Ministerstva justycyi vyniesła papiaredžańnie Ahrarnaj partyi

Ministerstva justycyi Biełarusi vyniesła piśmovaje papiaredžańnie Ahrarnaj partyi.

U infarmacyi, raźmieščanaj na sajcie ministerstva 4 studzienia, paviedamlajecca, što papiaredžańnie vyniesiena na padstavie płanavaj pravierki, padčas jakoj ustanoŭleny parušeńni hetaj palityčnaj partyjaj zakanadaŭstva i ŭłasnaha statuta.

U pryvatnaści, paviedamlajecca, što pa stanie na 20 śniežnia 2007 hoda Centralny saviet (kirujučy orhan) Ahrarnaj partyi bolš za miesiac nie raźmiaščajecca pa svaim jurydyčnym adrasie, adnak adpaviednyja dakumienty dla dziaržaŭnaj rehistracyi źmianieńniaŭ u statut partyi ŭ suviazi sa źmianieńniem jaje jurydyčnaha adrasa va ŭstanoŭleny zakanadaŭstvam termin Miniustu pradstaŭleny nie byli. Akramia taho, pa svaich jurydyčnych adrasach nie raźmiaščajucca Viciebskaja abłasnaja arhanizacyja i terytaryjalnaja piarvičnaja arhanizacyja Hłybockaha rajona.

Ministerstva paviedamlaje, što da hetaha času Ahrarnaj partyjaj nie vykanany patrabavańni artykuła 4 Zakona Respubliki Biełaruś «Ab uniasieńni źmianieńniaŭ i dapaŭnieńniaŭ u Zakon Respubliki Biełaruś «Ab palityčnych partyjach», jaki ŭstanaŭlivaje, što palityčnyja partyi štohod da 1 sakavika pradstaŭlajuć u Ministerstva justycyi infarmacyju ab svajoj dziejnaści.

Miniust papiaredziŭ kirujučy orhan Ahrarnaj partyi, što ŭ vypadku, kali vyjaŭlenyja parušeńni nie buduć vypraŭlenyja va ŭstanoŭleny termin, u dačynieńni da Ahrarnaj partyi moža być pastaŭlena pytańnie ab prypynieńni jaje dziejnaści abo likvidacyi partyi ŭ sudovym paradku.

Ahrarnaja partyja była stvorana ŭ 1992 hodzie, uznačaliŭ jaje Siamion Šarecki. U Viarchoŭnym saviecie Biełarusi 13‑ha sklikańnia ahrarniki mieli samuju bujnuju frakcyju — 44 mandaty, a jaje lider byŭ abrany śpikieram. Kanstytucyjny kryzis 1996 hoda raskałoŭ ahrarnikaŭ na tych, chto padtrymaŭ prezidenta, i tych, chto razam z S.Šareckim zastaŭsia ŭ Viarchoŭnym saviecie. U vyniku ŭ 1999 hodzie palityčnaje abjadnańnie akazałasia na miažy zakryćcia.

Adradžeńnie partyi adbyłosia ŭ kancy sakavika 2000 hoda, kali paśla piacihadovaha pierapynku prajšoŭ IV źjezd Ahrarnaj partyi. Jaho delehaty asudzili dziejańni raniejšaha kiraŭnictva partyi i zajavili ab svaim namiery «kanstruktyŭna supracoŭničać z uładaj». Lideram partyi byŭ abrany Michaił Šymanski. U siońniašnim składzie Pałaty pradstaŭnikoŭ Ahrarnuju partyju pradstaŭlajuć try deputaty.

• 0
• 0
• 0
• 0
• 0
• 0
• 0
• 0