Hałoŭnaje ŭpraŭleńnie justycyi Minabłvykankama admoviłasia zarehistravać hramadskaje abjadnańnie «Chryścijanskija demakraty Minščyny». Aficyjnuju admovu ŭ rehistracyi padpisała namieśnik načalnika ŭpraŭleńnia Iryna Calikaviec, paviedamlaje pres-słužba arhkamiteta partyi «Biełaruskaja chryścijanskaja demakratyja» (BCHD).
Admova ŭ rehistracyi nie stała niečakanaściu dla hramadskich aktyvistaŭ. Kamientujučy rašeńnie čynoŭnikaŭ, kiraŭnik Minskaj abłasnoj arhanizacyi BCHD Pavieł Prakapovič źviarnuŭ uvahu na biurakratyčnuju praceduru rehistracyi hramadskich abjadnańniaŭ.
«Pracedura vyhladaje tak: pakiet dakumientaŭ pieradajecca ŭ hałoŭnaje ŭpraŭleńnie justycyi, a hałoŭnaje ŭpraŭleńnie daje admovu na praciahu miesiaca. Nijakich sustreč, udakładnieńniaŭ ci zapytaŭ, — adznačyŭ Prakapovič. — Ściana biurakratyi: vy nam — dakumienty, my vam — adkaz. U vyniku ŭ adnym z dakumientaŭ znajšli techničnuju pamyłku, najaŭnaść jakoj my pryznajem, i čas na vypraŭleńnie jakoj zajmaje prykładna adnu chvilinu. Na praciahu cełaha miesiaca nichto z hałoŭnaha ŭpraŭleńnia nie źviazaŭsia z nami i nie zadaŭ nijakich pytańniaŭ. Rašeńnie pra admovu ŭ dziaržaŭnaj rehistracyi było pryniata ŭ apošni dzień miesiačnaha terminu, na praciahu jakoha jość mahčymaść vypravić lubyja niedachopy ŭ dakumientach».
Jak miarkuje Prakapovič, dziejnaść čynoŭnikaŭ u takich vypadkach skiravana na pošuk pamyłak, kab byli padstavy dla nierehistracyi niepažadanych arhanizacyj.
Ustanoŭčy schod HA «Chryścijanskija demakraty Minščyny» adbyŭsia ŭ Minsku 4 kastryčnika, praź miesiac byli padadzieny dakumienty na rehistracyju.
Ułady niekalki razoŭ admaŭlali ŭ rehistracyi BCHD, paśla čaho arhkamitet partyi nieadnarazova sprabavaŭ lehalizavać svaich aktyvistaŭ praz rehistracyju hramadskich abjadnańniaŭ roznych uzroŭniaŭ, adnak štoraz adkazy ŭpraŭleńniaŭ justycyi byli admoŭnymi.
Ciapier čytajuć
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus papaŭ bieśpiłotnik32
Kamientary