Piać faktaŭ pra Juryja Žadobina, zmahara z 1767 destruktyŭnymi elemientami + REDKIJA ZDYMKI
Siońnia Alaksandr Łukašenka adpraviŭ u adstaŭku ministra abarony Juryja Žadobina. 14 listapada hienierału spoŭniłasia 60 hadoŭ – piensijny ŭzrost. Doŭha čakać z adstaŭkaj nie stali. Ciapier Žadobin na piensii z pravam nasić vajskovuju formu adzieńnia i znaki adroźnieńnia.
Ciełaachoŭnik Łukašenki
Jury Viktaravič Žadobin naradziŭsia ŭ Dnieprapiatroŭsku (Ukraina) ŭ 1954 hodzie. Jon prafiesijny vajskoviec. U 1976 hodzie skončyŭ Kazanskaje vyšejšaje tankavaje kamandnaje vučylišča, u 1985 – kamandny fakultet Vajennaj akademii branietankavych vojskaŭ ŭ Maskvie. Z 1990 hodu pa 1999 hod Jury Žadobin słužyŭ na kamandnych pasadach u systemie hramadzianskaj abarony Biełarusi, unutranych vojskach MUS RB.
U 2003 hodzie Žadobin atrymaŭ supieradkaznuju pracu. Nie milicyjant i nie čekist uznačaliŭ słužbu achovy prezidenta. Heta śviedčyć pra vialiki davier z boku Łukašenki da hetaha čałavieka.
Jak adznačajuć, Žadobin nikoli nie zajmaŭsia intryhami. Kaalicyj nie budavaŭ. Byŭ zvyčajnym adkaznym rabotnikam, jaki zdolny nie tolki vykonvać pastaŭlenuju pierad saboj pracu, ale i paśmiajacca.
1767 «pacukoŭ» hienierała Žadobina
U KDB Žadobin pratrymaŭsia tolki hod. U čas pracy Juryja Viktaraviča ŭ Kamitecie dziaržbiaśpieki aktyvizavałasia viarboŭka hramadzian, što pryvodziła da šerahu skandałaŭ. Kažuć, što Žadobin moh pašychtavać supracoŭnikoŭ KDB na płacu, kab začytać im prykazy ci novaŭviadzieńnie. Ad armiejskich pryvyčak nikudy. Jašče Žadobin aburała, što «čekisty» chodziać na pracu nie ŭ formie.
Samaja ž słavutaja zajava Žadobina była pra 1767 «destruktyŭnych elemientaŭ». «U tak zvanuju supolnaść destruktyŭnych elementaŭ uvachodzić usiaho 1 767 asobaŭ. My ich usich viedajem pajmienna, i ich nia robicca ni bolš, ni mienš», — skazaŭ Žadobin.
Tady navat apazicyja vypuściła znački «Adzin z 1767».
Nie spraviŭsia ŭ Radzie biaśpieki
Dziaržsakratarom Rady biaśpieki Žadobin staŭ na chvali vybuchu 2008 hoda na dzień respubliki. Tady Łukašenka va ŭsim abvinavaciŭ Viktara Šejmana, a jaho źmienščykam pryznačyŭ jakraz Žadobina. Tankist Žadobin davoli chutka vycisnuŭ z usich pasad u Radzie biaśpieki ludziej Šejmana. Adnak z pracaj jon nie spraviŭsia. Łukašenka razhromna raskrytykavaŭ jaho: «Vy praihryvajecie ŭsim papiarednim dziaržsakrataram». Praŭda, paniziŭ nie nadta mocna – da ministra abarony.
«Adnaŭlaŭ vajskovyja haradki z ruin popiełu»
Usio ž vojska było i zastajecca hałoŭnaj stychijaj Žadobina. Paśla nie nadta ŭłaścivych pasad u KDB i Radzie biaśpieki, u Ministerstvie abarony hienierał adčuvaŭ siabie jak ryba ŭ vadzie. Byŭ zadavoleny im i kiraŭnik dziaržavy.
«I toje, što dziasiatki vajskovych haradkoŭ adnavili z ruin i popiełu, pryviali ŭ narmalny stan, i toje, što ŭ nas armija adčuvaje siabie jak armija, i toje, što my vyznačylisia na pierśpiektyvu — heta vialikaja jaho zasłuha», — skazaŭ Łukašenka ŭznaharodžvajučy Juryja Žadobina Ordenam «Za słužbu Radzimie» III stupieni.
Litaralna paru dzion tamu Patryjaršy Ekzarch usiaje Biełarusi, mitrapalit Minski i Zasłaŭski Pavieł uznaharodziŭ Juryja Žadobina «za značny ŭkład u carkoŭna-dziaržaŭnaje supracoŭnictva» ordenam Śviaciciela Kiryły, jepiskapa Turaŭskaha, I stupieni.
Siamja
Žonka Juryja Žadobina Łarysa Alaksandraŭna ŭrač pa adukacyi. Jana zaraz vykładaje na Humanitarnym fakultecie BDU. Staršy vykładčyk na kafiedry ekałohii čałavieka.
U pary dvoje dziaciej – syn i dačka. Dačka Alaksandra zamužam za načalnikam Minskaha abłasnoha ŭpraŭleńnia MNS Maksimam Šyškanavym. Sama ž dačka źjaŭlajecca kapitanam unutranaj słužby, staršym juryskonsultam upraŭleńnia pravavoha zabiaśpiačeńnia MNS.
A syn Viktar pajšoŭ darohaj baćki. U 2012 hodzie hazieta «Sovietskaja Biełoruśsija» paviedamlała, što major unutranych vojskaŭ Viktar Žadobin skončyŭ kamandna-štabny fakultet Vajskovaj akademii. Viktar Žadobin atrymaŭ dypłom z adznakaj. Viadoma, što jašče raniej jon byŭ kamandziram 1-aj roty asobnaha śpiecyjalnaha milicejskaha bataljona ŭnutranych vojskaŭ. A siońnia źjaŭlajecca pieršym namieśnikam kamandzira čaści 55-29.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1111
Kamientary