Zmova KDB abo sprava KDB

Majora KDB Andreja Dziamidava vyzvalili pad chatni aryšt. Stała viadoma, što śledčyja dabivalisia ad jaho pakazańniaŭ na namieśnika Sucharenki Vasila Dziemiancieja, ad jakich jon byccam by atrymaŭ zahad arhanizavać vybuchi ŭ Viciebsku. Heta abo paŭtor “spravaŭ” u styli 1930-ch, abo vodhuk zadumaŭ KDB uziać uładu ŭ krainie.

Na dniach majoru Kamitetu dziaržaŭnaj biaśpieki Andreju Dziamidavu źmianili mieru ŭtrymańnia. Jaho pieraviali ź SIZA pad chatni aryšt.

A. Dziamidava zatrymali 19 lipienia. Praz try dni jaho abvinavacili ŭ ździajśnieńni niezakonnych dziejańniaŭ z ahniastrelnaj zbrojaj, bojeprypasami, vybuchovymi rečyvami, ździejśnienych pa papiaredniaj zmovie hrupaj asobaŭ.

Bolš za try miesiacy Andrej Dziamidaŭ znachodziŭsia pad śledztvam i ŭtrymlivaŭsia ŭ SIZA ŭ Miensku.

Kali dva hady tamu na viciebskich vulicach prahrymieli dva vybuchi, kiraŭnik dziaržavy prynarodna abviaściŭ: “Datyčnych da teraktu achłamonaŭ zatrymali».

Sapraŭdy, dvum hramadzianam ź Viciebsku, bratam Muraškam, było pradjaŭlenaje abvinavačvańnie ŭ ciažkim złačynstvie. Paŭhodu ich trymali ź śviedčym izalatary, damahajučysia ad ich pryznańnia. Ale, jak paźniej vyśvietliłasia, aryštavanyja nijakich adnosinaŭ da taho, što adbyłosia, nia mieli. Bratam navat vypłacili ščodruju — jak na postsavieckija zvyčai — hrašovuju kampensacyju.

Paśla pa abvinavačvańni ŭ datyčnaści da teraktaŭ u turmu na peŭny čas kinuli znanaha lidera apazycyi Paŭła Krasoŭskaha, ale musili nieŭzabavaje vypuścić paśla pratestaŭ hramadzkaści i pravaabaroncaŭ z usiaho śvietu.

Nastupnym padazravanym staŭ kadebist.

Svajaki majora kinulisia da niezaležnaj presy, jak tolki adčuli, što na ichnaha syna i muža chočuć paviesić ciažkija abvinavačvańni. Pieršyja padrabiaznaści skandalnaje versii stali viadomyja ź lista maci majora Dziamidava.

Supracoŭniki KDB karystajucca pasłuhami svaich ahientaŭ. Voś major Dziamidaŭ mieŭ «vušy» ź liku cyvilnych asobaŭ. Niechta H. raniej asudžany za ciažkoje złačynstva pa art. 295 Kryminalnaha kodeksu. Nia tak daŭno ŭ jahonym haražy vyjavili vybuchovyja rečyvy. H. na pytańnie, dzie ŭziaŭ, zajaviŭ: «Atrymaŭ ad svajho kuratara z KDB».

Majora Dziamidava ŭziali pad vartu ŭ mienskaje SIZA. Praviali pieratrusy va ŭsich jahonych svajakoŭ, ale anijakich dokazaŭ znojdziena nie było. Dva miesiacy major znachodzicca ŭ źniavoleńni. Cikava, što heta zdaryłasia litaralna praź niekalki dzion paśla vystupu kiraŭnika dziaržavy ab naviadzieńni paradku ŭ KDB.

Adnak na apošniaj pres-kanferencyi hieneralny prakuror Piotra Mikłaševič zajaviŭ, što datyčnaść majora Dziamidava da viciebskich vybuchaŭ «nie ŭstanoŭlenaja».

Sam Dziamidaŭ da chatniaha telefona nie padychodzić – jon pad achovaj. Adnak internet-vydańnie «Biełaruski partyzan» datelefanavałasia da jahonaj žonki — supracoŭnicy adździełu justycyi Viciebskaha harvykankamu. Voś što jana raspaviała:

Dziamidava vymušali dać abvinavaŭčyja pakazańni na niekatorych kiraŭnikoŭ KDB, u pryvatnaści — na byłoha pieršaha namieśnika staršyni KDB Vasila Dziemiancieja (da słova, plamieńnika byłoha staršyni Viarchoŭnaha Savietu). Dziemiancieja pry kancy lipienia razam sa Ściapanam Sucharenkam A. Łukašenka adpraviŭ u adstaŭku. Dziemianciej u svoj čas uznačalvaŭ Viciebskaje ŭpraŭleńnie KDB.

— Muž kaža, členy śledčaj hrupy nia raz prymušali jaho dać abvinavaŭčyja pakazańni na Vasila Dziemiancieja i niekatorych viciebskich načalnikaŭ KDB, ad jakich jon byccam by atrymaŭ zahad arhanizavać vybuchi ŭ Viciebsku, — patłumačyła Natalla Dziamidava. — Pry hetym naŭzamien jamu abiacali śpiarša minimalnaje pakarańnie, a potym – i naahuł vyzvaleńnie ad kryminalnaj adkaznaści.

Natalla Dziamidava sa spasyłkaj na słovy muža kaža, u vieraśni ŭ SIZA u jaho pad roznymi začepkami, ale biez padmacavańnia adpaviednymi dakumentami, sprabavali ŭziać analiz kryvi. Našto — nieviadoma.

Jak vyśvietliłasia, 5 kastryčnika suprać Dziamidava była ŭzbudžana jašče adna kryminalnaja sprava – za ździajśnieńnie zaviedama niezakonnaha vobšuku. Dziamidaŭ svajoj viny nie pryznaje i śćviardžaje, što nijakaha pieratrusu jon nie rabiŭ. Bolš za toje, hramadzianka, jakuju nibyta abšukvaŭ Dziamidaŭ, u traŭni hetaha hodu pamierła…

«Niahledziačy na toje, što muž nastojvaŭ na ŭručeńni jamu kopii pastanovy ab uzbudžeńni kryminalnaj spravy, hety dakument uručyli tolki praź miesiac, — apaviadaje N. Dziamidava. — Spatrebiŭsia ceły miesiac i nie adna skarha, kab muž atrymaŭ toje, što patrebna pavodle zakonu. Darečy, śledčy čamuści vyrašyŭ uručyć jamu hetuju papieru ŭviečary i biez prysutnaści advakata. Da taho ž uručanaja pad raśpisku pastanova roźniłasia źmiestam ad toj, ź jakoj muža aznajomili ŭ SIZA Miensku 6 kastryčnika… Pa faktach hetych parušeńniaŭ naš advakat užo nakiravaŭ skarhi ŭ adpaviednyja instancyi».

Andrej Dziamidaŭ kaža, što kali jon daviadzie ŭ sudzie svaju nievinavataść, to jon biez vahańniaŭ zvolnicca z orhanaŭ dziaržbiaśpieki.

Raskazanaje N. Dziamidavaj pralivaje śviatło na tajamničy i vostry siužet.

Prakuratura padazraje, što supracoŭniki KDB sprabavali paŭpłyvać na palityčnuju sytuacyju ŭ krainie praz arhanizacyju vybuchaŭ. Cikava, što mienavita na chvali destabilizacyi sytuacyi ŭ Rasiei ŭ vyniku šerahu vybuchaŭ pryjšoŭ da ŭłady Pucin, paśla čaho pradstaŭniki specsłužbaŭ zaniali ŭsie klučavyja pasady ŭ krainie. Nie da kanca vyśvietleny i abstaviny taho, chto i našto nibyta rychtavaŭ vybuchi i padpały ŭ biełaruskaj stalicy na 19 sakavika, čym strašyŭ Ściapan Sucharenka napiaredadni vybaraŭ. Abo ad kaho i našto sychodziła ideja zapałochvać vybarcaŭ takimi vybuchami, kali jany nie rychtavalisia.

Kali ž usia hetaja sprava sfabrykavanaja, heta aznačaje, što ŭładnyja viarchi rychtavali, jašče rychtujuć abo prynamsi razhladali mahčymaść šmatchadovaj kambinacyi ź niajasnymi zasnovami, ale vyraznymi metami. KDB mieŭ stać achviarnym kazłom, kab na jaho zvalić vinu za pravały ŭ palitycy i navat niekatoryja złačynstvy.

• 0
• 0
• 0
• 0
• 0
• 0
• 0
• 0