Dośviedam dzielicca nastaŭnica ź Biełastoččyny Alina Vaŭraniuk.
Niadaŭna adbyŭsia tradycyjny fiestyval muzyki maładoj Biełarusi «Basovišča». Sioleta jon zaznačyŭsia tym, što
na scenu razam z rok-muzykami vyjšli dzieci. 25 vučniaŭ pačatkovaj škoły, dziakujučy inicyjatyvie svajoj nastaŭnicy Aliny Vaŭraniuk, nie tolki padpiavali ŭsim biełaruskim rok-zorkam, ale prosta «ŭzarvali» śviata.
I staryja chity, i novyja pieśni, i kupałaŭskija radki ŭ ich vykanańni publika prymała ź niepaŭtornymi avacyjami. Nastaŭniku.info udałosia pahutaryć z nastaŭnicaj biełaruskaj movy Pačatkovaj škoły №4 Alinaj Vaŭraniuk, jakaja vučyć i hurtuje biełaruskich dziaciej na Biełastoččynie.
Nastaunik.info: Alina, ci lohka pryvić dzieciam luboŭ da rodnaj movy, rodnaha słova ŭ inšamoŭnym asiarodździ?
Alina Vaŭraniuk:
Kali ja lublu svaju rodnuju movu i jana zajmaje šmat miesca ŭ maim sercy i žyćci, dyk usiakija ciažkaści možna pieraadoleć.
Dy i biełarusaŭ na Biełastoččynie žyvie šmat. My starajemsia zachavać svaje tradycyi, movu.
N.: Jakija sposaby Vy znachodzicie, kab Vašyja hadavancy adčuli pryhažość i palubili rodnaje słova?
A.V.:
Ja zaŭsiody viedała, što ŭroki biełaruskaj movy – heta nie ŭsio. Stavim pjesy z maimi vučniami ŭ biełaruskim teatralnym hurtku. Letam jezdžu ź imi na tydniovyja letniki. My zasnavali hramadskuju arhanizacyju «AB-BA» (Abjadnańnie ŭ karyść dziaciej i moładzi, jakija vyvučajuć biełaruskuju movu) i ładzim ekskursii, muzyčnyja zaniatki, arhanizujem sustrečy, kancerty, vydajem dyski ź pieśniami, knižki, padručniki, dapamožniki, dajem majstar-kłasy nastaŭnikam i šmat čaho jašče.
Uvachodźcie na naš sajt i čytajcie!
N.: Viadoma, što Vašyja vučni prosta «ŭzarvali» sioletni fiestyval biełaruskaj pieśni Basovišča. Jany vystupili razam z sapraŭdnymi zorkami Biełarusi – Lavonam Volskim, Iharam Varaškievičam i inšymi, śpiavali pieśni, jakija stali chitami nie tolki ŭ Biełarusi. Raskažycie, jak heta adbyvałasia i jak da hetaha stavilisia dzieci.
A.V.: Ja viała ź dziaćmi zaniatki pa subotach, raskazvała pra fiestyval «Basovišča», historyju biełaruskaj rok-muzyki. Mnie nie było ciažka, ja ž viedaju svaich vučniaŭ, kožny hod jezdžu na Basovišča. Pachvalusia, što ja była pry abmiarkoŭvańni idei Basovišča z Basiaj Piakarskaj (tady jašče Kučynskaj) i Mikołam Vaŭraniukom (tady jašče jon nie byŭ maim mužam), my jeździli ŭ Miensk zaprašać muzykaŭ na pieršaje Basovišča. Heta byli niezabyŭnyja chviliny, pieršaja sustreča ź Sieržukom Vojušam, Alesiem Kamockim, Siarhiejem Kraŭčankam z Ulisa.
Była suarhanizatarkaj pieršaha festu, a ciapier maje byłyja vučni i ŭłasnyja dzieci jaho arhanizujuć. Ci moža być ciažka raspaviadać pra toje, što lubiš, biełaruskuju muzyku, dzieciam? Absalutna nie!
Pieśni, jakija praśpiavali dzieci, viedaje chiba kožny.
N.: Što možacie paraić svaim kaleham – vykładčykam rodnaj movy i litaratury ŭ Biełarusi, jakija taksama vymušany vychoŭvajuć dziaciej u čužamoŭnym asiarodku?
A.V.: Pa-mojmu,
samaje važnaje - dzieci adčuvajuć falš. Jany bačać, što ja nie nastaŭnica rodnaj movy tolki na ŭrokach, ja biełaruska pa žyćci.
Vychavali my z mužam dziaciej-biełarusaŭ, havaru ź imi na svajoj rodnaj movie, maje vučni, byvała, byli ździŭleny, što ja viedaju taksama polskuju movu. Ja žyvu ŭ Polščy, havaru pa-biełarusku z našym biełastockim akcentam, ale heta maja rodnaja mova.
I ja sama, i dzieci pierapoŭnieny ščaściem, bo dzieciam vielmi padabajecca pracavać i repietavać z najlepšymi muzykami, razmaŭlać pa-biełarusku, vučycca ŭ ich, zajmacca surjoznaj darosłaj spravaj. A ja naziraju, što atrymlivajecca - dzieci vielmi niepradkazalnyja, jak i muzyki.
N.: My zrazumieli Vaš sakret – pakazvać asabisty prykład i dazvolić dzieciam być stvaralnikami svajoj kultury. Vašyja vučni buduć pamiatać, jak jany stali zorkami fiestyvalu, mieć hety fakt u bijahrafii. Jany adčuli, što biełarusami być kłasna! I im užo nie treba vučyć astranomiju, kab zrazumieć, što sapraŭdnyja zorki śvieciać svaim śviatłom, a bolš drobnaja materyja – tolki adlustroŭvaje čužoje.
A.V.: Dakładna tak. U nas jašče budzie zapis usiaho kancertu. Paŭtorym jaho na Wschodzie Kultury u Biełastoku 29 žniŭnia. Vystupić Stary Olsa, a potym my - 25 AB-BA ARKIESTR z salistami, jak na «Basoviščy»: Lavonam Volskim, Iharam Varaškievičam, Alaksandram Pamidoravym, Jurkam Asieńnikam i Chrystaforam Siaśkievičam
Zaprašajem!
Treba, kab było bolš placovak, dzie dzieci-biełarusy mahli b pakazać svaje talenty.
Zacytuju Ihara Varaškieviča, lidara «Kramy»: «Heta jak byŭ adziny biełaruskamoŭny rok-fiestyval, tak im i zastaŭsia. Bolš niama. Pryčym, kali raniej byli bolš drobnyja festy kštałtu «Roku pa vakacyjach», to zaraz ničoha niama. A tyja vialikija oŭpen-ejry, što jość, zaprašajuć rasijskich zorak. Usielakaje tut było, jak i ŭ roznych historyjach byvajuć plusy i minusy. Ale ŭsio ž taki heta dobraja sprava. I nam dastatkova sumna było nie jeździć siudy 4 hady».
N.: Dziakuj za razmovu, i za Basovišča, jakoje žyvie 25 hod, taksama dziakuj!
Kamientary