystafier Nołan («Ciomny rycar», «Pačatak») i Styvien Śpiłbierh («Skivicy», «Indyjana Džons») zaśviacilisia ŭ dziesiatcy lepšych pa dva razy. Hledačy nie raz hałasavali za filmy hetych režysioraŭ i kašalkom. Tak, Krystafier Nołan źjaŭlajecca režysioram, dva filmy jakoha sabrali ŭ prakacie bolš za $1 młrd. A Styvien Śpiłbierh — režysior 20 stužak, jakija ŭ sumie sabrali ŭ prakacie $8,4 młrd.
Empire — časopis pra kino, jaki vychodzić štomiesiac u Vialikabrytanii ŭžo 25 hadoŭ, z 1989 hoda. Vydańnie naležyć niamieckaj miedyjahrupie Bauer i vychodzić taksama ŭ Rasii, Aŭstralii i Turcyi. U Tumannym Albijonie časopis kožny hod uručaje kinapremiju Empire Awards, uładalnikaŭ jakoj vyznačajuć čytačy Empire.
Ciapier čytajuć
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje3131
Kamientary