Minskaja jeparchija Biełaruskaj pravasłaŭnaj carkvy budzie pieratvorana ŭ Minskuju mitrapoliju. Pra heta paviedamlaje pres-słužba Biełaruskaha ekzarchata.
23 kastryčnika 2014 h. adbyłosia čarhovaje pasiadžeńnie Sinoda Ruskaj pravasłaŭnaj carkvy, u jakim pryniaŭ udzieł Patryjaršy ekzarch usioj Biełarusi mitrapalit Minski i Słucki Pavieł.
Na pasiadžeńni było pryniata rašeńnie ab utvareńni novych dyjacezij Biełaruskaj pravasłaŭnaj carkvy.
U miežach Biarezinskaha, Barysaŭskaha, Krupskaha, Łahojskaha, Puchavickaha, Smalavickaha i Červieńskaha rajonaŭ Minskaj vobłaści budzie ŭtvorana Barysaŭskaja jeparchija. Archirejem Barysaŭskim i Marjinahorskim stanie jepiskap Barysaŭski Vienijamin.
U miežach Vilejskaha, Vałožynskaha, Dziaržynskaha, Maładziečanskaha, Miadzielskaha, Staŭbcoŭskaha i Uździenskaha rajonaŭ Minskaj vobłaści budzie ŭtvorana Maładziečanskaja jeparchija. Jepiskapam Maładziečanskim i Staŭbcoŭskim stanie archimandryt Pavieł Cimafiejenka.
U miežach Kleckaha, Kapylskaha, Lubanskaha, Niaśvižskaha, Słuckaha, Salihorskaha i Staradarožskaha rajonaŭ Minskaj vobłaści budzie ŭtvorana Słuckaja jeparchija. Jepiskapam Słuckim i Salihorskim stanie archimandryt Antonij Daronin.
Minskaja jeparchija ŭtvarajecca ŭ miežach horada Minska i Minskaha rajona.
Sinod pastanaviŭ utvaryć ŭ miežach horada Minska, Minskaha rajona i Minskaj vobłaści Minskuju mitrapoliju, jakaja ŭklučaje Minskuju, Barysaŭskuju, Maładziečanskuju i Słuckuju jeparchii.
Jaje kiraŭnikom pryznačany Patryjaršy ekzarch usioj Biełarusi Pavieł, jaki taksama budzie mieć tytuł mitrapalit Minski i Zasłaŭski.
Kamientary