Biełaruski arnitołah Dzianis Kiciel vyjaviŭ u Biełarusi novy vid ptušak — piačuraŭku-zarničku.
Jak paviedamlaje pres-słužba hramadskaj arhanizacyi «Achova ptušak Baćkaŭščyny» (APB), adkryćcio było zroblena arnitołaham u vioscy Sasnovy Bor Rasonskaha rajona Viciebskaj vobłaści. «U hetych miescach žyvie šmat ptušak, ale ja pryjechaŭ mienavita za zarničkaj, tamu što apošnim časam nazirajecca šmat rehistracyj hetaha vidu ŭ susiednich krainach. I ja padumaŭ: moža, i ŭ nas jość?» — skazaŭ Kiciel.
U Biełarusi zarehistravanyja čatyry vidy piačuravak: piačuraŭka-traščołka, piačuraŭka-cieńkaŭka, piačuraŭka-budaŭničok i zialonaja piačuraŭka, adznačyli ŭ APB. U vieraśni-kastryčniku piačuraŭki laciać ź Jeŭropy na zimoŭku ŭ Aziju i Afryku, adnak Biełaruś zvyčajna nie lažyć na šlachu ich mihracyi.
Raniej Dzianis Kiciel pieršym vyjaviŭ u Biełarusi jašče dva vidy ptušak — hornuju plisku (u 2009 hodzie) i čajkanosuju kryčku (u 2012-m). U pierśpiektyvie arnitołah płanuje znajści taksama karalkovuju piačuraŭku, piačuraŭku-tałaŭku i strynatku-remiez.
U Biełarusi na siońnia aficyjna zarehistravanyja 323 vidy ptušak. Jašče piać vidaŭ, uklučajučy piačuraŭku-zarničku, čakajuć rehistracyi ŭ Biełaruskaj arnitafaŭnistyčnaj kamisii.
Kamientary