Biełaruś i Polšča buduć sumiesna raźvivać histaryčny i dziełavy turyzm. Ab hetym paviedamiŭ siońnia žurnalistam namieśnik ministra sportu i turyzmu Biełarusi Časłaŭ Šulha pa vynikach pasiadžeńnia biełaruska-polskaj rabočaj hrupy pa turyźmie.
«My spadziajomsia, što ŭ pierśpiektyvie buduć realizavany sumiesnyja prajekty, jakija raskažuć ab našym ahulnym minułym, histaryčnych dziejačach, jakija prasłavili Biełaruś i Polšču. Taksama treba pavyšać aktyŭnaść dziełavych turystaŭ», — skazaŭ Časłaŭ Šulha.
Akramia taho, krainy majuć namier pryciahvać turystaŭ z dapamohaj kambinavanych turaŭ. «Heta datyčycca ŭ pieršuju čarhu haściej z dalokaha zamiežža, u pryvatnaści Paŭdniova-Uschodniaj Azii. Kali turysty z Kitaja, Paŭdniovaj Karei, Japonii prylatajuć u Polšču, to jany mahli b pradoŭžyć svajo padarožža ŭ Biełarusi», - rastłumačyŭ namieśnik ministra. Biełaruś i Polšča damovilisia bolš aktyŭna papularyzavać turystyčnyja brendy Biełaviežskaj puščy i Aŭhustoŭskaha kanała.
U 2013 hodzie patok polskich turystaŭ u Biełaruś vyras amal na 20 pracentaŭ u paraŭnańni z 2012 hodam, ekspart turystyčnych pasłuh taksama pavialičyŭsia praktyčna na 20 pracentaŭ. «Najbolšaja prablema zaklučajecca ŭ tym, što Biełaruś naviedvajuć u asnoŭnym žychary Uschodniaj Polščy. Heta śviedčyć ab tym, što našy turystyčnyja mahčymaści mała rekłamujucca na zachadzie hetaj krainy. Tamu ŭ budučym hodzie my płanujem udzielničać u vialikaj turystyčnaj vystaŭcy ŭ Poznani i raskazać ab našym turystyčnym patencyjale», — raskazaŭ Časłaŭ Šulha.
Što datyčycca biełaruskich turystaŭ u Polščy, to kolkaść pierasiačeńniaŭ hranicy hramadzianami našaj krainy ŭ minułym hodzie pavialičyłasia bolš jak na 10 pracentaŭ. Havoračy ab reputacyi biełaruskich padarožnikaŭ, namieśnik ministra sportu i turyzmu Polščy Kataržyna Sabirajska adznačyła: «Biełarusy — cudoŭnyja turysty, i my zaŭsiody rady bačyć ich u siabie ŭ krainie. Ciapier u rejtynhu naviedvańniaŭ našaj krainy biełarusy zajmajuć treciaje miesca paśla niemcaŭ i ŭkraincaŭ».
Paśla pasiadžeńnia biełaruska-polskaj rabočaj hrupy adbyłasia prezientacyja turystyčnych mahčymaściej Polščy. Jak rastłumačyła Katažyna Sabirajska, pryjarytetnymi napramkami raźvićcia ŭ Polščy źjaŭlajucca viełasipiedny, miedycynski i dziełavy turyzm. U čas prezientacyi turapieratary raskazali ab miescach i turystyčnych pasłuhach, jakija mohuć pryciahnuć uvahu biełaruskich amataraŭ padarožžaŭ, u asobnaj siekcyi byli pradstaŭleny pasłuhi haściničnaha biźniesu.
Płanujecca, što anałahičnaja prezientacyja pradstaŭnikoŭ biełaruskaj turindustryi projdzie ŭ Polščy ŭ 2015 hodzie.
Vylecieła ŭ nieviadomym kirunku śpikierka KR Anžalika Mielnikava30
Kamientary