Bahdankievič: «Pavieł Kałavur — najlepšy varyjant». Piać faktaŭ pra novaha staršyniu Nacbanka
Alaksandr Łukašenka pryznačyŭ Paŭła Kałavura staršynioj Nacbanka. «Naša Niva» raskazvaje cikavyja fakty ź jaho žyćcia.
Palašuk
Kałavuru 52 hady. Jon naradziŭsia ŭ vioscy Biełavuša Stolinskaha rajona. Proźvišča maje ciurkskija karani, jano pachodzić ad słova «karauł!»
Bankir advučyŭsia ŭ Pinskim ulikova-kredytnym technikumie (jak i mnohija biełaruskija finansisty, uklučna z Nadziejaj Jermakovaj), a paśla i ŭ Narhasie. U stałym vieku skončyŭ BDEU jašče raz, mahčyma, u aficyjnaj bijahrafii havorka viadziecca pra mahistraturu.
Kałavur spačatku pracavaŭ u sistemie Dziaržbanka — u Stoŭbcach, Biarezinie i Vałožynie, a niezaležnaść sustrakaŭ kiraŭnikom vałožynskaha adździaleńnia «Biełahraprambanka».
Dośvied pracy ŭ Nacbanku
Adtul jaho zabraŭ u Minsk Stanisłaŭ Bahdankievič, tahačasny kiraŭnik Nacbanka. Kałavur staŭ jahonym namieśnikam. U hetaj struktury bankir adpracavaŭ 17 hadoŭ, paśla staŭšy pieršym namieśnikam, ale ŭžo nie ŭ Bahdankieviča, a ŭ Piatra Prakapoviča.
U 2010-m Kałavur syšoŭ kiravać «BiełVEBam», dačkoj rasijskaha banka.
Tak što prychod u Nacbank budzie dla jaho druhim.
«Adzin z najlepšych bankiraŭ»
«Siarod dziejsnych bankiraŭ heta adna najlepšych kandydatur», – pierakanany Stanisłaŭ Bahdankievič. Ale pryznajecca, što ad Kałavura ŭ ciapierašniaj situacyi mała što zaležyć.
«Patrebnaja sumiesnaja prahrama pa pierachodu na novuju madel rehulavańnia ekanomiki i novaja ekanamičnaja palityka. I ŭ hetaj prahramie pazicyi manietarnaj palityki nie na pieršym miescy.
Hrašovaja masa raście, tamu što banki kredytujuć nieefiektyŭnyja dziaržprajekty i stratnyja pradpryjemstvy, jakija pracujuć na skład. Kali Kałavur budzie adstojvać svaje pazicyi, heta syhraje svaju rolu.
Ale mianie bolš zasmučaje pryznačeńnie Andreja Kabiakova. Urad nivodnaha kroku nie moh rabić bieź jahonaj zhody. Jon, pa sutnaści, hałoŭny vinavaty ŭ kryzisnym abvale. I jaho pierasoŭvajuć na pasadu premjera! Tamu čakańni słabyja», – razvažaje Bahdankievič.
Kandydat ekanamičnych navuk
U 2001-m Kałavur abaraniŭ dysiertacyju. Temaj daśledavańnia byli ekanamičnyja pieradumovy i nastupstvy manietarnaha sajuza Biełarusi i Rasii. Pryčym aceńvaŭ jon ich niehatyŭna.
«Na moj pohlad, jon zajmaŭ słušnuju pazicyju, maŭlaŭ, nie treba pierachodzić na rasiejski rubiel, pakul nie budzie poŭnaj ekanamičnaj intehracyi», – uzhadvaje Stanisłaŭ Bahdankievič.
Nie ŭ Drazdach, ale pobač
Kałavur žyvie niepadaloku ad Drazdoŭ, u «pasiołku bankiraŭ».
U 2007 hodzie Minharvykankam vydzieliŭ ziamlu na vulicy Vilejskaj siemiarym dziaržaŭnym słužačym. Tahačasnamu staršyni Nacbanka Piatru Prakapoviču — 0,15 ha. A ŭsie jahonyja namieśniki — Pavieł Kałavur, Juryj Ałymaŭ, Mikałaj Łuzhin, Uładzimir Siańko, Mikałaj Kaduška i Vasil Maciušeŭski — atrymali pa 0,11 ha. Umovy vydzialeńnia ŭčastkaŭ nieviadomyja. Adnak sumnieŭna, što heta byŭ aŭkcyjon z roŭnym dostupam usich achvotnych.
Kałavuru naležyć dvuchpaviarchovy katedž z dvuma padvałami i dźviuma terasami. Ahulnaja płošča doma – 407 m2.
Juraś Ziankovič raskazaŭ pra svajo vyzvaleńnie i šlach u ZŠA6
Kamientary